ನವದೆಹಲಿ: ಕೆಲವೇ ವರ್ಷಗಳಲ್ಲಿ ಇಂಡಿಯನ್ ಪ್ರಿಮಿಯರ್ ಲೀಗ್(ಐಪಿಎಲ್) ಅನ್ನು ಪಾಕಿಸ್ತಾನ ಸೂಪರ್ ಲೀಗ್(ಪಿಎಸ್ಎಲ್) ಹಿಂದಿಕ್ಕಲಿದೆ ಎಂದು ಪಾಕಿಸ್ತಾನದ ಮಾಜಿ ಕ್ರಿಕೆಟಿಗ ಶಾಹಿದ್ ಆಫ್ರಿದಿ ಹೇಳಿದ್ದಾರೆ.
ಇತ್ತೀಚೆಗಷ್ಟೇ ಕಾಶ್ಮೀರದಲ್ಲಿ ಅಮಾಯಕರು ಹತ್ಯೆಯಾಗುತ್ತಿದ್ದಾರೆ ಎಂದು ವಿವಾದಾತ್ಮಕ ಹೇಳಿಕೆ ನೀಡಿದ್ದ ಶಾಹಿದ್ ಆಫ್ರಿದಿ ಇದೀಗ ಮತ್ತೊಮ್ಮೆ ಐಪಿಎಲ್ ಬಗ್ಗೆ ಹೇಳಿಕೆ ನೀಡುವ ಮೂಲಕ ಭಾರತೀಯರ ಕೆಂಗಣ್ಣಿಗೆ ಗುರಿಯಾಗಿದ್ದಾರೆ.
ವಿಶ್ವದಾದ್ಯಂತ ಕ್ರಿಕೆಟ್ ಅಭಿಮಾನಿಗಳು ಐಪಿಎಲ್ ಗೆ ಎದುರು ನೋಡುತ್ತಿದ್ದರೆ ಇತ್ತ ಆಫ್ರಿದಿ ಭಾರತೀಯ ಕ್ರಿಕೆಟ್ ನಿಯಂತ್ರಣ ಮಂಡಳಿ(ಬಿಸಿಸಿಐ)ಯಿಂದ ಆಡಲು ನಮಗೆ ಅವಕಾಶ ನೀಡುತ್ತೇವೆಂದರು ನಾವು ಐಪಿಎಲ್ ನಲ್ಲಿ ಆಡಲು ಬರುವುದಿಲ್ಲ ಎಂದು ಹೇಳಿದ್ದಾರೆ.
ಇದೇ ವೇಳೆ ಕೆಲವೇ ವರ್ಷಗಳಲ್ಲಿ ಪಿಎಸ್ಎಲ್ ಐಪಿಎಲ್ ಅನ್ನು ಹಿಂದಿಕ್ಕಲಿದೆ. ನಾವು ಪಿಎಸ್ಎಲ್ ನಲ್ಲಿಯೇ ಸಂತೋಷದಿಂದ ಆಡುತ್ತಿದ್ದು ನಮಗೆ ಐಪಿಎಲ್ ಅವಶ್ಯಕತೆಯಿಲ್ಲ. ಮುಂದಿನ ದಿನಗಳಲ್ಲಿ ಐಪಿಎಲ್ ಗಿಂತ ಪಿಎಸ್ಎಲ್ ದೊಡ್ಡದಾಗಿ ಬೆಳೆಯಲಿದೆ ಎಂದಿದ್ದಾರೆ.