ಬೆಂಗಳೂರು: ಸಂಗೀತವು ಸಿನಿಮಾದ ಅವಿಭಾಜ್ಯ ಅಂಗ. ಅದು ಕನ್ನಡ ಸಿನಿಮಾಕ್ಕೂ ಸಹ. ಅನೇಕ ಚಲನಚಿತ್ರಗಳು ಹಾಡುಗಳಿಂದ ಪ್ರೇಕ್ಷಕರ ಮನಸೆಳೆದಿವೆ. ಇವು ಗೀತರಚನೆಕಾರರು, ಸಂಯೋಜಕರು ಮತ್ತು ಗಾಯಕರ ಸೃಜನಶೀಲ ಸಹಯೋಗವಾಗಿದೆ.

ಆರ್ಟಿಫಿಷಿಯಲ್ ಇಂಟೆಲಿಜೆನ್ಸ್(AI) ಇತ್ತೀಚಿನ ವರ್ಷಗಳಲ್ಲಿ ಎಲ್ಲಾ ಕ್ಷೇತ್ರಕ್ಕೂ ಕಾಲಿಡುವಂತೆ ಸಿನಿಮಾಗಳಲ್ಲಿ ಕೂಡ ಸಾಹಿತ್ಯ ಸಂಗೀತ ಕ್ಷೇತ್ರಕ್ಕೆ ಕಾಲಿಟ್ಟಿದೆ ಎಂದರೆ ನಂಬುತ್ತೀರಾ? ಹೌದು.

ಕಡಿಮೆ ಬಜೆಟ್ ನ ಚಿತ್ರಗಳಲ್ಲಿ ಇತ್ತೀಚೆಗೆ ಸಾಹಿತ್ಯ ಬರೆಯಲು ಎಐ ನೆರವು ಬಳಸಲಾಗುತ್ತಿದೆ. ನೀವು ಸಾಹಿತ್ಯವನ್ನು ಪಡೆದ ನಂತರ, ಅದನ್ನು ನಿರೂಪಿಸಲು ಅದು ಸಾವಿರಾರು ರಾಗಗಳನ್ನು ನೀಡುತ್ತದೆ. ನಿಮಗೆ ಪುರುಷ ಅಥವಾ ಮಹಿಳಾ ಗಾಯಕರು ಬೇಕೇ ಎಂದು ಸಹ ಅದು ಕೇಳುತ್ತದೆ. ನೀವು ಬಟನ್ ಒತ್ತಿದಾಗ, AI- ಆಧಾರಿತ ಗಾಯಕರು AI-ಚಾಲಿತ ಸಾಹಿತ್ಯದಿಂದ AI- ಸಂಯೋಜಿತ ಸಂಗೀತದ AI- ಆಧಾರಿತ ಹಾಡನ್ನು ಹಾಡಿ ತೋರಿಸುತ್ತದೆ ಎನ್ನುತ್ತಾರೆ ಕನ್ನಡದ ಪ್ರಸಿದ್ಧ ಸಂಗೀತ ಸಂಯೋಜಕ, ನಟ ಮತ್ತು ನಿರ್ದೇಶಕ ವಿ ಮನೋಹರ್.

ಇದು ಟ್ರೆಂಡ್ ಹೀಗೆಯೇ ಮುಂದುವರಿದರೆ, ಮುಂಬರುವ ದಿನಗಳಲ್ಲಿ ಗಾಯಕರು ಮತ್ತು ಸಂಗೀತಗಾರರಿಗೆ ಕಡಿಮೆ ಅಥವಾ ಯಾವುದೇ ಕೆಲಸವಿರುವುದಿಲ್ಲ. ಆದರೆ ಈ ಎಐ ಗಾಯನ, ಸಂಗೀತ ಯಶಸ್ವಿಯಾಗದಿರಬಹುದು. ಕೆಲವು ವರ್ಷಗಳ ಹಿಂದೆ, ಡಬ್ಬಿಂಗ್‌ಗೆ ಅವಕಾಶವಿತ್ತು. ಜನರು ತಾವು ಇಷ್ಟಪಡುವ ಯಾವುದೇ ಭಾಷೆಯಲ್ಲಿ ಚಲನಚಿತ್ರಗಳನ್ನು ವೀಕ್ಷಿಸಬಹುದು. ಆದರೆ ಮೂಲ ಭಾಷೆಯಲ್ಲಿ ಚಿತ್ರ ನೋಡಲು ಹೆಚ್ಚು ಇಷ್ಟವಾಗುವುದರಿಂದ ಡಬ್ಬಿಂಗ್ ಅನೇಕರಿಗೆ ಹಿಡಿಸುವುದಿಲ್ಲ ಎನ್ನುತ್ತಾರೆ ಮನೋಹರ್.

