ತುಳು ಭಾಷೆಯ ಚಿತ್ರ 'ಬಸ್ರಾ ಅಂಡ್ ಅರೆ ಮರ್ಲೆ' ನಿರ್ಮಾಪಕ ಮುಕೇಶ್ ಹೆಗ್ಡೆ ಲುಂಗಿ ಚಿತ್ರದ ಮೂಲಕ ಸ್ಯಾಂಡಲ್ ವುಡ್ ಗೆ ಎಂಟ್ರಿ ಕೊಟ್ಟಿದ್ದಾರೆ. ಇದಕ್ಕೆ ಇಬ್ಬರು ನಿರ್ದೇಶಕರು ಅರ್ಜುನ್ ಲೂವಿಸ್ ಮತ್ತು ಅಕ್ಷಿತ್ ಶೆಟ್ಟಿ.
ಖಾರಾ ಎಂಟರ್ಟೈನ್ ಮೆಂಟ್ ಬ್ಯಾನರ್ ನಡಿ ನಿರ್ಮಾಣವಾಗುತ್ತಿರುವ ಚಿತ್ರದಲ್ಲಿ ದಕ್ಷಿಣ ಕನ್ನಡ ಕರಾವಳಿ ಭಾಗದ ಸೊಗಡು ಇರುತ್ತದೆ. ಕಳೆದ ವಾರ ಚಿತ್ರದ ಟ್ರೈಲರ್ ಬಿಡುಗಡೆಯಾಗಿತ್ತು.
ಕಾಮಿಡಿ, ಸ್ವಲ್ಪ ರೊಮಾನ್ಸ್ ಮತ್ತು ಯುವಕರಿಗೆ ಸಂದೇಶ ಸಾರುವ ವಿಷಯಗಳು ಚಿತ್ರದಲ್ಲಿರುತ್ತದೆ. ಮಂಗಳೂರು ಮೂಲದ ನಟ ಪ್ರಣವ್ ಹೆಗ್ಡೆ ಇದಕ್ಕೆ ನಾಯಕ. ಅಹಲ್ಯಾ ಸುರೇಶ್ ಮತ್ತು ರಾಧಿಕಾ ರಾವ್ ನಾಯಕಿಯರು. ಎಲ್ಲರೂ ಹೊಸಬರೇ. ಇನ್ನೂ ಅನೇಕ ಹೊಸ ಮುಖಗಳು ಚಿತ್ರದಲ್ಲಿರುತ್ತಾರೆ.
ಅರ್ಜುಲ್ ಲೂವಿಸ್ ಇದಕ್ಕೆ ನಿರ್ದೇಶನ ಮಾಡುವುದು ಮಾತ್ರವಲ್ಲದೆ ಚಿತ್ರಕಥೆ ಮತ್ತು ಸಂಭಾಷಣೆ ಬರೆದಿದ್ದಾರೆ. ಲುಂಗಿಗೆ ರಿಯೊ ಪಿ ಜಾನ್ ಛಾಯಾಗ್ರಹಣ ಮತ್ತು ಪ್ರಸಾದ್ ಕೆ ಶೆಟ್ಟಿಯವರ ಸಂಗೀತವಿದೆ.
ಅಕ್ಟೋಬರ್ 11ರಂದು ಚಿತ್ರ ತೆರೆಗೆ ಬರಲಿದೆ. ಜಯಣ್ಣ ಕಂಬೈನ್ಸ್ ಇದಕ್ಕೆ ವಿತರಕರು.