ನಟ ಸಾರ್ವಭೌಮ ಚಿತ್ರಕ್ಕಾಗಿ ಪುನೀತ್ ರಾಜ್ ಕುಮಾರ್ ಅಭಿಮಾನಿಗಳು ಕಾಯುತ್ತಿದ್ದು,  ಅಭಿಮಾನಿಯೋರ್ವ ಬೆಳಿಗ್ಗೆ 4 ಗಂಟೆಯ ಶೋಗೆ ಇಡಿ ಥಿಯೇಟರ್ ನ್ನೇ ಬುಕ್ ಮಾಡಿದ್ದಾನೆ. ಚಿತ್ರ ಮಧ್ಯರಾತ್ರಿಯ ಶೋ ಅನ್ನೂ ಹೊಂದಿರಲಿದ್ದು, ಈ ನಿಟ್ಟಿನಲ್ಲಿ ಚಿತ್ರತಂಡ ಕಮಿಷನರ್ ಗಮನಕ್ಕೂ ತಂದಿದೆ. 

ಈ ನಡುವೆ ಚಿತ್ರದ ನಿರ್ಮಾಪಕ ರಾಕ್ ಲೈನ್ ವೆಂಕಟೇಶ್ ಚಿತ್ರದ ಬಗ್ಗೆ ಮಾತನಾಡಿದ್ದು, 10 ವರ್ಷಗಳ ನಂತರ ಪುನೀತ್ ರಾಜ್ ಕುಮಾರ್ ಗೆ ಸಿನಿಮಾ ನಿರ್ಮಾಣ ಮಾಡಿರುವುದರ ಬಗ್ಗೆ ಮಾತನಾಡಿದ್ದಾರೆ. " ನನ್ನೊಂದಿಗೆ ಜೊತೆಗೂಡಿ ಸಿನಿಮಾ ಮಾಡಲು 10 ವರ್ಷ ಏಕೆ ಬೆಕಾಯಿತು ಎಂಬುದನ್ನು ನೀವು ಪುನೀತ್ ಅವರನ್ನೆ ಕೇಳಬೇಕೆಂದು ಹೇಳಿರುವ ರಾಕ್ ಲೈನ್ ವೆಂಕಟೇಶ್, ಸ್ಟಾರ್ ಗಳೊಂದಿಗೆ ಕೆಲಸ ಮಾಡುವುದಕ್ಕೆ ಚಿತ್ರಕಥೆ ಸಹ ಪ್ರಮುಖ ಪಾತ್ರ ವಹಿಸುತ್ತದೆ. ಪುನೀತ್ ನಾನು ಸಿನಿಮಾ ಮಾಡುವುದಕ್ಕೆ ಬಹುಶಃ ಅಂತಹದ್ದೊಂದು ಸ್ಕ್ರಿಪ್ಟ್ ಈ ವರೆಗೂ ಸಿಕ್ಕಿರಲಿಲ್ಲ ಎನ್ನುತ್ತಾರೆ.

ಪುನೀತ್ ಪ್ರತಿ ಸಿನಿಮಾದಲ್ಲೂ ವಿಭಿನ್ನ ಪಾತ್ರಗಳನ್ನು ಆಯ್ಕೆ ಮಾಡಿಕೊಳ್ಳುತ್ತಾರೆ. ನಟ ಸಾರ್ವಭೌಮ ಚಿತ್ರದಲ್ಲಿ ಪುನೀತ್ ಹಿಂದೆಂದೂ ನಟಿಸಿರದ ವಿಭಿನ್ನ ಪಾತ್ರದಲ್ಲಿ ನಟಿಸಿದ್ದಾರೆ. ಈ ಚಿತ್ರದಲ್ಲಿ ಪುನೀತ್ ರಾಜ್ ಕುಮಾರ್ ನಿರ್ವಹಣೆ ಮಾಡಿರುವ ಪಾತ್ರದ ಮೇಲೆ ’ಆತ್ಮ’ ಬರಲಿದೆ ಎಂದು ರಾಕ್ ಲೈನ್ ಹೇಳಿದ್ದಾರೆ. 

ಫೆ.7 ರಂದು ಬಿಡುಗಡೆಯಾಗಲಿರುವ ಪುನೀತ್ ರಾಜ್ ಕುಮಾರ್ ನಟನೆಯ ನಟ ಸಾರ್ವಭೌಮ ಚಿತ್ರ, ವಿದೇಶಗಳಲ್ಲಿಯೂ ಬಿಡುಗಡೆಯಾಗುತ್ತಿದೆ. ವಿದೇಶಗಳಲ್ಲಿ ಚಿತ್ರ ಬಿಡುಗಡೆ ಜವಾಬ್ದಾರಿಯನ್ನು ಮೂವಿ ಮಾರ್ಟ್ ಕೈಗೆತ್ತಿಕೊಂಡಿದೆ.