ಆರಂಭದಲ್ಲಿ ಊಹಿಸಲು ಸಾಧ್ಯವಾಗದಿರುವುದು ಕೆಲವು ವರ್ಷಗಳ ನಂತರ ಸ್ವೀಕಾರಾರ್ಹವಾಗಬಹುದು. ರಾಷ್ಟ್ರೀಯ ಪ್ರಶಸ್ತಿ ವಿಜೇತ ಚಲನಚಿತ್ರ ನಿರ್ಮಾಪಕ ಅವಿನಾಶ್ ಯು ಶೆಟ್ಟಿ, "ವರ್ಷಗಳ ಹಿಂದೆ ಅನಲಾಗ್‌ನಿಂದ ಡಿಜಿಟಲ್ ಚಲನಚಿತ್ರಗಳಿಗೆ ಬದಲಾಯಿಸುವುದನ್ನು ವಿರೋಧಿಸಿದವರು ಈಗ ಅದನ್ನು ಸ್ವೀಕರಿಸಿದ್ದಾರೆ. ಚಿತ್ರೋದ್ಯಮ ಈಗ AI ಸಾಮರ್ಥ್ಯದ ಕೇವಲ ಶೇಕಡಾ 10ರಷ್ಟು ಮಾತ್ರ ಬಳಸುತ್ತಿದೆ. ಅದನ್ನು ಹೆಚ್ಚಿಸಿದರೆ, ಅದು ಊಹಿಸಲಾಗದ ಕೆಲಸಗಳನ್ನು ಮಾಡಬಹುದು. ನಾವು ಈಗ ಕೆಟ್ಟದ್ದಾಗಿ ಪರಿಗಣಿಸುವುದು ಐದು ವರ್ಷಗಳ ನಂತರ ನಾವೇ ಅದನ್ನು ಸ್ವೀಕರಿಸಬಹುದು ಎನ್ನುತ್ತಾರೆ.

ಸಂಗಮೇಶ್ ಅವರ ಉದಾಹರಣೆಯನ್ನೇ ತೆಗೆದುಕೊಳ್ಳಿ, ಅವರು ಮೂರು ನಿಮಿಷಗಳ ವಿಡಿಯೊವನ್ನು ಕೇವಲ 4,500 ರೂಪಾಯಿಗಳಿಗೆ ರಚಿಸಿದ್ದಾರೆ. ಇದಕ್ಕೆ ಸುಮಾರು 15 ಲಕ್ಷ ರೂಪಾಯಿ ವೆಚ್ಚವಾಗುತ್ತಿತ್ತು. ಸಾಹಿತ್ಯದಿಂದ ಸಂಗೀತದವರೆಗೆ, ಅವರು ಎಲ್ಲವನ್ನೂ AI ಬಳಸಿ ಮಾಡಿದ್ದಾರೆ. ಅವರು ಖರ್ಚು ಮಾಡಿದ ಏಕೈಕ ಹಣ AI ಉಪಕರಣದ ಚಂದಾದಾರಿಕೆ ಶುಲ್ಕ. ವಿಡಿಯೊವನ್ನು ಕೇವಲ ಮೂರು ದಿನಗಳಲ್ಲಿ ಪೂರ್ಣಗೊಳಿಸಲಾಯಿತು. ಇಲ್ಲದಿದ್ದರೆ ರಚನೆಗೆ ವಾರಗಟ್ಟಲೆ ಹಿಡಿಯುತ್ತಿತ್ತು ಎಂದರು.

