ಮೆಲ್ಬೋರ್ನ್: ಅತಿಥೇಯ ಆಸ್ಟ್ರೇಲಿಯಾ ತಂಡ ವಿರುದ್ಧ ಮೆಲ್ಬೋರ್ನ್ ಕ್ರಿಕೆಟ್ ಕ್ರೀಡಾಂಗಣದಲ್ಲಿ ನಡೆಯುತ್ತಿರುವ 3ನೇ ಟೆಸ್ಟ್ ಪಂದ್ಯದಲ್ಲಿ ಭಾರತ ಕ್ರಿಕೆಟ್ ತಂಡದ ಕಲಾತ್ಮಕ ಬ್ಯಾಟ್ಸಮನ್ ಚೇತೇಶ್ವರ ಪೂಜಾರ ಭರ್ಜರಿ ಶತಕ ಸಿಡಿಸಿದ್ದಾರೆ.

ಪೂಜಾರ ಅವರಿಗೆ ಇದು ಟೆಸ್ಟ್ ವೃತ್ತಿ ಜೀವನದ 17ನೇ ಟೆಸ್ಟ್ ಶತಕವಾಗಿದ್ದು, ಆಸಿಸ್ ನೆಲದಲ್ಲಿ ಇದು ಅವರ 2ನೇ ಶತಕವಾಗಿದೆ.

ಆಸ್ಟ್ರೇಲಿಯಾ ವಿರುದ್ಧ ಮೆಲ್ಬೋರ್ನ್ ಕ್ರಿಕೆಟ್ ಗ್ರೌಂಡ್‌ನಲ್ಲಿ ನಡೆಯುತ್ತಿರುವ ಬಾಕ್ಸಿಂಗ್ ಡೇ ಟೆಸ್ಟ್ ಪಂದ್ಯದ ಎರಡನೇ ದಿನದಾಟದಲ್ಲಿ ಪೂಜಾರ 319 ಎಸೆತಗಳಲ್ಲಿ 106 ರನ್ ಗಳ ಗಳಿಸುವ ಮೂಲಕ ತಂಡಕ್ಕೆ ಅಮೂಲ್ಯ ಕಾಣಿಕೆ ನೀಡಿದರು. ಆದರೆ 106 ರನ್ ಗಳಿಸಿ ಅತ್ಯುತ್ತಮವಾಗಿ ಆಡುತ್ತಿದ್ದ ಪೂಜಾರ ಪ್ಯಾಟ್ ಕಮಿನ್ಸ್ ಬೌಲಿಂಗ್ ನಲ್ಲಿ ಔಟ್ ಆಗಿ ನಿರ್ಗಮಿಸಿದರು.

ಇದು ಆಸೀಸ್ ಮಣ್ಣಿನಲ್ಲಿ ಪೂಜಾರ ಬ್ಯಾಟ್‌ನಿಂದ ಸಿಡಿ ಎರಡನೇ ಶತಕವೂ ಹೌದು. ಈ ಎರಡು ಶತಕಗಳು ಪ್ರಸಕ್ತ ಸರಣಿಯಲ್ಲೇ ದಾಖಲಾಗಿರುವುದು ಗಮನಾರ್ಹ.