ನಾಗ್ಪುರ: ಭಾರತದ ವಿರುದ್ಧದ ಪಂದ್ಯದಲ್ಲಿ ನ್ಯೂಜಿಲೆಂಡ್ ತಂಡದ ಅಭೂತಪೂರ್ವ ಗೆಲುವಿಗೆ ಇತ್ತೀಚೆಗೆ ಮೃತರಾದ ಮಾಜಿ ಆಟಗಾರ ಮಾರ್ಟಿನ್ ಕ್ರೋವ್ ಅವರೇ ಸ್ಪೂರ್ತಿ ಎಂದು ತಿಳಿದುಬಂದಿದೆ.
ಈ ಹಿಂದೆ ಮಾರ್ಟಿನ್ ಕ್ರೋವ್ ಅವರು ಹೂಡಿದ್ದ ತಂತ್ರವನ್ನೇ ನ್ಯೂಜಿಲೆಂಡ್ ಕ್ರಿಕೆಟ್ ತಂಡದ ನಾಯಕ ಭಾರತದ ವಿರುದ್ಧ ಅಳವಡಿಸಿ ಅದರಲ್ಲಿ ಯಶಸ್ಸು ಕೂಡ ಪಡೆದಿದ್ದಾರೆ. ಕಿವೀಸ್ ಮಾಜಿ ನಾಯಕ ಮಾರ್ಟಿನ್ ಕ್ರೋವ್ 1992ರ ವಿಶ್ವಕಪ್ ಸೆಮಿಫೈನಲ್ ಪಂದ್ಯದಲ್ಲಿ ಸ್ಪಿನ್ನರ್ ದೀಪಕ್ ಪಟೇಲ್‌ರನ್ನು ಮೊದಲ ಓವರ್‌ನಲ್ಲೇ ಕಣಕ್ಕಿಳಿಸಿ ದಿಟ್ಟನಡೆ ಇಟ್ಟಿದ್ದರು.
ಭಾರತದ ವಿರುದ್ಧದ ಪಂದ್ಯದಲ್ಲಿ ಕಿವೀಸ್ ಪಡೆ ಕೂಡ ಇದೇ ತಂತ್ರಗಾರಿಕೆಯನ್ನು ಪ್ರಯೋಗಿಸಿ ಅದರಲ್ಲಿ ಯಶಸ್ವಿ ಕೂಡ ಆಗಿದೆ. ಭಾರತದ ವಿರುದ್ಧದ ಪಂದ್ಯದಲ್ಲಿ ಮಾರ್ಟಿನ್ ಗೌರವಾರ್ಥ ಕಪ್ಪುಪಟ್ಟಿ ಧರಿಸಿ ಕಣಕ್ಕಿಳಿದಿದ್ದ ಕಿವೀಸ್ ತಂಡಕ್ಕೆ ಅವರ ಸ್ಪಿನ್ ಮಂತ್ರವೂ ಸ್ಪೂರ್ತಿಯಾಗಿದ್ದು ವಿಶೇಷ.
ಟಿ20 ಪಂದ್ಯವೊಂದರಲ್ಲಿ ಸ್ಪಿನ್ನರ್‌ಗಳೇ 9 ವಿಕೆಟ್ ಕಬಳಿಸಿದ 3ನೇ ದೃಷ್ಟಾಂತವಿದು. ಈ ಹಿಂದೆ ಜಿಂಬಾಬ್ವೆ (2008), ಶ್ರೀಲಂಕಾ (2012) ಸ್ಪಿನ್ನರ್‌ಗಳು ಈ ಸಾಧನೆ ಮಾಡಿದ್ದರು.