ಕನ್ನಡ ಚಲನಚಿತ್ರೋದ್ಯಮದಲ್ಲಿ 400 ಕ್ಕೂ ಹೆಚ್ಚು ಸ್ಟಂಟ್‌ಮೆನ್‌ಗಳು ಮತ್ತು 30 ಸ್ಟಂಟ್ ಮಾಸ್ಟರ್‌ಗಳಿದ್ದಾರೆ. ಇತ್ತೀಚಿನ ದಿನಗಳಲ್ಲಿ, ನೈಜ ಮತ್ತು AI ನಡುವೆ ವ್ಯತ್ಯಾಸವನ್ನು ಕಂಡುಹಿಡಿಯುವುದು ಕಷ್ಟಕರವಾಗಿದೆ. AI ಕಲಾವಿದರನ್ನು ಸೃಷ್ಟಿಸುತ್ತಿದೆ. ಯುದ್ಧ, ದೊಡ್ಡ ಹೋರಾಟಗಳು ಮತ್ತು ನೃತ್ಯದಂತಹ ದೃಶ್ಯಗಳನ್ನು ಕಡಿಮೆ ಸಂಖ್ಯೆಯ ಕಲಾವಿದರೊಂದಿಗೆ ಚಿತ್ರೀಕರಿಸಬಹುದು. ನಂತರ ದೃಶ್ಯ ಪರಿಣಾಮಗಳು ಮತ್ತು AI ಸಹಾಯದಿಂದ, ನೀವು ನಿಮ್ಮ ಮನಸ್ಸಿನಲ್ಲಿರುವುದನ್ನು ಸಾಧಿಸಬಹುದು ಎನ್ನುತ್ತಾರೆ ಸ್ಟಂಟ್ ಮಾಸ್ಟರ್ ಥ್ರಿಲ್ಲರ್ ಮಂಜು.

ಚಲನಚಿತ್ರ ನಿರ್ಮಾಣ ಸುಲಭ

ನಿರ್ದೇಶಕ ಪಿ ಶೇಷಾದ್ರಿ, 1890 ರ ದಶಕದಲ್ಲಿ ಕನ್ನಡ ನಿಘಂಟುಗಳನ್ನು ಮುದ್ರಿಸುವ ಹಿಂದಿನ ವ್ಯಕ್ತಿ ಫರ್ಡಿನ್ಯಾಂಡ್ ಕಿಟೆಲ್ ಅವರ ಕುರಿತು ಕನ್ನಡ ಚಲನಚಿತ್ರವನ್ನು ಮಾಡಲು ಉತ್ಸುಕರಾಗಿದ್ದಾರೆ. 1890 ರ ದಶಕದಂತೆಯೇ ಸೆಟ್‌ಗಳನ್ನು ಮರುಸೃಷ್ಟಿಸಿ ಜರ್ಮನಿ ಮತ್ತು ಇತರ ಸ್ಥಳಗಳಲ್ಲಿ ಚಿತ್ರೀಕರಣ ಮಾಡಿದ್ದರೆ, ನನ್ನ ಬಜೆಟ್ 100 ಕೋಟಿ ರೂಪಾಯಿಗಳನ್ನು ದಾಟುತ್ತಿತ್ತು. ಆದರೆ AI ಯೊಂದಿಗೆ, ನಾನು ಅದನ್ನು 1 ಕೋಟಿ ರೂಪಾಯಿಗಳಲ್ಲಿ ಮಾಡಬಹುದಾಗಿದೆ ಎನ್ನುತ್ತಾರೆ.

ಸೃಜನಶೀಲತೆ ಹಾಳಾಗುತ್ತದೆಯೇ?

ಆರ್ಟಿಫಿಷಿಯಲ್ ಇಂಟೆಲಿಜೆನ್ಸ್ ಮಾನವ ಸೃಜನಶೀಲತೆಯನ್ನು ಬದಲಾಯಿಸುವುದಿಲ್ಲ, ಆದರೆ ಅದು ಪ್ರಶ್ನೆಗಳನ್ನು ಹುಟ್ಟುಹಾಕಿದಾಗ ದೃಶ್ಯೀಕರಣವನ್ನು ಉತ್ತಮಗೊಳಿಸಲು ನಮಗೆ ಸಹಾಯ ಮಾಡುತ್ತದೆ ಎನ್ನುತ್ತಾರೆ ಹಿರಿಯ ನಿರ್ದೇಶಕ ಪಿ ಶೇಷಾದ್ರಿ.

ತಂತ್ರಜ್ಞಾನ ಬದಲಾವಣೆ ಕಲಿಯಬೇಕು, ಅದಕ್ಕೆ ಒಗ್ಗಿಕೊಳ್ಳಬೇಕು, ಬದಲಾವಣೆ ನಿರಂತರ

ಕೈಗಾರಿಕೀಕರಣದ ಆರಂಭದಲ್ಲಿ, ಯಂತ್ರಗಳು ಮನುಷ್ಯರನ್ನು ಬದಲಾಯಿಸಿತು. ಆದರೆ ಅದು ಹೊಸ ಉದ್ಯೋಗಗಳನ್ನು ಸೃಷ್ಟಿಸಿತು. ತಂತ್ರಜ್ಞಾನ ಬದಲಾದಂತೆ, ಅಭಿವೃದ್ಧಿಯಾದಂತೆ ನಾವು ಅದನ್ನು ಕಲಿಯಬೇಕು, ಬೆಳೆಯಬೇಕು, ಹೊಂದಿಕೊಳ್ಳಬೇಕು, ಆದಷ್ಟು ಬೇಗ ಹೊಸ ಹೊಸ ವಿಷಯಗಳನ್ನು ಕಲಿತುಕೊಂಡರೆ ನಮಗೇ ಉತ್ತಮ ಎನ್ನುತ್ತಾರೆ ಸ್ಯಾಂಡಲ್ ವುಡ್ ನ ಖ್ಯಾತ ನಟ, ನಿರ್ದೇಶಕ ರಮೇಶ್ ಅರವಿಂದ್.

