ಕ್ಯಾನೆಸ್ : 79 ನೇ ಕೇನ್ಸ್ ಚಲನಚಿತ್ರೋತ್ಸವದ (Cannes Film Festival) ಸಮಾರೋಪ ಸಮಾರಂಭ ಫ್ರಾನ್ಸ್ನ ಕ್ಯಾನೆಸ್ನಲ್ಲಿರುವ ಪ್ಯಾಲೇಸ್ ಡೆಸ್ ಫೆಸ್ಟಿವಲ್ಸ್ನಲ್ಲಿ ನಿನ್ನೆ ಅದ್ಧೂರಿಯಾಗಿ ಜರುಗಿತು.
ಈ ವರ್ಣರಂಜಿತ ಸಮಾರಂಭದಲ್ಲಿ ಮಾಜಿ ವಿಶ್ವ ಸುಂದರಿ ಐಶ್ವರ್ಯಾ ರೈ ಬಚ್ಚನ್ ಕಾಣಿಸಿಕೊಂಡರು. ಅವರ 2ನೇ ರೆಡ್ ಕಾರ್ಪೆಟ್ ವಾಕಿಂಗ್ ಮೊದಲು ಧರಿಸಿದ್ದ ನೀಲಿ ಗೌನ್ಗೆ ಸಂಪೂರ್ಣ ವ್ಯತಿರಿಕ್ತವಾಗಿತ್ತು. ಈ ಬಾರಿ ಅವರು ಬಿಳಿ ಪ್ಯಾಂಟ್ಸೂಟ್ನಲ್ಲಿ ಹೆಜ್ಜೆ ಹಾಕಿದರು.
ಚೀನಾ ಮೂಲದ ಖ್ಯಾತ ಡಿಸೈನರ್ ಚೆನ್ನಿ ಚಾನ್ ಈ ವಿಶಿಷ್ಟವಾದ ಬಿಳಿ ಬಣ್ಣದ ಡಿಸೈನರ್ ಉಡುಪನ್ನು ವಿನ್ಯಾಸಗೊಳಿಸಿದ್ದರು. ಈ ಆಕರ್ಷಕ ಪವರ್ ಸೂಟ್ನಲ್ಲಿ ಬ್ಲೇಜರ್ ಮತ್ತು ಕಸೂತಿ ಕೆಲಸವಿರುವ ಟ್ರೌಸರ್ ಜೊತೆಗೆ ಸುಂದರವಾದ ಗರಿಗಳ ಕಂಪು ಇತ್ತು.
ಜೊತೆಗೆ ಆಕೆಯ ಕೋಟ್ನಲ್ಲಿ ಕಟಿಂಗ್ ಹಾಗೂ ಲ್ಯಾಪಲ್ ಡಿಸೈನ್ಗಳು ಅದ್ಭುತವಾಗಿ ಎದ್ದು ಕಾಣುತ್ತಿದ್ದವು. ಐಶ್ವರ್ಯಾ ಈ ಉಡುಪನ್ನು ಅತ್ಯಂತ ವಿಶ್ವಾಸದಿಂದ ಧರಿಸಿ, ತನ್ನ ಸುಂದರವಾದ ಮುಕ್ತವಾದ ಕೇಶವಿನ್ಯಾಸ ಮತ್ತು ಮಿನಿಮಲ್ ಮೇಕಪ್ನೊಂದಿಗೆ ರೆಡ್ ಕಾರ್ಪೆಟ್ನಲ್ಲಿ ಹೆಜ್ಜೆ ಇಟ್ಟಿದ್ದರು.
ಈ ಬಾರಿ ಐಶ್ವರ್ಯಾ ಕೇನ್ಸ್ನಲ್ಲಿ ಒಬ್ಬಂಟಿಯಾಗಿರಲಿಲ್ಲ. ಅವರ ಪಕ್ಕದಲ್ಲಿ ಅವರ ಮಗಳು ಆರಾಧ್ಯ ಇದ್ದರು. ಆರಾಧ್ಯ ಕೆಂಪು ರೇಷ್ಮೆ ಗೌನ್ನಲ್ಲಿ ಕೆಂಪು ಲಿಪ್ಸ್ಟಿಕ್ ಮತ್ತು ಸೈಡ್-ಪಾರ್ಟೆಡ್ ಕೇಶವಿನ್ಯಾಸದೊಂದಿಗೆ ಕಾಣಿಸಿಕೊಂಡರು.
ಚಿತ್ರರಂಗದಿಂದ ದೂರ ಉಳಿದಿರುವ ಐಶ್ವರ್ಯ ರೈ, ಕೊನೆಯದಾಗಿ ಪೊನ್ನಿಯಿನ್ ಸೆಲ್ವನ್: ಭಾಗ I (2022) ಮತ್ತು ಪೊನ್ನಿಯಿನ್ ಸೆಲ್ವನ್: ಭಾಗ II (2023) ನಲ್ಲಿ ಕಾಣಿಸಿಕೊಂಡರು. ಅಲ್ಲಿಂದಾಚೆಗೆ ಯಾವುದೇ ಸಿನಿಮಾದಲ್ಲಿ ಕಾಣಿಸಿಕೊಂಡಿಲ್ಲ. ಅವರ ಮುಂದಿನ ಚಿತ್ರಗಳ ಬಗ್ಗೆಯೂ ಯಾವುದೇ ಅಧಿಕೃತ ಮಾಹಿತಿ ತಿಳಿದುಬಂದಿಲ್ಲ.