ಸಾಮಾಜಿಕ ಜಾಲತಾಣಗಳು ಈಗಾಗಲೇ ಒಂದು ಆಘಾತಕಾರಿ ಗಾಳಿಸುದ್ದಿಗಳಿಂದ ತುಂಬಿಹೋಗಿದ್ದು, ಪಾಕಿಸ್ತಾನದ ಮಾಜಿ ಪ್ರಧಾನಿ ಇಮ್ರಾನ್ ಖಾನ್ ಜೈಲಿನಲ್ಲೇ ಸಾವನ್ನಪ್ಪಿದ್ದಾರೆಯೇ ಎಂಬ ಪ್ರಶ್ನೆಗಳು ಮೂಡಿವೆ. ಇಮ್ರಾನ್ ಖಾನ್ ತಲೆಗೆ ತೀವ್ರವಾದ ಗಾಯಗಳಾಗಿವೆ ಎಂದು ಸಂದೇಶಗಳು ಹರಿದಾಡಿದ್ದು, ವೀಡಿಯೋಗಳು ಮತ್ತು ಬರೆಹಗಳು ಕಾಳ್ಗಿಚ್ಚಿನಂತೆ ಹರಡಿವೆ. ಇದು ಸಾಲದೆಂಬಂತೆ, ಆಸ್ಪತ್ರೆಯಲ್ಲಿ ಪೋಸ್ಟ್ ಮಾರ್ಟಮ್ ನಡೆಸಿರುವ ನಕಲಿ ವರದಿಗಳೂ ಆನ್‌ಲೈನ್‌ನಲ್ಲಿ ಹರಿದಾಡಿವೆ. ಆದರೆ, ಒಂದು ಸತ್ಯ ವಿಚಾರವೆಂದರೆ, ಇಮ್ರಾನ್ ಖಾನ್ ಸಾವನ್ನಪ್ಪಿದ್ದಾರೆ ಎಂದು ಖಚಿತವಾಗಿ ಹೇಳಲು ಈಗಂತೂ ಯಾವುದೇ ಸ್ಪಷ್ಟ ದಾಖಲೆಗಳಿಲ್ಲ.

ಪಾಕಿಸ್ತಾನ ಸರ್ಕಾರವಂತೂ ಇಮ್ರಾನ್ ಖಾನ್ ಜೀವಂತವಿದ್ದಾರೆ, ಆರೋಗ್ಯವಾಗಿದ್ದಾರೆ ಎಂದು ಹೇಳುತ್ತಲೇ ಬಂದಿದೆ. ವೈದ್ಯರು ನಿರಂತರವಾಗಿ ಅವರ ಆರೋಗ್ಯವನ್ನು ಪರಿಶೀಲಿಸುತ್ತಿದ್ದಾರೆ ಎಂದು ಜೈಲಿನ ಅಧಿಕಾರಿಗಳು ಹೇಳಿದ್ದಾರೆ. ಇಷ್ಟಾದರೂ ಇಮ್ರಾನ್ ಖಾನ್ ಕುಟುಂಬ ಬೇರೆಯದೇ ಕಥೆ ಹೇಳುತ್ತಿದೆ. ಕುಟುಂಬಸ್ಥರು ನಮಗೆ ಹಲವು ವಾರಗಳಿಂದ ಇಮ್ರಾನ್ ಖಾನ್ ಭೇಟಿಗೆ ಅವಕಾಶ ನೀಡಿಲ್ಲ ಎನ್ನುತ್ತಿದ್ದಾರೆ. ಇಮ್ರಾನ್ ಪುತ್ರ ಕಾಸಿಮ್ ಖಾನ್ ಅಂತೂ ತನ್ನ ತಂದೆ ಜೀವಂತವಾಗಿರುವುದಕ್ಕೆ ಪುರಾವೆ ನೀಡಿ ಎಂದು ಬಹಿರಂಗವಾಗಿ ಆಗ್ರಹಿಸುತ್ತಿದ್ದಾರೆ. ಈ ವೈರುಧ್ಯಮಯ ಹೇಳಿಕೆಗಳು ಲಕ್ಷಾಂತರ ಇಮ್ರಾನ್ ಖಾನ್ ಬೆಂಬಲಿಗರಲ್ಲಿ ಗೊಂದಲ ಮತ್ತು ಭೀತಿ ಮೂಡಿಸಿವೆ.

