ಗೌರಿ ಹಬ್ಬಕ್ಕೆ ಆಡಿಯೋ ಬಿಡುಗಡೆ, ಮಾಸಾಂತ್ಯಕ್ಕೆ ಚಿತ್ರಮಂದಿರಗಳಲ್ಲಿ 'ತಾರಕಾಸುರ'!

ಬೆಂಗಳೂರು: ಚಂದ್ರಶೇಖರ್ ಬಂಡಿಯಪ್ಪ ನಿರ್ದೇಶನದ "ತಾರಕಾಸುರ" ಈ ತಿಂಗಳೂ ಬಿಡುಗಡೆಯಾಗುವ ನಿರೀಕ್ಷೆ ಇದೆ.ಇದರ ನಡುವೆ ಸೋಮವಾರ ಶಿವರಾಜ್ ಕುಮಾರ್ ದನಿಯಲ್ಲಿ ಮೂಡಿ ಬಂದಿರುವ ಒಂದು ಗೀತೆ " ಕನ್ನಡ ಕಲಿಯೋ... ಕನ್ನಡ ಕಲಿಯೋ..." ಅನ್ನು ರೆಬೆಲ್ ಸ್ಟಾರ್ ಅಂಬರೀಶ್ ಹಾಗೂ ಸುಮಲತಾ ಬಿಡುಗಡೆಗೊಳಿಸಿದ್ದಾರೆ.

ಸಧ್ಯ ಚಿತ್ರ ಸೆನ್ಸಾರ್ ಬೋರ್ಡ್ ನಲಿದ್ದು ಚಿತ್ರದ ಆಡಿಯೋ ಸೆಪ್ಟೆಂಬರ್ 13 ಕ್ಕೆ ಬಿಡುಗಡೆಯಾಗಲಿದೆ.

ಚಿತ್ರದಲ್ಲಿ ಚಿತ್ರಮಂದಿರದ ಮಾಲೀಕರಾದ ನರಸಿಂಹುಲು ಅವರ ಪುತ್ರ ವೈಭವ್ ಇದೇ ಮೊದಲ ಬಾರಿಗೆ ಬಣ್ಣ ಹಚ್ಚಿಕೊಳ್ಳಲಿದ್ದಾರೆ. ಮಾನ್ವಿತಾ ಹರೀಶ್ ಸಹ ಈ ಚಿತ್ರದಲ್ಲಿ ನಟಿಸುತ್ತಿದ್ದು ಬ್ರಿಟೀಷ್ ಮೂಲದ ಡ್ಯಾನಿ ಸಪನಿ ಅಭಿನಯವೂ ಇದೆ. ಡ್ಯಾನಿ ಚಿತ್ರದಲ್ಲಿ ಪ್ರತಿನಾಯಕ ಅಥವಾ ಖಳನ ಪಾತ್ರ ಮಾಡುತ್ತಿದ್ದಾರೆ.

"ನಾವು ಸೆಪ್ಟೆಂಬರ್ ಅಂತ್ಯದ ವೇಳೆಗೆ ಚಿತ್ರ ಬಿಡುಗಡೆಗೆ ಯೋಜಿಸಿದ್ದೇವೆ. ಸಧ್ಯ ಸೆನ್ಸಾರ್ ಮಂಡಳಿಯವರು ಚಿತ್ರಕ್ಕೆ ಸರ್ಟಿಫಿಕೇಟ್ ನೀಡುವುದನ್ನೇ ಕಾಯುತ್ತಿದ್ದು ಒಮ್ಮೆ ಸೆನ್ಸಾರ್ ಕೆಲ್ಸ ಮುಗಿದರೆ ಚಿತ್ರ ಬಿಡುಗಡೆಯ ಅಧಿಕೃತ ದಿನಾಂಕ ಘೋಷಣೆ ಮಾಡಲಿದ್ದೇವೆ" ನಿರ್ದೇಶಕರು ಹೇಳುತ್ತಾರೆ.

"ತಾರಕಾಸುರ" ಚಿತ್ರಕ್ಕೆ ಧರ್ಮ ಸಂಗೀತ ನೀಡಿದರೆ ಕುಮಾರ್ ಗೌಡ ಛಾಯಾಗ್ರಹಣವಿದೆ.