ಗಣೇಶ್ ನಟನೆಯ ಬ್ಲಾಕ್ ಬಸ್ಟರ್ ಚಿತ್ರ 'ಮುಂಗಾರು ಮಳೆ' ಚಿತ್ರದ ಬರಹಗಾರರಾಗಿ ಚಿತ್ರರಂಗದಲ್ಲಿ ಗುರುತಿಸಿಕೊಂಡ ಪ್ರೀತಂ ಗುಬ್ಬಿ, 'ಹಾಗೆ ಸುಮ್ಮನೆ' ಚಿತ್ರದ ಮೂಲಕ ನಿರ್ದೇಶನಕ್ಕೆ ಮರಳಿದರು. 'ಮಳೆಯಲಿ ಜೊತೆಯಲಿ', 'ಜಾನಿ ಮೇರಾ ನಾಮ್ ಪ್ರೀತಿ ಮೇರಾ ಕಾಮ್', 'ಜಾನು', 'ದಿಲ್ ರಂಗೀಲಾ', 'ಬಾಕ್ಸರ್', 'ಜಾನಿ ಜಾನಿ ಯೆಸ್ ಪಾಪ', '99', 'ನಾನು ಮತ್ತು ವರಲಕ್ಷ್ಮಿ', 'ನಮ್ ದುನಿಯಾ ನಮ್ ಸ್ಟೈಲ್' ಮತ್ತು 'ಬಾನದಾರಿಯಲ್ಲಿ' ಚಿತ್ರಗಳಿಗೆ ಆ್ಯಕ್ಷನ್ ಕಟ್ ಹೇಳಿದರು. ಇದೀಗ ಸ್ವಲ್ಪ ವಿರಾಮದ ನಂತರ ಪ್ರೀತಂ ಇನ್ನೂ ಹೆಸರಿಡದ ಚಿತ್ರವೊಂದಕ್ಕೆ ನಿರ್ದೇಶನ ಮಾಡಲು ಸಜ್ಜಾಗಿದ್ದು, ಇಶಾ ಲಂಕೇಶ್ ಎಂಬ ಯುವ ಪ್ರತಿಭೆಯನ್ನು ಪರಿಚಯಿಸಿದ್ದಾರೆ.

ಇಶಾ ಅವರು ಖ್ಯಾತ ಪತ್ರಕರ್ತ ಮತ್ತು ಬರಹಗಾರ ಪಿ ಲಂಕೇಶ್ ಅವರ ಮೊಮ್ಮಗಳು ಮತ್ತು ಚಿತ್ರ ನಿರ್ಮಾಪಕಿ ಕವಿತಾ ಲಂಕೇಶ್ ಅವರ ಮಗಳು. 'ನಾನು ಸ್ವಲ್ಪ ಸಮಯದಿಂದ ನಟನೆ ಮತ್ತು ಪ್ರದರ್ಶನ ಕಲೆಯನ್ನು ಕಲಿಯುತ್ತಿದ್ದೇನೆ. ಯಾರಾದರೂ ನನ್ನನ್ನು ಸಿನಿಮಾ ಮಾಡಲು ಕೇಳಬೇಕೆಂದು ನಾನು ಎಂದಿಗೂ ಬಯಸಲಿಲ್ಲ. ನಾನು ಎಲ್ಲರಂತೆ ಆಡಿಷನ್ ಮಾಡುತ್ತಿದ್ದೇನೆ ಮತ್ತು ಅದೃಷ್ಟವಶಾತ್ ಈ ಯೋಜನೆ ಬಂತು. ನಾನು ಸ್ಕ್ರಿಪ್ಟ್‌ನೊಂದಿಗೆ ಕನೆಕ್ಟ್ ಆಗಿದ್ದೇನೆ ಮತ್ತು ಅದಕ್ಕಾಗಿಯೇ ನಾನು ಅದನ್ನು ಆರಿಸಿಕೊಂಡೆ' ಎಂದು ಇಶಾ ಹೇಳುತ್ತಾರೆ.

