ಓಹ್! ಅಂತೂ ಮಕ್ಕಳ ವಿಷಯ ಈಗ ಗೊತ್ತಾಗುತ್ತದೆ ಎಂದುಕೊಂಡ ದಶರಥ.

" ......ತಮಗೆ ತಿಳಿದಿರುವಂತೆ ನಮ್ಮ ವಂಶದ ಮೊದಲ ಅರಸು ನಿಮಿ. ಯಙ್ಞ ಮಧ್ಯದಲ್ಲಿ ಶಾಪ ಫಲವಾಗಿ ಆತ ನಿಶ್ಚೇಷ್ಟಿತನಾದಾಗ ಭೃಗು ಮಹರ್ಷಿಗಳ ಆಣತಿಯಂತೆ ಆತನ ತೊಡೆಯನ್ನು ಮಥಿಸಿದ್ದರಿಂದ ಮಗು ಒಂದು ಉದ್ಭವಿಸಿತು. ಇದು ಅತೀಂದ್ರಿಯ ಶಕ್ತಿ ಪ್ರಭಾವವೆಂದು ಆ ಮಗುವಿಗೆ ಮೂರು ಹೆಸರುಗಳನ್ನು ಇಟ್ಟರು. 

ಈ ಮಿಥಿಯ ರಾಜಧಾನಿಯೇ ಮಿಥಿಲಾ ಎಂದಾಯಿತು. ಎರಡು, ಮೂರು ಕಾರಣಗಳು ಸೇರಿ ವಿದೇಹಜನಕ ಎಂದು ಪ್ರಸಿದ್ಧವಾಯಿತು. ನಾನು ಈ ವಂಶದಲ್ಲಿನ ಈಗಿನ ರಾಜ. ಜನಕ ಎಂಬುದು ವಂಶಪಾರಂಪರ್ಯವಾಗಿ ಈ ಸಿಂಹಾಸನದಲ್ಲಿ ಕುಳಿತವರಿಗೆಲ್ಲ ಬರುವ ನಾಮಧೇಯ. 

ಇಷ್ಟೆಲ್ಲ ವಿವರಣೆಗಳನ್ನು ಕೊಡುತ್ತಿರುವ ಕಾರಣ ನಾನು ಕನ್ಯಾಪಿತೃ. " ಯಾವ ಕನ್ಯೆ?  ದಶರಥ ಮಹಾರಾಜನ ಮನಸ್ಸಲ್ಲಿ ಮೂಡಿದ ಪ್ರಶ್ನೆ.  ಇದ್ದಕ್ಕಿದ್ದಂತೆಯೇ ಪ್ರತ್ಯಕ್ಷಳಾದ ದಿವ್ಯ ಕುಮಾರಿಯೋ? ಸೀತೆಯೆಂಬಾಕೆ ದಿವ್ಯಸ್ತ್ರೀ ಎಂದೂ, ದೇವತೆಯೊರ್ವಳು ಆಕೆಯನ್ನು ಜನಕ ಮಹಾರಾಜನಿಗೆ ಅನುಗ್ರಹಿಸಿದಳೆಂದೂ ಜನಜನಿತವಾಗಿತ್ತಾಗಲೇ! ಹಾಗೇ ತನಗೂ ಮಕ್ಕಳು ಯಙ್ಞ ಪುರುಷನ ಅನುಗ್ರಹವಲ್ಲವೇ? ವಾಚನ ಮುಂದುವರಿಯಿತು. "ರಾಜಾ ದಶರಥ, ಲೋಕೋತ್ತರ ಸುಂದರಿಯಾದ ಸೀತೆಯನ್ನು ದೇವತೆಗಳು ನನಗೆ ಅನುಗ್ರಹಿಸಿರುವುದು ತಮಗೂ ಗೊತ್ತಿರಬೇಕು. ವಿಶೇಷ ಕಾರಣಗಳಿಂದ ನಮ್ಮ ವಂಶ ಮುಂದುವರೆದಿದ್ದರಿಂದಲೂ, ವಿಶೇಷವಾಗಿ ಲಭ್ಯವಾದ ಪುತ್ರಿಗೆ ಆ ಮೂಲದಿಂದಲೇ ಹೆಸರುಗಳೂ ಪ್ರಸಿದ್ಧವಾಯಿತು. ಸಿಕ್ಕ ಜಾಗದ ಕಾರಣದಿಂದ ಸೀತಾ ಎಂದೂ, ಜನಕನಾದ ನನ್ನ ಪುತ್ರಿಯಾದ್ದರಿಂದ ಜಾನಕಿ ಯೆಂದೂ, ಮಿಥಿಲಾ ನಗರ ಕಾರಣದಿಂದ ಮೈಥಿಲಿ ಎಂದೂ, ದೇಹಗಳ ಸಮ್ಮಿಲನವಲ್ಲದ ಕಾರಣದಿಂದ ವೈದೇಹಿಯೆಂದೂ  ಪ್ರಸಿದ್ಧಳಾಗಿದ್ದಾಳೆ. "  ಸೀತೆಯೆಂಬುದಷ್ಟೇ ನನಗೆ ಗೊತ್ತಿತ್ತು. ಉಳಿದ ಹೆಸರುಗಳೂ ಸಾರ್ಥಕವಾಗಿಯೇ ಇದೆ.  ಎಂದುಕೊಂಡ ರಾಜ. ಮುಂದುವರಿಯಿತು ಪತ್ರ. " ಕ್ಷಾತ್ರ ಧರ್ಮಾನುಗುಣವಾಗಿ ಆಕೆಯನ್ನು ವೀರ್ಯ ಶುಲ್ಕಳೆಂದು ನಾನು ಎಂದೋ ಪ್ರತಿಙ್ಞೆ ಮಾಡಿದ್ದೆ. ಇದನ್ನು ನೀವೂ ಕೇಳಿರಬೇಕು. " 

