ಪವನ್ ಒಡೆಯರ್ ನಿರ್ದೇಶನದ ಗೂಗ್ಲಿ ಚಿತ್ರ ಕನ್ನಡ ಚಿತ್ರರಂಗದಲ್ಲಿ ವಿನೂತನ ಪ್ರಯೋಗಾತ್ಮಕ ಚಿತ್ರವಾಗಿತ್ತು. ಈಗ ಅದೇ ಟೈಟಲ್ ನ್ನು ಹೊತ್ತು ಮತ್ತೊಂದು ಚಿತ್ರ ಕನ್ನಡಿಗರೆದುರು ಬರಲು ಸಿದ್ಧವಾಗಿದೆ.

ಪವನ್ ಒಡೆಯರ್ ಗೆ ಸಹಾಯಕ ನಿರ್ದೇಶಕರಾಗಿದ್ದ ರಜಗುರು ಬಿ ಅವರು ಗೂಗ್ಲಿ-2 ಸಿನಿಮಾ ನಿರ್ದೇಶಿಸುತ್ತಿದ್ದು, ಹೆಸರಾಂತ ಸಂಗೀತಗಾರ ಜಿಕೆ ವೆಂಕಟೇಶ್ ಮೊಮ್ಮಗ ಪೃಥ್ವಿ ನಾಯಕನಟನಾಗಿ ಅಭಿನಯಿಸುತ್ತಿದ್ದಾನೆ.

2016 ರಲ್ಲಿ ನಾನು ಮತ್ತು ವರಲಕ್ಷ್ಮಿ ಚಿತ್ರದ ಮೂಲಕ ಸ್ಯಾಂಡಲ್ ವುಡ್ ಗೆ ಪರಿಚಯವಾಗಿದ್ದ ಪೃಥ್ವಿ ಅವರ ಎರಡನೇ ಸಿನಿಮಾ ಆಗಲಿರುವ ಗೂಗ್ಲಿ-2 ಚಿತ್ರೀಕರಾಣ ಏಪ್ರಿಲ್ ನಿಂದ ಪ್ರಾರಂಭವಾಗಲಿದೆ. 

ಸಿಟಿ ಎಕ್ಸ್ ಪ್ರೆಸ್ ಗೆ ಸಿನಿಮಾ ಬಗ್ಗೆ ಮಾಹಿತಿ ನೀಡಿರುವ  ನಿರ್ದೇಶಕ, ಈ ಸಿನಿಮಾ ಗೂಗ್ಲಿಯ ಮುಂದುವರೆದ ಭಾಗವಲ್ಲ, ಈ ಸಿನಿಮಾವನ್ನು ಗೂಗ್ಲಿಗೆ ಹೋಲಿಕೆ ಮಾಡುವುದಕ್ಕೂ ಸಾಧ್ಯವಿಲ್ಲ. ಹೊಂದಿಕೆಯಾಗದ ಜೋಡಿಗಳ ಪ್ರೇಮ ಕಥೆಯನ್ನು ಹೊಂದಿದೆ ಎಂದು ಹೇಳಿದ್ದಾರೆ.

ಮಂಜುನಾಥ್ ಗೂಗ್ಲಿ-2 ಸಿನಿಮಾ ನಿರ್ಮಾಣ ಮಾಡುತ್ತಿದ್ದು, ಅರುಣ್ ಸೋಮಸುಂದರಮ್ ಛಾಯಾಗ್ರಾಹಕರಾಗಿರಲಿದ್ದಾರೆ. ನಟಸಾರ್ವಭೌಮ ಚಿತ್ರದ ನಾಯಕಿ ಅನುಪಮ ಪರಮೇಶ್ವರನ್ ಅವರನ್ನು ನಾಯಕಿಯ ಪಾತ್ರದಲ್ಲಿ ನಟಿಸುವಂತೆ ಕೇಳಲಾಗಿದೆ. ಗೂಗ್ಲಿ-1 ರಲ್ಲಿ ನಾಯಕಿಯ ಪಾತ್ರದಲ್ಲಿದ್ದ ಕೃತಿ ಕರಬಂಧ ಅವರು ಗೂಗ್ಲಿ-2 ಚಿತ್ರದಲ್ಲಿ ವಿಶೇಷ ಪಾತ್ರ ವಹಿಸಲಿದ್ದಾರಂತೆ.