'ಬೆಳೆಯುವಾಗ, ನಾನು ಪರದೆ ಮೇಲೆ ಇರುವುದರ ಮೇಲೆ ಗಮನಹರಿಸಲಿಲ್ಲ. ನನ್ನನ್ನು ಆಕರ್ಷಿಸಿದ್ದು ಸೃಜನಶೀಲ ಪ್ರಕ್ರಿಯೆ. ನನ್ನ ತಾಯಿ ಚಿತ್ರ ನಿರ್ಮಾಪಕಿಯಾಗಿರುವುದರಿಂದ, ಕಲಾ ವಿಭಾಗದಲ್ಲಿ ಸಮಯ ಕಳೆಯುವುದನ್ನು ನಾನು ಇಷ್ಟಪಟ್ಟೆ. ನಾನು ಇನ್ನೂ ಚಿತ್ರ ಬಿಡಿಸುತ್ತೇನೆ ಮತ್ತು ಕ್ಯಾಮೆರಾದ ಹಿಂದೆ ನಡೆಯುವ ಎಲ್ಲವನ್ನೂ ನಾನು ಯಾವಾಗಲೂ ಆನಂದಿಸುತ್ತೇನೆ' ಎಂದು ಕಳೆದ ನಾಲ್ಕು ವರ್ಷಗಳಿಂದ ದೆಹಲಿಯ ಅಶೋಕ ಥಿಯೇಟರ್‌ನಲ್ಲಿ ಪ್ರದರ್ಶನ ಕಲೆಗಳಲ್ಲಿ ತರಬೇತಿ ಪಡೆಯುತ್ತಿರುವ ಇಶಾ ಹೇಳುತ್ತಾರೆ.

'ನನಗೆ ಕಥೆ ಹೇಳುವುದು ಇಷ್ಟ. ರಂಗಭೂಮಿ ನನಗೆ ಆ ಜಾಗವನ್ನು ನೀಡಿತು ಮತ್ತು ಸಿನಿಮಾ ಅದರ ನೈಸರ್ಗಿಕ ವಿಸ್ತರಣೆಯಂತೆ ಭಾಸವಾಗುತ್ತದೆ. ಪಾತ್ರವನ್ನು ರಚಿಸಲು ಮತ್ತು ಅದರ ಮೂಲಕ ನಾನು ಏನು ವ್ಯಕ್ತಪಡಿಸಬಹುದು ಎಂಬುದನ್ನು ನೋಡಲು ನಾನು ಉತ್ಸುಕಳಾಗಿದ್ದೇನೆ' ಎಂದರು.

ಕೆಲವು ವಾರಗಳ ಹಿಂದಷ್ಟೇ ಪದವಿ ಮುಗಿಸಿ ಬೆಂಗಳೂರಿಗೆ ಮರಳಿದ್ದ ಇಶಾ ಅವರಿಗೆ, ಪ್ರೀತಮ್ ಗುಬ್ಬಿ ಅವರ ಚಿತ್ರವೊಂದರ ಪಾತ್ರದ ಆಯ್ಕೆ ಪ್ರಕ್ರಿಯೆಯ (ಕಾಸ್ಟಿಂಗ್ ಕಾಲ್) ಬಗ್ಗೆ ಮಾಹಿತಿ ಸಿಕ್ಕಿತು ಮತ್ತು ಅವರು ಅದಕ್ಕೆ ಆಡಿಷನ್ ನೀಡಲು ನಿರ್ಧರಿಸಿದರು.