" ಇದ್ದಕ್ಕಿದ್ದಂತೆಯೇ ಬಂದ ನಿಮ್ಮ ಮಕ್ಕಳು ನನ್ನ ಮಗಳನ್ನು ಜಯಸಿಬಿಟ್ಟಿದ್ದಾರೆ . " 

 ಇಬ್ಬರೂ ಹೇಗೆ ಗೆದ್ದರು? - ದಶರಥನಿಗೆ ಆದ ಆಂದೋಲನ ಮುಂದಿನ ವಾಕ್ಯದಿಂದ ದೂರಾಯಿತು. " ಜನರ ಸಾಕ್ಷಿಯಲ್ಲಿ ಮಹಾ ವೀರನಾದ ರಾಮ ಮಹಾತ್ಮನಾಗಿಬಿಟ್ಟ. "

ಸಭಾ ಸದರೆಲ್ಲ ಎದ್ದು ನಿಂತು ಚಪ್ಪಾಳೆ ತಟ್ಟತೊಡಗಿದರು. ವಸಿಷ್ಠರಿಗೆ ಸುಳಿದು ಹೋಯಿತು, ವಿಶ್ವಮಿತ್ರರು ಬಂದಾಗ ಹೇಳಿದ ಮಾತು (ಕಲ್ಯಾಣಕಾರ್ಯವೊಂದನ್ನು ಮಾಡಿ ಹಿಮಾಲಯಕ್ಕೆ ಹೋಗಬೇಕೆಂದಿರುವೆ. - ವಿಶ್ವಮಿತ್ರ). ಕೌಸಲ್ಯೆಯ ಚೇಟಿ ಓಡಿದಳು ಒಡತಿಗೆ ವಿಷಯ ತಿಳಿಸಲು. ದಶರಥನಿಗೆ ಅಮಿತ ಆನಂದ.  ಮದುವೆಯ ವಿಷಯ ಮಾತನಾಡುತ್ತಿದ್ದಾಗ, ಮಧ್ಯೆ ಬಂದು ಕರೆದುಕೊಂಡು ಹೋಗಿದ್ದರು ವಿಶ್ವಮಿತ್ರರು. ಅಂದಿನಿಂದ ತನಗೆ ಪ್ರತಿ ಕ್ಷಣವೂ ಒದ್ದಾಟ. ಏನಾಯಿತೋ? ಯಙ್ಞರಕ್ಷಣೆಯೆಂದು ಹೇಳಿದ್ದರು, ಸುಬಾಹುವಿನ ಹೆಸರು ಬೇರೆ ಹೇಳಿದ್ದರು, ಅವರೊಡನೆ ಯುದ್ಧ ಎಂದಿದ್ದರು, ಅಂತಹ ರಾಕ್ಷಸನೊಡನೆ ತನ್ನ ಮಗ ಯುದ್ಧ ಮಾಡಬೇಕಂತೆ ಎಂದು ಬಹಳ ಹೆದರಿದ್ದೆ. ವಸಿಷ್ಠರು ಎಷ್ಟೇ ಸಮಾಧಾನ ಹೇಳಿದ್ದರೂ ನೆಮ್ಮದಿಯಾಗುತ್ತಿರಲಿಲ್ಲ. ಇದೀಗ ಈ ಮಧುವಾರ್ತೆ. ಯಙ್ಞ ಮುಗಿದಿರಬೇಕು, ರಾಮ ಗೆದ್ದಿರಬೇಕು, ಈಗ ಸೊಸೆಯನ್ನು ಗೆದ್ದಿದ್ದಾನೆ. - ಆಲೋಚನದಲ್ಲಿ ಮುಳುಗಿ ಹೋಗಿದ್ದ ದಶರಥನನ್ನು ಮುಂದಿನ ಮಾತು ಎಚ್ಚರಿಸಿತು. 

"ಮಹಾರಾಜ, ನನ್ನ ಪ್ರತಿಙ್ಞೆಯನ್ನು ನೆರವೇರಿಸಿ. ವಿವಾಹ ಮಾಡಿಕೊಳ್ಳಲು ಮಕ್ಕಳಿಗೆ ಅನುಮತಿ ಕೊಡಿ. ದಯವಿಟ್ಟು ವಸಿಷ್ಠ-ವಾಮದೇವರೊಟ್ಟಿಗೆ ಬನ್ನಿರಿ. ವಿವಾಹಕ್ಕೆ ನಿಮ್ಮ ವಂಶಾನುಗುಣವಾದ ಪುರೋಹಿತರನ್ನು ಕರೆತನ್ನಿರಿ. ಆದಷ್ಟು ಬೇಗ ಬನ್ನಿ, ಮಂಗಳ ಮಹೋತ್ಸವಕ್ಕೆ ಬನ್ನಿರಿ. ದರ್ಶನೀಯವಾದ ದಾಶರಥಿಗಳನ್ನು ನೋಡ ಬನ್ನಿರಿ."