ಮುಂಬಯಿ: ಹಿರಿಯ ನಟಿ ಶ್ರೀದೇವಿ ನಿಧನಕ್ಕೆ ಬಾಲಿವುಡ್ ಗಣ್ಯರು ಆಘಾತ ವ್ಯಕ್ತ ಪಡಿಸಿದ್ದು ಪ್ರಧಾನಿ ನರೇಂದ್ರ ಮೋದಿ ಸೇರಿದಂತೆ ಹಲವರು ಟ್ವಿಟ್ಟರ್ ನಲ್ಲಿ ಸಂತಾಪ ಸೂಚಿಸಿದ್ದಾರೆ.
1963 ರಲ್ಲಿ ತಮಿಳುನಾಡಿನಲ್ಲಿ ಜನಿಸಿದ ಶ್ರೀದೇವಿ ತಮ್ಮ 4ನೇ ವಯಸ್ಸಿನಲ್ಲಿಯೇ ತುನೈವನ್ ಎಂಬ ಸಿನಿಮಾದಲ್ಲಿ ಬಾಲನಟಿಯಾಗಿ ಕಾಣಿಸಿಕೊಂಡರು.
ಅದಾದ ನಂತರ ಹಿಂತಿರುಗಿ ನೋಡದ ಶ್ರೀದೇವಿ ದೇಶದ ಪ್ರಮುಖ ನಾಯಕಿಯರುಗಳಲ್ಲಿ ಒಬ್ಬರಾದರು. ಬಾಲಿವುಡ್ ಸೇರಿದಂತೆ ದಕ್ಷಿಣ ಭಾರತದ ಭಾಷೆಗಳ ಸುಮಾರು 200 ಚಿತ್ರಗಳಲ್ಲಿ ಶ್ರೀದೇವಿ ನಟಿಸಿದ್ದಾರೆ.
ಬಾಲಿವುಡ್ ನ ಪ್ರಸಿದ್ದ ಸಿನಿಮಾಗಳಾದ ಚಾಂದನಿ, ಲಮ್ಹೆ, ಮಿ. ಇಂಡಿಯಾ, ಚಾಲಾ ಬಾಜ್, ನಾಗಿನ, ಸದ್ಮಾ ಸೇರಿದಂತೆ ಹಲವು ಸಿನಿಮಾಗಳಲ್ಲಿ ನಟಿಸಿ ಪ್ರಸಿದ್ದರಾಗಿದ್ದರು.
2017ರಲ್ಲಿ ಬಿಡುಗಡೆಯಾದ ಮಾಮ್ ಶ್ರೀದೇವಿ ಅವರ ಕೊನೆಯ ಸಿನಿಮಾವಾಗಿದೆ. ಶ್ರೀದೇವಿ ಹಿರಿಯ ಪುತ್ರಿ ಜಾಹ್ನವಿ ಈ ವರ್ಷ ಕರಣ್ ಜೋಹರ್ ನಿರ್ದೇಶನದ ದಡಕ್ ಸಿನಿಮಾ ಮೂಲಕ ಬಾಲಿವುಡ್ ಗೆ ಪಾದಾರ್ಪಣೆ ಮಾಡಲಿದ್ದಾರೆ.