ಲಾಸ್ ಏಂಜಲೀಸ್: ಕ್ರಿಸ್ಟೋಫರ್ ನೋಲನ್ ನಿರ್ದೇಶನದ ಓಪನ್ಹೈಮರ್ ಸಿನಿಮಾದಲ್ಲಿನ ಉತ್ತಮ ನಟನೆಗಾಗಿ ನಟ ರಾಬರ್ಟ್ ಡೌನಿ ಜ್ಯೂನಿಯರ್ ಗೆ ಆಸ್ಕರ್ ಪ್ರಶಸ್ತಿ ಒಲಿದಿದೆ. ಮೊದಲ ಅಕಾಡೆಮಿ ಅವಾರ್ಡ್ ಗೆ ನಾಮನಿರ್ದೇಶನಗೊಂಡ 3 ದಶಕಗಳ ಬಳಿಕ ರಾಬರ್ಟ್ ಡೌನಿಗೆ ಮೊದಲ ಆಸ್ಕರ್ ಪ್ರಶಸ್ತಿ ಲಭಿಸಿದೆ.
ಓಪನ್ಹೈಮರ್ ಅಟಾಮಿಕ್ ಬಾಂಬ್ ಕುರಿತ ಸಿನಿಮಾ ಆಗಿದ್ದು, ಅಮೇರಿಕಾದ ಅಟಾಮಿಕ್ ಎನರ್ಜಿ ಕಮಿಷನ್ ಸದಸ್ಯರಾಗಿದ್ದ ಲೆವಿಸ್ ಸ್ಟ್ರಾಸ್ ಪಾತ್ರವನ್ನು ರಾಬರ್ಟ್ ಡೌನಿ ಜ್ಯೂನಿಯರ್ ನಿರ್ವಹಿಸಿದ್ದರು. ಇತ್ತೀಚಿನ ವರ್ಷಗಳಲ್ಲಿ ಇದು ಅವರ ಅತ್ಯುತ್ತಮ ನಟನೆ ಎಂಬ ಮೆಚ್ಚುಗೆ ವ್ಯಕ್ತವಾಗಿತ್ತು.
ಹಾಲಿವುಡ್ ನ ಬಹುಮುಖ ನಟ ಈ ಹಿಂದೆ 2 ಬಾರಿ ಆಸ್ಕರ್ ಗೆ ನಾಮನಿರ್ದೇಶನಗೊಂಡಿದ್ದರಾದರೂ ಇದು ಮೊದಲ ಆಸ್ಕರ್ ಪ್ರಶಸ್ತಿಯಾಗಿದೆ. 1993 ರಲ್ಲಿ ರಾಬರ್ಟ್ ಡೌನಿ ಮೊದಲ ಬಾರಿಗೆ ಚಾಪ್ಲಿನ್ ಸಿನಿಮಾದ ನಟನೆಗಾಗಿ ಆಸ್ಕರ್ ಪ್ರಶಸ್ತಿಗೆ ನಾಮನಿರ್ದೇಶನಗೊಂಡಿದ್ದರು. 2008 ರಲ್ಲಿ ಟ್ರಾಪಿಕ್ ಥಂಡರ್ ಸಿನಿಮಾದಲ್ಲಿ ಅತ್ಯುತ್ತಮ ಪೋಷಕ ನಟನೆಗಾಗಿ ಆಸ್ಕರ್ ಪ್ರಶಸ್ತಿಗೆ ನಾಮನಿರ್ದೇಶನಗೊಂಡಿದ್ದರು.