ಬೆಂಗಳೂರು: ರಕ್ಷಿತ್ ಶೆಟ್ಟಿ ಅಭಿನಯದ 'ಕಿರಿಕ್ ಪಾರ್ಟಿ' ಭರ್ಜರಿ ಯಶಸ್ಸು ಮತ್ತು ಲಾಭ ಗಳಿಸುವತ್ತ ಮುನ್ನುಗ್ಗಿದೆ. ಈ ಸಿನೆಮಾ ರಕ್ಷಿತ್ ಶೆಟ್ಟಿ ಅವರನ್ನು ಮುಂದಿನ ಸ್ಟಾರ್ ನಟನನ್ನಾಗಿಸುವತ್ತಲೂ ದಾಪುಗಾಲು ಹಾಕಿದ್ದು, ಇದರ ಬಾಕ್ಸ್ ಆಫಿಸ್ ಗಳಿಕೆ ನಿಬ್ಬೆರಗಾಗುವಂತೆ ಮಾಡಿದೆ. 

ರಕ್ಷಿತ್ ಶೆಟ್ಟಿ ಒಡೆತನದ ಪರಾಂವಹ್ ಸ್ಟುಡಿಯೋಸ್ ನಿರ್ಮಾಣದ 'ಕಿರಿಕ್ ಪಾರ್ಟಿ' ೨೫ ದಿನಗಳ ಪ್ರದರ್ಶನ ಪೂರೈಸಿದ್ದು, ಆ ಅವಧಿಯಲ್ಲಿ ೨೫ ಕೋಟಿ ಗಳಿಕೆ ಕಂಡಿದೆಯಂತೆ. 

ಈ ಬ್ಲಾಕ್ ಬಸ್ಟರ್ ಸಿನೆಮಾ ಜಾಗತಿಕ ಗಮನವನ್ನು ಕೂಡ ಸೆಳೆದಿದ್ದು, ಅಮೆರಿಕಾದಲ್ಲಿ ಫೆಬ್ರವರಿ ಮೊದಲ ವಾರದಲ್ಲಿ ಬಿಡುಗಡೆಯಾಗಲಿದೆ ಮತ್ತು ೧೦೦ ಚಿತ್ರಮಂದಿರಗಳಲ್ಲಿ ತೆರೆ ಕಾಣಲಿದೆಯಂತೆ. ಕನ್ನಡ ಸಿನೆಮಾವೊಂದು ಅಮೆರಿಕಾದಲ್ಲಿ ಇಷ್ಟು ದೊಡ್ಡ ಮಟ್ಟದ ಬಿಡುಗಡೆ ಕಾಣುತ್ತಿರುವುದು ಇದೆ ಮೊದಲು. 

ಈ ಕಾಲೇಜು ಕಥಾನಕದಲ್ಲಿ ರಕ್ಷಿತ್ ಶೆಟ್ಟಿ ಜೊತೆಗೆ ರಶ್ಮಿಕಾ ಮಂದಣ್ಣ, ಸಂಯುಕ್ತ ಹೆಗ್ಡೆ ನಟಿಸಿದ್ದು, ರಿಷಬ್ ಶೆಟ್ಟಿ ನಿರ್ದೇಶಕ. ಅಜನೀಶ್ ಲೋಕನಾಥ್ ಅವರ ಸಂಗೀತ ಮತ್ತು ಕರಮ್ ಚಾವ್ಲಾ ಅವರ ಸಿನೆಮ್ಯಾಟೋಗ್ರಫಿ ಕೂಡ ಪ್ರೇಕ್ಷಕರ ಮನಸೂರೆಗೊಂಡಿರುವುದು ವಿಶೇಷ.