ಟಗರು ಖ್ಯಾತಿಯ ಡಾಲಿ ಪಾತ್ರದಿಂದಾಗಿ ಹೆಚ್ಚು ಪ್ರಸಿದ್ಧಿಗೆ ಬಂದ ನಟ ಧನಂಜಯ್ ಮುಂದಿನ ಚಿತ್ರಕ್ಕೂ ಅದೇ ಶೀರ್ಷಿಕೆ ಇಡಲಾಗಿದೆ. ಇದರಲ್ಲಿ ಮತ್ತೆ ಬ್ಯಾಡ್ ಮ್ಯಾನ್ಸ್ ವರ್ಲ್ಡ್ ಆಗಿ ಧನಂಜಯ್ ಕಾಣಿಸಿಕೊಳ್ಳಲಿದ್ದಾರೆ.
ಟಗರು ಚಿತ್ರದಲ್ಲಿನ ಡಾಲಿ ಪಾತ್ರದ ಮೂಲಕ ಕನ್ನಡಿಗರ ಮನೆ, ಮನಗಳಲ್ಲಿ ನೆಲೆ ಕಂಡುಕೊಂಡಿರುವ ಧನಂಜಯ್ ಅಪಾರ ಅಭಿಮಾನಿಗಳನ್ನು ಸಂಪಾದಿಸಿದ್ದರು.
ಟಗರು ಚಿತ್ರದ ನಾಯಕ ಹ್ಯಾಟ್ರಿಕ್ ಹಿರೋ ಶಿವರಾಜ್ ಕುಮಾರ್ ಜೊತೆಗೆ ವಿಲನ್ ಆಗಿ ನಟಿಸಿದ ಧನಂಜಯ್ ಡಾಲಿ ಪಾತ್ರಕ್ಕೆ ಜೀವ ತುಂಬುವಲ್ಲಿ ಯಶಸ್ವಿಯಾಗಿದ್ದರು. ಹಿರೋ ರೀತಿಯಲ್ಲಿ ವಿಲನ್ ಗೂ ಪ್ರಾಮುಖ್ಯ ನೀಡುವ ಪಾತ್ರ ಡಾಲಿಯದ್ದಾಗಿತ್ತು.
ಈಗ ಇದೇ ಶೀರ್ಷಿಕೆಯಲ್ಲಿ ಧನಂಜಯ್ ಗಾಗಿ ಬಿಗ್ ಬಜೆಟ್ ಚಿತ್ರ ತಯಾರಾಗುತ್ತಿದೆ. ಗಣಪ ಎಂದೇ ಖ್ಯಾತರಾಗಿರುವ ಪ್ರಭು ಶ್ರೀನಿವಾಸ್ ನಿರ್ದೇಶನದ ಚಿತ್ರವನ್ನು ಯೋಗೇಶ್ ನಾರಾಯಣ್ ನಿರ್ಮಿಸುತ್ತಿದ್ದಾರೆ. ಎರಡನೇ ಸಲ ಚಿತ್ರದ ನಂತರ ಇದು ಅವರು ನಿರ್ಮಿಸುತ್ತಿರುವ ಎರಡನೇ ಚಿತ್ರವಾಗಿದೆ.
ಫೆಬ್ರವರಿ 12 ರಂದು ಡಾಲಿ ಶೀರ್ಷಿಕೆಯನ್ನು ಅಧಿಕೃತವಾಗಿ ಬಿಡುಗಡೆಯಾಗಿದೆ. ನಂತರ ಪ್ರಿ- ಪ್ರೊಡಕ್ಷನ್ ಕೆಲಸ ಆರಂಭವಾಗಲಿದೆ.ಸೂರಿ ನಿರ್ದೇಶನದ ಪಾಪ್ ಕಾರ್ನ್ ಮಂಕಿ ಟೈಗರ್ ಚಿತ್ರ ಪೂರ್ಣಗೊಂಡ ಬಳಿಕ ಈ ಚಿತ್ರದ ಚಿತ್ರೀಕರಣದಲ್ಲಿ ತೊಡಗಿಸಿಕೊಳ್ಳಲು ಧನಂಜಯ್ ಯೋಚಿಸಿದ್ದಾರೆ.