ನಟ-ನಿರ್ದೇಶಕ ಡಿ ಪಿ ರಘುರಾಮ್, ಚಲನಚಿತ್ರಗಳನ್ನು ನಿರ್ಮಿಸಲು ಹಿಂದೆ ಹೆಚ್ಚಿನ ಶ್ರಮ, ಪರಿಶ್ರಮದ ಅಗತ್ಯಗಳಿದ್ದವು. ಜನರು ಚಿತ್ರಮಂದಿರಗಳಿಗೆ ಹೋಗಿ ಸಿನಿಮಾ ನೋಡುತ್ತಿದ್ದರು, ಅಂದಿನ ಚಿತ್ರಪ್ರೇಮಿಗಳ ಕ್ರೇಜ್ ವಿಭಿನ್ನವಾಗಿತ್ತು. ಈಗ, ಸಿನಿಮಾ ಜನರ ಬಳಿಗೆ ಹೋಗುತ್ತಿದೆ, ಆದರೆ ಕ್ರೇಜ್ ಕಾಣೆಯಾಗಿದೆ. AI ಈಗ ಸಂಗೀತದ ಮೇಲೆ ಪ್ರಭಾವ ಬೀರಿದೆ. ಆದರೆ ಅದು ನಮಗೆ ಸೇರಿದ್ದಲ್ಲ ಎಂದು ನನಗನಿಸುತ್ತದೆ. ನಾವು AIಯನ್ನು ಸುಧಾರಣೆಗೆ ಬಳಸಬೇಕೆ ಹೊರತು ಸಾಹಿತ್ಯ, ಸಂಗೀತ ರಚನೆಗಲ್ಲ ಎಂದು ಅಭಿಪ್ರಾಯ ವ್ಯಕ್ತಪಡಿಸಿದರು.

ಸಿನಿಮಾಗಳಲ್ಲಿ ಹಾಡಾಗಿರಲಿ, ಹೊಡೆದಾಟ ಅಥವಾ ಯುದ್ಧದ ದೃಶ್ಯಗಳಾಗಿರಲಿ, ನೂರಾರು ಕಿರಿಯ ಕಲಾವಿದರು ಕನ್ನಡ ಚಿತ್ರರಂಗದ ಭಾಗವಾಗಿದ್ದರು. ಹಲವರಿಗೆ, ಸಂಬಳಕ್ಕಿಂತ ಹೆಚ್ಚಾಗಿ, ಚಿತ್ರೀಕರಣವು ಅವರ ಮೂರು ಹೊತ್ತಿನ ಊಟದ ನೆಲೆಯಾಗಿದ್ದವು. ಡಾ. ರಾಜ್‌ಕುಮಾರ್, ವಿಷ್ಣುವರ್ಧನ್ ಅಥವಾ ಅಂಬರೀಶ್ ಆಗಿರಲಿ, ತಮ್ಮ ನೆಚ್ಚಿನ ತಾರೆಯರನ್ನು ನೋಡಿ ಅವರು ಸಂತೋಷಪಡುತ್ತಿದ್ದರು. ಈ ತಾರೆಯರು ಊಟದ ಸಮಯದಲ್ಲಿಯೂ ಎಲ್ಲರೊಂದಿಗೆ ಬೆರೆಯುತ್ತಿದ್ದರು. ಅವರ ನಡುವೆ ದೀರ್ಘಕಾಲ ಉಳಿಯುವ ಭಾವನಾತ್ಮಕ ಬಾಂಧವ್ಯವಿತ್ತು. ಆದರೆ ಈಗ, ತಂತ್ರಜ್ಞಾನ, ವಿಶೇಷವಾಗಿ AI, ಸೃಜನಶೀಲತೆಯನ್ನು ಒಂದೇ ಒಂದು ಕ್ಲಿಕ್ ನಲ್ಲಿ ಇಳಿಸುತ್ತದೆ.