ಫ್ಲೋರಿಡಾ: ವೆಸ್ಟ್ ಇಂಡೀಸ್ ವಿರುದ್ಧ ಅಮೆರಿಕದ ಫ್ಲೋರಿಡಾದಲ್ಲಿ ನಡೆದ ಮೊದಲ ಟಿ20 ಪಂದ್ಯದಲ್ಲಿ ಭಾರತ ತಂಡ 1 ರನ್ ಗಳ ರೋಚಕ ಸೋಲು ಕಂಡಿತಾದರೂ, ನಾಯಕ ಎಂಎಸ್ ಧೋನಿ  ಮಾತ್ರ ಆ ಪಂದ್ಯದಲ್ಲಿ ಅಂತಾರಾಷ್ಟ್ರೀಯ ದಾಖಲೆ ಬರೆದಿದ್ದಾರೆ.

ಈ ವರೆಗೂ ಆಸ್ಟ್ರೇಲಿಯಾ ತಂಡದ ಮಾಜಿ ನಾಯಕ ರಿಕಿ ಪಾಟಿಂಗ್ ಹೆಸರಲ್ಲಿದ್ದ ಅತೀ ಹೆಚ್ಚು ಅಂತಾರಾಷ್ಟ್ರೀಯ ಪಂದ್ಯಗಳಿಗೆ ನಾಯಕರಾದ ದಾಖಲೆಯನ್ನು ಭಾರತ ತಂಡದ ನಿಗದಿತ ಓವರ್  ಗಳ ತಂಡ ನಾಯಕ ಎಂಎಸ್ ಧೋನಿ ಮುರಿದಿದ್ದಾರೆ. ರಿಕ್ಕಿ ಪಾಟಿಂಗ್ ಒಟ್ಟು 324 ಪಂದ್ಯಗಳಲ್ಲಿ ಆಸ್ಟ್ರೇಲಿಯಾ ತಂಡವನ್ನು ಮುನ್ನಡೆಸಿದ್ದು, ನಿನ್ನೆ ನಡೆದ ಫ್ಲೋರಿಡಾ ಟಿ20 ಪಂದ್ಯದಲ್ಲಿ  ನಾಯಕರಾಗಿ ಆಡುವ ಮೂಲಕ ಧೋನಿ ಈ ದಾಖಲೆಯನ್ನು ಮುರಿದಿದ್ದಾರೆ. ಧೋನಿ ಈ ವರೆಗೂ ಮೂರು ಮಾದರಿಯ ಕ್ರಿಕೆಟ್‍ನಲ್ಲಿ ಒಟ್ಟು 325 ಅಂತಾರಾಷ್ಟ್ರೀಯ ಪಂದ್ಯಗಳಲ್ಲಿ ಭಾರತ  ತಂಡವನ್ನು ಮುನ್ನಡೆಸಿದ್ದಾರೆ.

ಆ ಮೂಲಕ  ಅಂತಾರಾಷ್ಟ್ರೀಯ ಕ್ರಿಕೆಟ್‍ನ ಅತೀ ಹೆಚ್ಚು ಪಂದ್ಯಗಳಲ್ಲಿ ನಾಯಕನಾಗಿರುವ ಕೀರ್ತಿಗೆ ಇದೀಗ ಟೀಂ ಇಂಡಿಯಾ ನಾಯಕ ಧೋನಿ ಪಾತ್ರರಾಗಿದ್ದಾರೆ. ಈ ಮೂಲಕ ರಿಕಿ ಪಾಂಟಿಂಗ್  ದಾಖಲೆ ಅಳಿಸಿ ಹಾಕಿದ್ದಾರೆ.  ಧೋನಿ ಟೀಂ ಇಂಡಿಯಾವನ್ನು ಒಟ್ಟು 325 ಪಂದ್ಯಗಳಲ್ಲಿ ಮುನ್ನಡೆಸಿ ಈ ದಾಖಲೆ ನಿರ್ಮಿಸಿದ್ದಾರೆ.

2007ರಲ್ಲಿ ಧೋನಿ ಟೀಂ ಇಂಡಿಯಾಗೆ ನಾಯಕನಾಗಿ ಬಡ್ತಿ ಪಡೆದಿದ್ದು, ಅಲ್ಲಿಂದ ಇಲ್ಲಿಯವರೆಗೆ ಒಟ್ಟು 60 ಟೆಸ್ಟ್, 194 ಏಕದಿನ ಹಾಗೂ 71 ಟಿ-20 ಪಂದ್ಯಗಳಲ್ಲಿ ಭಾರತ ತಂಡವನ್ನು ನಾಯಕರಾಗಿ  ಮುನ್ನಡೆಸಿದ್ದಾರೆ. ಭಾರತದ ಯಶಸ್ವಿ ನಾಯಕ ಎನಿಸಿಕೊಂಡಿರುವ 34 ವರ್ಷದ ಧೋನಿ ಮುಂದಾಳತ್ವದಲ್ಲಿ ಟೀಂ ಇಂಡಿಯಾ 27 ಟೆಸ್ಟ್, 107 ಏಕದಿನ ಮತ್ತು 40 ಟಿ-20 ಪಂದ್ಯಗಳಲ್ಲಿ ಜಯ  ಸಾಧಿಸಿದೆ.