ಬೆಂಗಳೂರು: ಕರ್ನಾಟಕದ ಹರ್ಭಜನ್ ಸಿಂಗ್ ಎಂದು ಖ್ಯಾತಿ ಗಳಿಸಿರುವ ಕೆ. ಗೌತಮ್ ಐಪಿಎಲ್ 10ನೇ ಆವೃತ್ತಿಯ ಹರಾಜಿನಲ್ಲಿ 2 ಕೋಟಿ ರುಪಾಯಿಗೆ ಮುಂಬೈ ಇಂಡಿಯನ್ಸ್ ಪಾಲಾಗಿದ್ದಾರೆ. 

ಇದೇ ಮೊದಲ ಬಾರಿಗೆ ಐಪಿಎಲ್ ನಲ್ಲಿ ಆಡುವ ಸುವರ್ಣಾವಕಾಶ ಕರ್ನಾಟಕದ ರಣಜಿ ಆಟಗಾರ ಗೌತಮ್ ಗೆ ಸಿಕ್ಕಿದೆ. 10 ಲಕ್ಷ ಮುಖಬೆಲೆಯ ಗೌತಮ್ 2 ಕೋಟಿ ರುಪಾಯಿಗೆ ಮುಂಬೈ ಪಾಲಾಗಿದ್ದು, 10ನೇ ಆವೃತ್ತಿಗೆ ರಾಜ್ಯದಿಂದ ಅತೀ ಹೆಚ್ಚಿನ ಮೊತ್ತಕ್ಕೆ ಮಾರಾಟಗೊಂಡ ಮೊದಲ ಆಟಗಾರ. 

ಐಪಿಎಲ್ ಗೆ ಪಾದಾರ್ಪಣೆ ಮಾಡುತ್ತಿರುವ ಬಗ್ಗೆ ಸಂತಸ ವ್ಯಕ್ತಪಡಿಸಿದ ಗೌತಮ್ ಬಹಳ ವರ್ಷಗಳಿಂದ ಈ ಅವಕಾಶಕ್ಕಾಗಿ ಕಾಯುತ್ತಿದ್ದೆ. ಐಪಿಎಲ್ ನ ಯಾವುದಾದರೂ ತಂಡಕ್ಕೆ ಈ ಬಾರಿ ಆಯ್ಕೆಯಾಗುವ ವಿಶ್ವಾಸ ನನಗಿತ್ತು. ಇನ್ನು ಮುಂಬೈ ತಂಡದ ದಿಗ್ಗಜರೊಂದಿಗೆ ಕೆಲಸ ಮಾಡುವುದು ಹೆಮ್ಮೆಯ ವಿಷಯ. ತಂಡದೊಂದಿಗೆ ಕ್ರೀಡಾಂಗಣಕ್ಕೆ ಇಳಿಯಲು ಕಾತುರದಿಂದ ಕಾಯುತ್ತಿದ್ದೇನೆ ಎಂದು ಹೇಳಿದ್ದಾರೆ. 

ಬಾಲ್ಯದಿಂದಲೂ ಹರ್ಭಜನ್ ಸಿಂಗ್ ಅಭಿಮಾನಿ ನಾನು. ಅವರು ಆಡಿರುವ ಎಲ್ಲ ಪಂದ್ಯಗಳನ್ನು ಕೂತೂಹಲದಿಂದ ನೋಡಿದ್ದೇನೆ. ಬೌಲಿಂಗ್ ಶೈಲಿಯನ್ನು ಗಮನಿಸಿದ್ದೇನೆ. ಒಂದಲ್ಲ ಒಂದು ದಿನ ಭಜ್ಜಿ ಜತೆ ಒಂದೇ ತಂಡದಲ್ಲಿ ಆಡಬೇಕು ಎನ್ನುವ ಕನಸು ಕಂಡಿದ್ದೆ ಇದೀಗ ಈ ಕನಸು ನನಸಾಗುವ ಸಮಯ ಹತ್ತಿರ ಬಂದಿದೆ ಎಂದರು.