ಆದರೆ ಈ ಗಾಳಿಸುದ್ದಿಗಳೇಕೆ ಇಷ್ಟು ವೇಗವಾಗಿ ಹಬ್ಬುತ್ತಿವೆ? ಇದಕ್ಕೆ ಉತ್ತರ ಸರಳ. ಇಮ್ರಾನ್ ಖಾನ್ ಸಾರ್ವಜನಿಕರ ಕಣ್ಣಿನಿಂದ ಮಾಯವಾಗಿದ್ದಾರೆ. ಕಳೆದ 845 ದಿನಗಳಿಂದ ಇಮ್ರಾನ್ ಖಾನ್ ಸೆರೆಯಲ್ಲಿದ್ದಾರೆ. ಇತ್ತೀಚೆಗೆ ಇಮ್ರಾನ್ ಕುಟುಂಬ ಅವರನ್ನು 'ಡೆತ್ ಸೆಲ್'ಗೆ (ಸಾವಿನ ಕೋಣೆ) ವರ್ಗಾಯಿಸಿದ್ದು, ಅವರಿಗೆ ಹೊರ ಜಗತ್ತಿನೊಡನೆ ಯಾವುದೇ ಸಂಪರ್ಕ ಇಲ್ಲದಂತೆ ಮಾಡಲಾಗಿದೆ ಎಂದು ಆರೋಪಿಸಿದೆ. ಇಮ್ರಾನ್ ಖಾನ್‌ಗೆ ಯಾವುದೇ ದೂರವಾಣಿ ಕರೆಯಾಗಲಿ, ಯಾರನ್ನೂ ಭೇಟಿಯಾಗುವುದಾಗಲಿ ಸಾಧ್ಯವಾಗುತ್ತಿಲ್ಲ. ಇದ್ದಕ್ಕಿದ್ದಂತೆ ಓರ್ವ ಪ್ರಭಾವಿ ವ್ಯಕ್ತಿ ಹೀಗೆ ಕಣ್ಮರೆಯಾದರೆ, ಜನರ ಮನಸ್ಸುಗಳು ಸಹಜವಾಗಿಯೇ ಏನೋ ಕೆಟ್ಟದ್ದಾಗಿದೆ ಎಂದೇ ಶಂಕಿಸುತ್ತವೆ.

ಸಾಮಾಜಿಕ ಜಾಲತಾಣಗಳಲ್ಲಿ ಕಾಸಿಮ್ ಖಾನ್ ನೀಡಿರುವ ಹೇಳಿಕೆ ದುಃಖಕರವಾಗಿತ್ತು. ಕಾಸಿಮ್ ತನ್ನ ತಂದೆ ಕಳೆದ ಆರು ವಾರಗಳನ್ನು ಸಂಪೂರ್ಣ ಏಕಾಂತ ಸೆರೆಯಲ್ಲಿ ಕಳೆದಿದ್ದಾರೆ ಎಂದಿದ್ದಾರೆ. ತಾನು ಮತ್ತು ತನ್ನ ಸಹೋದರ ತಂದೆಯೊಡನೆ ಒಂದೂ ಮಾತನಾಡಲು ಸಾಧ್ಯವಾಗಿಲ್ಲ ಎಂದಿದ್ದಾರೆ. ಇಮ್ರಾನ್ ವಿಚಾರದಲ್ಲಿ ಇಷ್ಟರಮಟ್ಟಿನ ರಹಸ್ಯದ ಅಗತ್ಯವೇನು ಎಂದು ಕಾಸಿಮ್ ಪ್ರಶ್ನಿಸಿದ್ದಾರೆ. ಒಂದು ವೇಳೆ ಎಲ್ಲವೂ ಸರಿಯಾಗಿದ್ದರೆ, ಕುಟುಂಬಕ್ಕೆ ಯಾಕೆ ಭೇಟಿಗೆ ಅವಕಾಶ ನೀಡುತ್ತಿಲ್ಲ? ಇಮ್ರಾನ್‌ರನ್ನು ಯಾಕೆ ಬಚ್ಚಿಡಲಾಗಿದೆ? ಇವೆಲ್ಲ ನ್ಯಾಯಯುತ ಪ್ರಶ್ನೆಗಳೇ ಆಗಿದ್ದು, ಇವಕ್ಕೆ ಆಡಳಿತ ವರ್ಗ ಸರಿಯಾದ ಉತ್ತರ ನೀಡಬೇಕು.

