ಬೆಂಗಳೂರು: ಕನ್ನಡದ ರಾಪರ್ ಚಂದನ್ ಶೆಟ್ಟಿ ಬಿಡುಗಡೆ ಮಾಡಿರುವ ಹೊಸ ಆಲ್ಬಂ ಸಾಂಗ್ 'ಮೈಮಾಟ' ಸೋಷಿಯಲ್ ಮೀಡಿಯಾದಲ್ಲಿ ಭಾರಿ ಸದ್ದು ಮಾಡುತ್ತಿರುವ ಬೆನ್ನಲ್ಲೇ, ಅವರ ಮಾಜಿ ಪತ್ನಿ ನಿವೇದಿತಾ ಗೌಡ ತಮ್ಮ ಇನ್‌ಸ್ಟಾಗ್ರಾಮ್ ಪೋಸ್ಟ್ ಮೂಲಕ ಪರೋಕ್ಷವಾಗಿ ಭರ್ಜರಿ ಟಾಂಗ್ ಕೊಟ್ಟಿದ್ದಾರೆ. ಈ ಬೆನ್ನಲ್ಲೇ, ನೆಟ್ಟಿಗರು ಮತ್ತು ಅಭಿಮಾನಿಗಳು ಇದನ್ನು ಚಂದನ್ ಶೆಟ್ಟಿ ಸಾಂಗ್‌ಗೆ ನಿವೇದಿತಾ ನೀಡಿದ ಪರೋಕ್ಷ ಟಾಂಗ್ ಎಂದೇ ವ್ಯಾಖ್ಯಾನಿಸುತ್ತಿದ್ದಾರೆ. ಆ ಕುರಿತ ವರದಿ ಇಲ್ಲಿದೆ:
ಚಂದನ್ ಶೆಟ್ಟಿ ಹಾಡಿನಲ್ಲೇನಿದೆ?
ಚಂದನ್ ಶೆಟ್ಟಿ ಇತ್ತೀಚೆಗೆ ಬಿಡುಗಡೆ ಮಾಡಿರುವ ಮೈಮಾಟ ಮ್ಯೂಸಿಕ್ ವಿಡಿಯೋದಲ್ಲಿ ಬ್ರೇಕಪ್ ನೋವು, ಪ್ರೀತಿಯಲ್ಲಿ ಆದ ವಂಚನೆ ಮತ್ತು ಅದರಿಂದ ಹೊರಬಂದು ಸಾಧಿಸುವ ಆತ್ಮವಿಶ್ವಾಸದ ಕಥೆಯನ್ನು ಒಳಗೊಂಡಿದೆ. ಈ ಹಾಡಿನಲ್ಲಿ "ಏನೇ ನಿನ್ನ ಮೈಮಾಟದಾಟ, ಇನ್ ಏಳು ಜನುಮಕ್ಕೂ ಕಲಿಸಿಯ ಪಾಠ...", "ನೀ ಹೋದಮೇಲೆ ನಾ ಸೋತಿಲ್ಲ, ಬದಲಾದೆ! ನನ್ನ ಪ್ರೀತಿ ಸೋತಿರಬಹುದು ಆದರೆ ನಾ ಸೋತಿಲ್ಲ..." ಎಂಬ ಸಾಲುಗಳನ್ನು ಕೇಳಿದ ನೆಟ್ಟಿಗರು, ಇದು ಚಂದನ್ ತಮ್ಮ ಮಾಜಿ ಪತ್ನಿ ನಿವೇದಿತಾ ಗೌಡ ಅವರನ್ನು ಗುರಿಯಾಗಿಸಿಕೊಂಡೇ ಬರೆದಿದ್ದಾರೆ ಎಂದು ಸಾಮಾಜಿಕ ಜಾಲತಾಣಗಳಲ್ಲಿ ಕಾಮೆಂಟ್ ಮಾಡಲು ಆರಂಭಿಸಿದರು. ಆದಾಗ್ಯೂ, ಇದು ಕೇವಲ ಕಾಲ್ಪನಿಕ ಕಥೆಯಾಗಿದ್ದು ವೈಯಕ್ತಿಕ ಜೀವನಕ್ಕೆ ಸಂಬಂಧಿಸಿಲ್ಲ ಎಂದು ಚಂದನ್ ಸಂದರ್ಶನವೊಂದರಲ್ಲಿ ಸ್ಪಷ್ಟಪಡಿಸಿದ್ದರು.
ಹಾಗಾದ್ರೆ, ನಿವೇದಿತಾ ಗೌಡ ಕೊಟ್ಟ ಟಾಂಗ್ ಏನು?
