ಕರಾಚಿ: 16ರ ಪ್ರಾಯದ ಯುವ ವೇಗಿ ನಾಸೀಮ್ ಶಾ ಅವರು ಐದು ವಿಕೆಟ್ ಪಡೆದು ವಿಶ್ವದ ಅತ್ಯಂತ ಕಿರಿಯ ವೇಗದ ಬೌಲರ್ ಎಂಬ ದಾಖಲೆ ಮಾಡುವ ಮೂಲಕ ಇತಿಹಾಸದ ಪುಟ ಸೇರಿದರು.
ಇಲ್ಲಿನ, ನ್ಯಾಷನಲ್‌ ಕ್ರೀಡಾಂಗಣದಲ್ಲಿ ಇಂದು ಮುಕ್ತಾಯವಾದ ಶ್ರೀಲಂಕಾ ವಿರುದ್ಧದ ಎರಡನೇ ಪಂದ್ಯದಲ್ಲಿ ಪಾಕಿಸ್ತಾನದ ನಾಸೀಮ್ 32 ರನ್‌ ನೀಡಿ ಐದು ವಿಕೆಟ್ ಪಡೆದರು. ಈ ಪಂದ್ಯದಲ್ಲಿ ಪಾಕಿಸ್ತಾನ 263 ರನ್‌ಗಳಿಂದ ಜಯ ಸಾಧಿಸಿತು. ಜತೆಗೆ, ಟೆಸ್ಟ್ ಸರಣಿಯನ್ನು 1-0 ಅಂತರದಲ್ಲಿ ಆತಿಥೇಯರು ಮುಡಿಗೇರಿಸಿಕೊಂಡರು.
ಐದು ವಿಕೆಟ್ ಪಡೆಯುವ ಮೂಲಕ ನಾಸೀಮ್ ಶಾ ಅವರು ಮೊಹಮ್ಮದ್‌ ಅಮೀರ್‌ ಅವರ ದಾಖಲೆಯನ್ನು ಮುರಿದರು. ಅಮೀರ್‌ 17 ವರ್ಷ ಮತ್ತು257 ದಿನಗಳಲ್ಲಿ ಐದು ವಿಕೆಟ್ ಪಡೆದಿದ್ದರು. ಇದೀಗ ನಾಸೀಮ್ ಶಾ 16 ವರ್ಷ ಮತ್ತು 307 ದಿನಗಳಲ್ಲಿ ಈ ಸಾಧನೆ ಮಾಡಿದ್ದಾರೆ.