ಇಮ್ರಾನ್ ಸೋದರಿ ಅಲೀಮಾ ಖಾನುಮ್ ಸಹ ಮಾಧ್ಯಮಗಳೊಡನೆ ಇದೇ ರೀತಿಯ ಆತಂಕ ವ್ಯಕ್ತಪಡಿಸಿದ್ದರು. ಈ ಮೊದಲು ಕುಟುಂಬಸ್ಥರಿಗೆ ಅಡಿಯಾಲಾ ಜೈಲಿಗೆ ಭೇಟಿ ನೀಡಿ, ಇಮ್ರಾನ್ ಖಾನ್‌ರನ್ನು ನೋಡಲು ಅವಕಾಶವಿತ್ತು. ಆದರೆ, ಈಗ ಇಮ್ರಾನ್ ಭೇಟಿಯನ್ನು ನಿರ್ಬಂಧಿಸಲಾಗಿದೆ. ಕೆಲವು ಬಾರಿ ಓರ್ವ ಸಹೋದರಿಗೆ ಭೇಟಿಗೆ ಅವಕಾಶ ನೀಡಿದರೆ, ಕೆಲವೊಮ್ಮೆ ಅದೂ ಇಲ್ಲ. ನಾವು ಗಂಟೆಗಳ ಕಾಲ ಇಮ್ರಾನ್ ಭೇಟಿಗಾಗಿ ಜೈಲಿನ ಹೊರಗೆ ಕಾದು ಕುಳಿತರೂ, ಕೊನೆಗೆ ನಮ್ಮನ್ನು ಭೇಟಿಗೆ ಅವಕಾಶ ನೀಡದೆ ಅಲ್ಲಿಂದ ಕಳುಹಿಸಲಾಗುತ್ತದೆ ಎಂದು ಅಲೀಮಾ ಹೇಳಿದ್ದಾರೆ. ಏಕಾಂತ ಸೆರೆವಾಸವನ್ನು ಗರಿಷ್ಠ ನಾಲ್ಕು ದಿನಗಳಿಗೆ ಮಾತ್ರ ಪಾಕಿಸ್ತಾನಿ ಜೈಲಿನ ನಿಯಮಗಳು ಅನುಮತಿಸಿದರೂ, ಇಮ್ರಾನ್ ಖಾ‌ನ್ ಈ ಹಿಂದೆ ಮೂರು ವಾರಗಳ ಕಾಲ ವಿದ್ಯುತ್ ಆಗಲಿ, ಓದಲಿ ಪುಸ್ತಕಗಳಾಗಲಿ ಇಲ್ಲದೆ ಏಕಾಂತದಲ್ಲಿ ಕಳೆದಿದ್ದರು ಎಂದು ಅವರು ಆರೋಪಿಸಿದ್ದಾರೆ.

