ಊರ್ವಿ ಚಿತ್ರದ ಮೂಲಕ ನಿರ್ದೇಶನಕ್ಕೆ ಪಾದಾರ್ಪಣೆ ಮಾಡಿದ ಪ್ರದೀಪ್ ವರ್ಮಾ ತಮ್ಮ ಎರಡನೇ ಪ್ರಾಜೆಕ್ಟ್ ಆರಂಭಿಸುತ್ತಿದ್ದಾರೆ. ಬ್ರಾಹ್ಮಿ ಎಂದು ಚಿತ್ರಕ್ಕೆ ಹೆಸರಿಡಲಾಗಿದ್ದು ಮಹಿಳಾ ಪ್ರಧಾನ ಚಿತ್ರದಲ್ಲಿ ಇಬ್ಬರು ಹೀರೋಯಿನ್ ಗಳಿರುತ್ತಾರೆ. ಸಂಗೀತ ಪ್ರಧಾನ ಚಿತ್ರವಿದು.
ಸುಮನ್ ನಗರ್ ಕರ್ ಮುಖ್ಯ ಪಾತ್ರ ವಹಿಸಿದರೆ ಎರಡನೇ ಹೀರೋಯಿನ್ ಗಾಗಿ ಚಿತ್ರತಂಡ ಹುಡುಕಾಟ ನಡೆಸುತ್ತಿದೆ. ಸ್ಯಾಂಡಲ್ ವುಡ್ ನ ಬೆಳದಿಂಗಳ ಬಾಲೆ ಎಂದು ಹೆಸರಾಗಿರುವ ಸುಮನ್ ನಗರ್ ಕರ್ ಪ್ರಸ್ತುತ ಅಮೆರಿಕಾ, ಭಾರತದ ಮಧ್ಯೆ ಓಡಾಡಿಕೊಂಡು ಇದ್ದಾರೆ. ನಿಷ್ಕರ್ಷ ನಟಿಯಾಗಿರುವ ಸುಮನ್ ನಗರ್ ಕರ್ ತಮ್ಮ ಹೆಸರಿನಲ್ಲಿ ಪ್ರೊಡಕ್ಷನ್ ಹೌಸ್ ನ್ನು ಆರಂಭಿಸಿದ್ದು ಬಬ್ರು ಎಂಬ ಹೆಸರಿನ ಸಿನಿಮಾದೊಂದಿಗೆ ಕೆಲಸ ಆರಂಭಿಸಿದ್ದಾರೆ.
ಈ ಸಿನಿಮಾವಿಡೀ ಅಮೆರಿಕದಲ್ಲಿ ಶೂಟ್ ಮಾಡಲಾಗಿದ್ದು ಚಿತ್ರ ಪೋಸ್ಟ್ ಪ್ರೊಡಕ್ಷನ್ ಹಂತದಲ್ಲಿದೆ. ತಮ್ಮ ಬ್ರಾಹ್ಮಿ ಚಿತ್ರದ ಬಗ್ಗೆ ಮಾತನಾಡಿದ ನಿರ್ದೇಶಕ ಪ್ರದೀಪ್ ವರ್ಮ, ಇಲ್ಲಿ 42 ವರ್ಷದ ಮಹಿಳೆ ಮತ್ತು 20 ವರ್ಷದ ಯುವತಿ ಸ್ವತಂತ್ರ ಜೀವನ ನಡೆಸುವುದರ ಕುರಿತು ಕಥೆಯಿರುತ್ತದೆ. ಇವರ ಸಂಬಂಧ ಗುರು-ಶಿಷ್ಯೆಯ ರೀತಿ ಇರುತ್ತದೆ. ಏಕಲವ್ಯ ಕಥೆಯ ರೀತಿ ಎನ್ನುತ್ತಾರೆ.
ಚಿತ್ರದ ಶೂಟಿಂಗ್ ಮೇ ತಿಂಗಳಲ್ಲಿ ಆರಂಭವಾಗಲಿದೆಯಂತೆ. ಮಂಗಳೂರು, ಕರ್ನಾಟಕ-ಗೋವಾ ಗಡಿಯಲ್ಲಿ ಚಿತ್ರೀಕರಣ ನಡೆಯಲಿದೆ. ಅಭಿಷೇಕ್ ಅಯ್ಯಂಗಾರ್ ಈ ಚಿತ್ರಕ್ಕೆ ಸಂಭಾಷಣೆ ಬರೆದಿದ್ದಾರೆ. ಗುರುಪ್ರಸಾದ್ ನಾರ್ನಾಡ್ ಅವರ ಛಾಯಾಗ್ರಹಣವಿರಲಿದೆ.