ಅಮ್ಮನ ಮನೆ ಚಿತ್ರದ ಮೂಲಕ ರಾಘವೇಂದ್ರ ರಾಜ್ ಕುಮಾರ್ ಮತ್ತೆ ಬೆಳ್ಳಿತೆರೆಗೆ ಮರಳಿದ್ದಾರೆ. ನಿಖಿಲ್ ಮಂಜು ನಿರ್ದೇಶನದ ಚಿತ್ರದ ಕಥೆ ಬರೆಯುವಾಗ ರಾಘವೇಂದ್ರ ರಾಜ್ ಕುಮಾರ್ ಅವರನ್ನು ಮನಸ್ಸಿನಲ್ಲಿಟ್ಟುಕೊಂಡೇ ಕಥೆ ಬರೆದಿದ್ದರಂತೆ.
ನನ್ನ ತಂದೆಗೆ ಪಕ್ಷವಾತವಾಗಿ ಅವರು ಪಟ್ಟ ಕಷ್ಟವನ್ನು ತೆರೆ ಮೇಲೆ ರಾಘಣ್ಣ ಮೂಲಕ ತೋರಿಸುತ್ತಿದ್ದೇನೆ. ಇದರಲ್ಲಿ ತಾಯಿ-ಮಗನ ನಡುವಿನ ಭಾವನಾತ್ಮಕ ದೃಶ್ಯಗಳು ಕೂಡ ಇವೆ ಎನ್ನುತ್ತಾರೆ ಅವರು.
ಚಿತ್ರದಲ್ಲಿ ಎರಡು ಪಾತ್ರಗಳು ಒಟ್ಟೊಟ್ಟಿಗೆ ಮುಖ್ಯವಾಗಿ ಸಾಗುತ್ತದೆ. ರಾಜೀವ ಎನ್ನುವ ಪಾತ್ರವನ್ನು ರಾಘಣ್ಣ ನಿಭಾಯಿಸಿದ್ದು ಅವರು ಪಿಟಿ ಟೀಚರ್. ಆ ಪಾತ್ರ ವೃತ್ತಿ ಮತ್ತು ಕೌಟುಂಬಿಕ ಜೀವನವನ್ನು ಹೇಗೆ ಸಮತೋಲನದಿಂದ ತೆಗೆದುಕೊಂಡು ಹೋಗುತ್ತದೆ ಎಂದು ತೋರಿಸಲಾಗಿದೆ. ಚಿತ್ರದ ಶೀರ್ಷಿಕೆಯನ್ನು ಹೇಳಿದಾಗ ರಾಘಣ್ಣ ಖುಷಿಪಟ್ಟು ನನ್ನನ್ನು ಬಿಗಿದಪ್ಪಿದರು ಎಂದರು ನಿರ್ದೇಶಕರು.