ಇಮ್ರಾನ್ ಖಾನ್ ನಾಲ್ವರು ಸಹೋದರಿಯನ್ನು ಹೊಂದಿದ್ದು, ರುಬೀನಾ, ಅಲೀಮಾ, ಉಜ಼್ಮಾ ಮತ್ತು ರಾಣಿ ಈ ನಾಲ್ವರೂ ಸುಶಿಕ್ಷಿತರು ಮತ್ತು ಸಾಧಕಿಯರೂ ಆಗಿದ್ದಾರೆ. ಇಮ್ರಾನ್ ಮಕ್ಕಳಾದ ಸುಲೈಮಾನ್ ಮತ್ತು ಕಾಸಿಂ ತಮ್ಮ ತಾಯಿ, ಅಂದರೆ ಇಮ್ರಾನ್ ಮೊದಲ ಪತ್ನಿ ಜೆಮಿಮಾ ಗೋಲ್ಡ್‌ಸ್ಮಿತ್ ಜೊತೆ ಯುಕೆಯಲ್ಲಿ ನೆಲೆಸಿದ್ದಾರೆ. ಬಳಿಕ ಇಮ್ರಾನ್ ಕೆಲಕಾಲ ಪತ್ರಕರ್ತೆ ರೆಹಾಮ್ ಖಾನ್ ಜೊತೆ ವಿವಾಹವಾಗಿದ್ದರು. ಈಗ ಇಮ್ರಾನ್ ಮೂರನೇ ಪತ್ನಿ ಬುಶ್ರಾ ಬೀಬಿ ಸಹ ಕಾನೂನು ಮೊಕದ್ದಮೆಗಳನ್ನು ಎದುರಿಸುತ್ತಾ ಜೈಲಿನಲ್ಲಿದ್ದಾರೆ. ಕುಟುಂಬ ವರ್ಗದವರು ಈಗ ಇಮ್ತಾನ್ ಕುರಿತು ಆತಂಕ ಮತ್ತು ಹತಾಶೆ ಹೊಂದಿದ್ದಾರೆ.

ಪಿಟಿಐ ಮುಖಂಡ ಜು಼ಲ್ಫಿ ಬುಖಾರಿ ಒಂದು ಮುಖ್ಯ ವಿಚಾರವನ್ನು ಪ್ರಸ್ತಾಪಿಸಿದ್ದಾರೆ. ಇಮ್ರಾನ್ ಖಾನ್ ಸಾವಿನ ಕುರಿತ ಗಾಳಿ ಸುದ್ದಿಯನ್ನು ನಮ್ಮ ಪಕ್ಷ ನಂಬುವುದಿಲ್ಲ. ಆದರೆ, ಇಮ್ರಾನ್ ಖಾನ್ ರಹಸ್ಯಮಯ ಏಕಾಂತದ ಕಾರಣದಿಂದಲೇ ಈ ಗಾಳಿಸುದ್ದಿಗಳು ಸೃಷ್ಟಿಯಾಗಿವೆ ಎಂದು ಅವರು ಅಭಿಪ್ರಾಯ ಪಟ್ಟಿದ್ದಾರೆ. ಅವರು ಒಂದು ಸರಳವಾದ ಪ್ರಶ್ನೆಯನ್ನು ಕೇಳಿದ್ದಾರೆ: ಒಂದು ವೇಳೆ ಸರ್ಕಾರಕ್ಕೆ ಈ ಗಾಳಿ ಸುದ್ದಿಯನ್ನು ನಿಲ್ಲಿಸುವ ಉದ್ದೇಶವಿದ್ದರೆ, ಯಾಕೆ ಕುಟುಂಬಸ್ಥರಿಗೆ ಇಮ್ರಾನ್ ಭೇಟಿಗೆ ಅವಕಾಶ ನೀಡಬಾರದು? ಒಂದು ಬಾರಿ ಇಮ್ರಾನ್‌ರನ್ನು ಕುಟುಂಬ ಸದಸ್ಯರು ಭೇಟಿಯಾದರೆ, ಇವೆಲ್ಲ ಗಾಳಿ ಸುದ್ದಿಗಳೂ ಕೊನೆಯಾಗುತ್ತವೆ. ಆದರೆ, ಇದರ ಬದಲಿಗೆ, ಅಧಿಕಾರ ವರ್ಗ ಸಂಪೂರ್ಣವಾಗಿ ಮೌನವಾಗುಳಿದು, ಸಮಸ್ಯೆಯನ್ನು ಇನ್ನಷ್ಟು ಬಿಗಡಾಯಿಸುವಂತೆ ಮಾಡುತ್ತಿದೆ.