ಹಾಡು ಬಿಡುಗಡೆಯಾಗಿ ಸೋಷಿಯಲ್ ಮೀಡಿಯಾದಲ್ಲಿ ಕಮೆಂಟ್‌ಗಳು ಹೆಚ್ಚಾಗುತ್ತಿದ್ದಂತೆ, ನಿವೇದಿತಾ ಗೌಡ ತಮ್ಮ ಇನ್‌ಸ್ಟಾಗ್ರಾಮ್ ಖಾತೆಯಲ್ಲಿ ಇಂಗ್ಲಿಷ್‌ನಲ್ಲಿ ಒಂದು ಮಾರ್ಮಿಕವಾದ ಪೋಸ್ಟ್ ಹಾಕಿದ್ದಾರೆ. ಅದರಲ್ಲಿ, "ಅದ್ಭುತ ಸ್ನೇಹಿತರನ್ನು ಹೊಂದಿರುವ, ಮಹತ್ವಾಕಾಂಕ್ಷೆಯುಳ್ಳ ಹಾಗೂ ಪ್ರೀತಿಯಲ್ಲಿ ದುರದೃಷ್ಟವಂತೆಯಾಗಿರುವ ಹುಡುಗಿಯ ಜೀವನವು ರೊಮ್ಯಾಂಟಿಕ್ ಕಾಮಿಡಿಯಂತೆ ಇರುತ್ತದೆ ಎಂದು ಎಲ್ಲೋ ಓದಿದ್ದೆ. ಆದರೆ ನನ್ನ ಜೀವನ ಮಾತ್ರ ಸಂಪೂರ್ಣ ಹಾರರ್ ಸ್ಟೋರಿಯಾಗಿದೆ! ಸ್ಪಷ್ಟವಾಗಿ ಹೇಳುವುದಾದರೆ, ನನ್ನ ಗತಕಾಲದ ನೆನಪುಗಳು ನನ್ನನ್ನು ಒಂಟಿಯಾಗಿ ಬಿಡುತ್ತಲೇ ಇಲ್ಲ..." ಎಂದು ಬರೆದಿದ್ದಾರೆ.
ಹಳೆ ದೆವ್ವ ಎಂದು ಕರೆದಿದ್ದು ಯಾರಿಗೆ?
ನಿವೇದಿತಾ ಗೌಡ ತಮ್ಮ ಪೋಸ್ಟ್‌ನಲ್ಲಿ ತಮ್ಮ ಗತಕಾಲದ ನೆನಪುಗಳನ್ನು ದೆವ್ವಕ್ಕೆ ಹೋಲಿಸಿದ್ದಾರೆ. 2024ರಲ್ಲಿ ಪರಸ್ಪರ ಸಮ್ಮತಿಯಿಂದ ವಿಚ್ಛೇದನ ಪಡೆದ ನಂತರವೂ, ಹಳೆಯ ಮದುವೆ ಹಾಗೂ ಸಂಬಂಧದ ವಿಚಾರಗಳು, ಟ್ರೋಲ್‌ಗಳು ಮತ್ತು ಚಂದನ್ ಅವರ ಈ ಹೊಸ ಬ್ರೇಕಪ್ ಸಾಂಗ್‌ನಂತಹ ಘಟನೆಗಳು ಪದೇ ಪದೇ ಮುನ್ನೆಲೆಗೆ ಬಂದು ತಮ್ಮನ್ನು ಕಾಡುತ್ತಿರುವುದಕ್ಕೆ ಈ ಮೂಲಕ ಅವರು ಬೇಸರ ವ್ಯಕ್ತಪಡಿಸಿದ್ದಾರೆ. ಆದರೆ, ನೇರವಾಗಿ ಯಾರ ಹೆಸರನ್ನೂ ಉಲ್ಲೇಖಿಸದಿದ್ದರೂ, ಚಂದನ್ ಅವರ 'ಮೈಮಾಟ' ಸಾಂಗ್ ವೈರಲ್ ಆದ ತಕ್ಷಣವೇ ನಿವೇದಿತಾ ಈ ಪೋಸ್ಟ್ ಹಾಕಿರುವುದರಿಂದ, "ನನ್ನ ಗತಕಾಲ ಎಂಬ ದೆವ್ವ ನನ್ನನ್ನು ಸುಮ್ಮನೆ ಬಿಡುತ್ತಿಲ್ಲ" ಎಂದು ಅವರು ಚಂದನ್ ಶೆಟ್ಟಿ ಹಾಗೂ ಅವರ ಸುತ್ತಲಿನ ಹಳೆಯ ನೆನಪುಗಳಿಗೇ ಪರೋಕ್ಷವಾಗಿ ಟಾಂಗ್ ಕೊಟ್ಟಿದ್ದಾರೆ ಎಂದು ಅಭಿಮಾನಿಗಳು ಸಾಮಾಜಿಕ ಜಾಲತಾಣಗಳಲ್ಲಿ ತೀವ್ರವಾಗಿ ಚರ್ಚಿಸುತ್ತಿದ್ದಾರೆ.
ಒಟ್ಟಾರೆಯಾಗಿ, ವಿಚ್ಛೇದನದ ನಂತರವೂ ಚಂದನ್ ಶೆಟ್ಟಿ ಪದೇ ಪದೇ ತಮ್ಮ ಹಾಡುಗಳಲ್ಲಿ ಬ್ರೇಕಪ್ ಮತ್ತು ಮಾಜಿ ಪತ್ನಿಯ ವಿಚಾರವನ್ನು ತರುತ್ತಿರುವುದಕ್ಕೆ ನಿವೇದಿತಾ ಈ ಮೂಲಕ ಬೇಸರ ಹೊರಹಾಕಿದ್ದಾರೆ ಎನ್ನಲಾಗುತ್ತಿದೆ. ತಮ್ಮ ಹಳೆಯ ನೆನಪುಗಳು ತನ್ನನ್ನು ನೆಮ್ಮದಿಯಿಂದ ಇರಲು ಬಿಡುತ್ತಿಲ್ಲ ಎಂಬುದನ್ನು ಅವರು ಪರೋಕ್ಷವಾಗಿ ಸೂಚಿಸಿದ್ದಾರೆ.