'ನಾನು ನನ್ನ ಆಡಿಷನ್ ವಿವರಗಳನ್ನು ಕಳುಹಿಸಿದೆ ಮತ್ತು ಪ್ರೀತಮ್ ಸರ್ ನನ್ನನ್ನು ಸಂಪರ್ಕಿಸಿದರು. ಅವರು ಕಥೆಯನ್ನು ವಿವರಿಸಿದಾಗ, ನಾನು ಈವರೆಗೆ ಕೇಳಿದ್ದ ಅಥವಾ ತಿಳಿದಿದ್ದ ಇತರ ಚಿತ್ರಗಳಿಗಿಂತ ಅದು ಭಿನ್ನವಾಗಿತ್ತು. ಆ ವಿಷಯವೇ ನನ್ನ ಮನಸ್ಸಿನಲ್ಲಿ ಉಳಿದುಕೊಂಡಿತು' ಎಂದು ತಿಳಿಸಿದರು.

ಚಲನಚಿತ್ರ ಕುಟುಂಬದ ಹಿನ್ನೆಲೆಯಿಂದ ಬಂದಿದ್ದರೂ, ತಮ್ಮ ಮೇಲೆ ಪ್ರಭಾವ ಬೀರುವ ಬದಲು ತಮಗೆ ಸ್ವಾವಲಂಬನೆಯನ್ನು ಬೆಳೆಸಿಕೊಳ್ಳಲು ತಾಯಿ ಯಾವಾಗಲೂ ಪ್ರೋತ್ಸಾಹಿಸಿದ್ದಾರೆ ಎಂದು ಇಶಾ ಹೇಳುತ್ತಾರೆ.

'ಆಡಿಷನ್‌ಗಳ ಸಮಯದಲ್ಲಿ ನಾನು ಯಾವಾಗಲೂ ಅಮ್ಮನ ಅಭಿಪ್ರಾಯವನ್ನು ಕೇಳುತ್ತೇನೆ. ಏಕೆಂದರೆ, ಅವರ ಸಲಹೆಗಳು ಬಹಳ ಮೌಲ್ಯಯುತವಾಗಿರುತ್ತವೆ. ಆದರೆ ಅವರು ಎಂದಿಗೂ ನನ್ನ ಪರವಾಗಿ ನಿರ್ಧಾರಗಳನ್ನು ತೆಗೆದುಕೊಂಡಿಲ್ಲ; ಬದಲಿಗೆ, ನನ್ನದೇ ಆದ ಹಾದಿಯನ್ನು ಕಂಡುಕೊಳ್ಳಲು ನನಗೆ ಯಾವಾಗಲೂ ಅವಕಾಶ ನೀಡಿದ್ದಾರೆ. ಇಷ್ಟು ವರ್ಷಗಳಲ್ಲಿ ಅವರನ್ನು ಗಮನಿಸಿ ನಾನು ಕಲಿತಿರುವ ವಿಷಯಗಳೆಲ್ಲವನ್ನೂ ನನ್ನ ವೃತ್ತಿಜೀವನದಲ್ಲಿ ಅಳವಡಿಸಿಕೊಳ್ಳುತ್ತೇನೆ' ಎಂದರು.

ನವಿಷಾ ಫಿಲ್ಮ್ಸ್ ಬ್ಯಾನರ್ ಅಡಿಯಲ್ಲಿ ಶಿವರಾಜ್ ಕನಗನಪಳ್ಳಿ ನಿರ್ಮಿಸುತ್ತಿರುವ ಈ ಶೀರ್ಷಿಕೆಯಿಲ್ಲದ ಚಿತ್ರದ ಚಿತ್ರೀಕರಣವು ಆಗಸ್ಟ್‌ನಲ್ಲಿ ಆರಂಭವಾಗುವ ನಿರೀಕ್ಷೆಯಿದೆ. ಸದ್ಯಕ್ಕೆ ಚಿತ್ರತಂಡವು ಕೇವಲ ನಾಯಕಿಯನ್ನು ಮಾತ್ರ ಪರಿಚಯಿಸಿದ್ದು, ಚಿತ್ರದ ಶೀರ್ಷಿಕೆ, ತಾರಾಗಣ ಮತ್ತು ಇತರ ವಿವರಗಳನ್ನು ಮುಂದಿನ ವಾರಗಳಲ್ಲಿ ಬಹಿರಂಗಪಡಿಸಲಾಗುವುದು.