ಈ ವಿವಾದದ ಸಮಯವೂ ಅನುಮಾನಾಸ್ಪದವಾಗಿದೆ. ಪಾಕಿಸ್ತಾನ ಸರ್ಕಾರ ಸೇನಾ ಮುಖ್ಯಸ್ಥರಿಗೆ ಹೆಚ್ಚಿನ ಅಧಿಕಾರ ನೀಡುವ ಸಾಂವಿಧಾನಿಕ ಬದಲಾವಣೆಗಳನ್ನು ತರಲು ಪ್ರಯತ್ನಿಸಿದ ಸಮಯದಲ್ಲೇ ಇಮ್ರಾನ್ ಖಾನ್‌ರನ್ನು ಏಕಾಂತ ಸೆರೆವಾಸಕ್ಕೆ ತಳ್ಳಲಾಯಿತು. ಈ ಬದಲಾವಣೆಗಳ ವಿರುದ್ಧ ಇಮ್ರಾನ್ ಧ್ವನಿ ಎತ್ತದಂತೆ ಮಾಡಲು, ಜನರನ್ನು ಸಂಘಟಿಸದಂತೆ ಮಾಡಲು ಈ ಕ್ರಮ ಕೈಗೊಳ್ಳಲಾಗಿದೆ ಎಂದು ಹಲವರು ಅಭಿಪ್ರಾಯ ಪಡುತ್ತಾರೆ. ಇದು ನಿಜವೇ ಆಗಿದ್ದರೂ, ಅಲ್ಲದಿದ್ದರೂ, ಈ ರಹಸ್ಯಮಯ ಬೆಳವಣಿಗೆ ಮಾತ್ರ ಗಂಭೀರವಾದ ಸಂಶಯಗಳಿಗೆ ಹಾದಿ ಮಾಡಿಕೊಟ್ಟಿದೆ.

ಪಾಕಿಸ್ತಾನ ಸರ್ಕಾರಿ ಸಲಹೆಗಾರ ರಾಣಾ ಸನಾವುಲ್ಲಾ ಖಾನ್ ಈ ಗಾಳಿಸುದ್ದಿಗಳನ್ನು ಬಲವಾಗಿ ತಳ್ಳಿಹಾಕಿದ್ದಾರೆ. ಇಮ್ರಾನ್ ಸಂಪೂರ್ಣ ಆರೋಗ್ಯದಿಂದಿದ್ದು, ವೈದ್ಯರು ಅವರ ಆರೋಗ್ಯದ ಮೇಲೆ ನಿಗಾ ಇರಿಸಿದ್ದಾರೆ ಎಂದಿದ್ದಾರೆ. ಜೈಲಿನ ಅಧಿಕಾರಿಗಳೂ ಇಮ್ರಾನ್ ಖಾನ್ ಅವರನ್ನು ಸರಿಯಾಗಿ ನೋಡಿಕೊಳ್ಳಲಾಗುತ್ತಿಲ್ಲ ಎಂಬ ಆರೋಪಗಳನ್ನು ನಿರಾಕರಿಸಿದ್ದಾರೆ. ಆದರೆ, ಅಪಾರ ಅನುಮಾನ ಹೊಂದಿರುವ ಇಮ್ರಾನ್ ಬೆಂಬಲಿಗರನ್ನು ಈ ಮಾತುಗಳಿಂದ ಸಮಾಧಾನಪಡಿಸಲು ಸಾಧ್ಯವಿಲ್ಲ. ಇಂದಿನ ಜಗತ್ತಿನಲ್ಲಿ ಜನರಿಗೆ ನಂಬಿಕಾರ್ಹ ಸಾಕ್ಷಿ ಬೇಕಾಗುತ್ತದೆ. ಇದಕ್ಕಾಗಿ ಅವರಿಗೆ ಇಮ್ರಾನ್ ಖಾನ್ ಅವರ ಇತ್ತೀಚಿನ ಫೋಟೋಗಳಾಗಲಿ, ವೀಡಿಯೋ ಕರೆ ಅಥವಾ ನೇರ ಭೇಟಿಗೆ ಅವಕಾಶ ನೀಡಬೇಕಾಗುತ್ತದೆ. ಇಂತಹ ಸಾಕ್ಷಿಗಳ ಹೊರತಾಗಿ, ನಂಬಿಕೆ ಮೂಡಲು ಸಾಧ್ಯವಿಲ್ಲ.

