ಮುಂಬೈ: ಇಂಡಿಯನ್ ಪ್ರಿಮಿಯರ್ ಲೀಗ್(ಐಪಿಎಲ್)ನ ಎಲ್ಲಾ ಎಂಟು ತಂಡಗಳಿಗೆ ಭಾರತೀಯ ಕ್ರಿಕೆಟ್ ನಿಯಂತ್ರಣ ಮಂಡಳಿ(ಬಿಸಿಸಿಐ) ವಾರ್ಷಿಕ 250 ರುಪಾಯಿ ಕೋಟಿ ಪಾವತಿಸಲಿದೆ ಎಂದು ವರದಿಯಾಗಿದೆ. 

ಮಾಧ್ಯಮ ಹಾಗೂ ಪ್ರಸಾರ ಹಕ್ಕಿನಿಂದ ಬಿಸಿಸಿಐಗೆ ಭಾರೀ ಹಣ ದೊರೆಯಲಿದ್ದು ಕೇಂದ್ರ ಆದಾಯದಿಂದ ತಂಡಗಳಿಗೆ ನೀಡುವ ಮೊತ್ತವನ್ನು 4 ಪಟ್ಟು ಹೆಚ್ಚಿಸಲು ನಿರ್ಧರಿಸಲಾಗಿದೆ ಎನ್ನಲಾಗಿದೆ. 

ಮೊದಲ ಆವೃತ್ತಿಯಿಂದಲೂ ಎಲ್ಲಾ ತಂಡಗಳಿಗೆ ಬಿಸಿಸಿಐ ವಾರ್ಷಿಕ 60 ಕೋಟಿ ನೀಡುತ್ತಿತ್ತು. ಇತ್ತೀಚೆಗೆ ಸ್ಟಾರ್ ಸ್ಪೋರ್ಟ್ಸ್ ಸಂಸ್ಥೆ 5 ವರ್ಷದ ಅವಧಿಗೆ 16, 347 ಕೋಟಿ ನೀಡಿ ಪ್ರಸಾರ ಹಕ್ಕು ಖರೀದಿಸಿತ್ತು. ಹೀಗಾಗಿ ಐಪಿಎಲ್ ನಿಂದ ಬಿಸಿಸಿಐಗೆ ವಾರ್ಷಿಕ 3200 ಕೋಟಿ ಸಿಗಲಿದೆ. ಈ ಮೊದಲು ಪ್ರಸಾರ ಹಕ್ಕು ಹೊಂದಿದ್ದ ಸೋನಿ ಸಂಸ್ಥೆ ಬಿಸಿಸಿಐಗೆ ವಾರ್ಷಿಕ 800 ಕೋಟಿ ನೀಡುತ್ತಿತ್ತು.