ಸದ್ಯದ ಪರಿಸ್ಥಿತಿ ಮಾನವ ಹಕ್ಕುಗಳು ಮತ್ತು ಪಾರದರ್ಶಕತೆಯ ದೊಡ್ಡ ಸಮಸ್ಯೆಯನ್ನು ತೋರಿಸುತ್ತಿದೆ. ವ್ಯಕ್ತಿಯ ಅಪರಾಧ ಅಥವಾ ರಾಜಕೀಯ ಸ್ಥಾನಮಾನ ಏನೇ ಆಗಿರಲಿ, ಅವರನ್ನು ಅಧಿಕಾರಿಗಳು ವಿಪರೀತವಾದ ಏಕಾಂತ ಶಿಕ್ಷೆಗೆ ಗುರಿಪಡಿಸಿದರೆ, ಅದು ಅನುಮಾನಕ್ಕೆ ಎಡೆ ಮಾಡಿಕೊಡುತ್ತದೆ. ಅಂತಾರಾಷ್ಟ್ರೀಯ ಮಾನವ ಹಕ್ಕು ಸಂಸ್ಥೆಗಳು ಈಗಾಗಲೇ ಪಾಕಿಸ್ತಾನದಲ್ಲಿ ರಾಜಕೀಯ ಖೈದಿಗಳನ್ನು ನಡೆಸಿಕೊಳ್ಳುವ ಕುರಿತು ಪ್ರಶ್ನೆ ಮಾಡುತ್ತಿವೆ. ಕಾಸಿಮ್ ಖಾನ್ ಈಗಾಗಲೇ ಅಂತಾರಾಷ್ಟ್ರೀಯ ಸರ್ಕಾರಗಳು ಮಧ್ಯಪ್ರವೇಶಿಸಿ, ತನ್ನ ತಂದೆಯ ಸುರಕ್ಷತೆ ಖಾತ್ರಿಪಡಿಸಬೇಕು ಎಂದು ಆಗ್ರಹಿಸಿದ್ದಾರೆ.

ಆದರೆ ಇಮ್ರಾನ್ ಖಾನ್ ನಿಜಕ್ಕೂ ಸಾವನ್ನಪ್ಪಿದ್ದಾರೆಯೇ? ಖಂಡಿತಾ ಅಂತಹ ಸಾಧ್ಯತೆಗಳು ಸಾಧ್ಯತೆಗಳಿಲ್ಲ. ಸರ್ಕಾರ ಇಮ್ರಾನ್ ಸಾವಿಗೀಡಾಗಿಲ್ಲ ಎಂದು ಸರ್ಕಾರ ಹೇಳುತ್ತಿದ್ದು, ಸಾವಿಗೀಡಾಗಿದ್ದಾರೆ ಎನ್ನುವುದನ್ನು ಬೆಂಬಲಿಸಲು ಯಾವುದೇ ನಂಬಿಕಾರ್ಹ ಪುರಾವೆಗಳಿಲ್ಲ. ಆದರೆ ನಿಜವಾದ ಹಗರಣ ಎಂದರೆ ಇಮ್ರಾನ್ ಸಾವಿನ ಕುರಿತ ಗಾಳಿಸುದ್ದಿಗಳಲ್ಲ. ಬದಲಿಗೆ, ಇಂತಹ ಗಾಳಿಸುದ್ದಿಗಳನ್ನು ಹಬ್ಬಲು ಅವಕಾಶ ಮಾಡಿಕೊಟ್ಟ ಪರಿಸ್ಥಿತಿ. 73 ವರ್ಷ ವಯಸ್ಸಿನ, ಮಾಜಿ ಪ್ರಧಾನ ಮಂತ್ರಿಯನ್ನು ಅವರ ಕುಟುಂಬದಿಂದ ಯಾವುದೇ ವಿವರಣೆ ನೀಡದೆ ದೂರ ಇಡುತ್ತಾರೆ ಎಂದರೆ ಖಂಡಿತವಾಗಿಯೂ ಏನೋ ಸಮಸ್ಯೆ ಇದೆ.

ಪ್ರಜಾಪ್ರಭುತ್ವ ಪಾರದರ್ಶಕತೆಯಲ್ಲಿ ಬೆಳೆಯುತ್ತದೆ. ಅತ್ಯಂತ ಪ್ರಸಿದ್ಧರಾದ, ರಾಜಕೀಯ ಖೈದಿಗಳೂ ಸೇರಿದಂತೆ, ಎಲ್ಲ ಖೈದಿಗಳಿಗೂ ಕನಿಷ್ಠ ಮೂಲಭೂತ ಹಕ್ಕುಗಳನ್ನು ನೀಡಲೇಬೇಕು. ಪಾಕಿಸ್ತಾನಿ ಅಧಿಕಾರಿಗಳು ತಕ್ಷಣವೇ ಕುಟುಂಬಸ್ಥರಿಗೆ ಇಮ್ರಾನ್ ಖಾನ್‌ರನ್ನು ಭೇಟಿಯಾಗಲು ಅವಕಾಶ ಮಾಡಿಕೊಡಬೇಕು. ಇಮ್ರಾನ್ ಖಾನ್ ಆರೋಗ್ಯವಾಗಿದ್ದಾರೆ ಎನ್ನುವುದಕ್ಕೆ ಸೂಕ್ತ ಪುರಾವೆಗಳನ್ನು ಒದಗಿಸಬೇಕು. ಅದು ಆಗುವ ತನಕ, ಇಂತಹ ಗಾಳಿಸುದ್ದಿಗಳು ಹಬ್ಬುತ್ತಲೇ ಇರುತ್ತವೆ, ಸರ್ಕಾರಿ ಸಂಸ್ಥೆಗಳ ಕುರಿತ ನಂಬಿಕೆ ಕುಸಿಯುತ್ತಲೇ ಹೋಗುತ್ತದೆ. ಇದರಿಂದ ಜೈಲಿನ ನಾಲ್ಕು ಗೋಡೆಗಳ ನಡುವೆ ನಿಜಕ್ಕೂ ಏನಾಗುತ್ತಿದೆ ಎಂಬ ಪ್ರಶ್ನೆಗಳು ಮೂಡುತ್ತಿರುತ್ತವೆ.

ಇಷ್ಟು ಸರಳವಾದ ಪ್ರಶ್ನೆಗೆ ಉತ್ತರವನ್ನು ಇಷ್ಟು ಸಂಕೀರ್ಣವಾಗಿಸುವ ಅಗತ್ಯವಿಲ್ಲ. ಇಮ್ರಾನ್ ಖಾನ್‌ರನ್ನು ತೋರಿಸಿ. ಕುಟುಂಬಸ್ಥರಿಗೆ ಅವರನ್ನು ಭೇಟಿಯಾಗಲು ಅವಕಾಶ ಮಾಡಿಕೊಡಿ. ವಿವಾದವನ್ನು ಅಲ್ಲಿಗೇ ಕೊನೆಗೊಳಿಸಿ. ಆದರೆ, ಇಷ್ಟು ಸರಳವಾಗಿ ಮಾಡಬಹುದಾದ್ದನ್ನು ಪಾಕಿಸ್ತಾನದ ಆಡಳಿತ ಸಂಕೀರ್ಣಗೊಳಿಸುತ್ತಿದೆ.

ಗಿರೀಶ್ ಲಿಂಗಣ್ಣ ಅವರು ವಿಜ್ಞಾನ ಬರಹಗಾರ, ರಕ್ಷಣೆ, ಏರೋಸ್ಪೇಸ್, ಮತ್ತು ರಾಜಕೀಯ ವಿಶ್ಲೇಷಕರಾಗಿದ್ದು, ಬೆಂಗಳೂರಿನಲ್ಲಿ ನೆಲೆಸಿದ್ದಾರೆ. ಅವರು ಜರ್ಮನಿಯ ಎಡಿಡಿ ಇಂಜಿನಿಯರಿಂಗ್ ಜಿಎಂಬಿಎಚ್ ಸಂಸ್ಥೆಯ ಅಂಗಸಂಸ್ಥೆಯಾದ ಎಡಿಡಿ ಇಂಜಿನಿಯರಿಂಗ್ ಕಾಂಪೊನೆಂಟ್ಸ್ ಇಂಡಿಯಾ ಪ್ರೈವೇಟ್ ಲಿಮಿಟೆಡ್ ಸಂಸ್ಥೆಯ ನಿರ್ದೇಶಕರಾಗಿದ್ದಾರೆ.

ಇಮೇಲ್: girishlinganna@gmail.com