ರಾಂಚಿ: ದಕ್ಷಿಣ ಆಫ್ರಿಕಾ ವಿರುದ್ಧದ ಸರಣಿಯಲ್ಲಿ ಆರಂಭಿಕರಾಗಿ ಕಣಕ್ಕಿಳಿಯುವ ಅವಕಾಶವನ್ನು ಎರಡೂ ಕೈಗಳಿಂದ ಬಳಸಿಕೊಂಡು ಭರ್ಜರಿ ಪ್ರದರ್ಶನ ನೀಡಿದ ಟೀಮ್ ಇಂಡಿಯಾದ ರೋಹಿತ್ ಶರ್ಮಾ, ಸರಣಿ ಶ್ರೇಷ್ಠ ಆಟಗಾರ ಪ್ರಶಸ್ತಿಗೆ ಆಯ್ಕೆ ಆಗಿದ್ದಾರೆ. ಈ ಅವಕಾಶ ನೀಡಿದಕ್ಕೆ ಕೃತಜ್ಞ ಎಂದು ಹಿಟ್ ಮ್ಯಾನ್ ತಿಳಿಸಿದ್ದಾರೆ.
ಭಾರತ ಭರ್ಜರಿ ಪ್ರದರ್ಶನ ನೀಡಿ ದಕ್ಷಿಣ ಆಫ್ರಿಕಾ ವಿರುದ್ಧ ಕ್ಲೀನ್ ಸ್ವೀಪ್ ಸಾಧನೆ ಮಾಡಿದೆ. ರಾಂಚಿ ಟೆಸ್ಟ್ ನಲ್ಲಿ ಟೀಮ್ ಇಂಡಿಯಾ ಇನ್ನಿಂಗ್ಸ್ ಹಾಗೂ 202 ರನ್ ಗಳ ಜಯ ಸಾಧಿಸಿದೆ. "ನನಗೆ ಆರಂಭಿಕನಾಗಿ ಆಡುವ ಅವಕಾಶ ನೀಡಿದ ತಂಡದ ಮ್ಯಾನೇಜ್ಮೆಂಟ್ ಗೆ ಧನ್ಯವಾದಗಳು. ಹೊಸ ಚೆಂಡಿನೊಂದಿಗೆ ಆಡುವ ಆತ್ಮವಿಶ್ವಾಸ ಹೆಚ್ಚಿದೆ. ಯಾವಾಗಲು ಹೊಸ ಚೆಂಡಿನಿಂದ ಆಡುವುದು ಕಷ್ಟವಾಗುತ್ತದೆ. ಸಿಕ್ಕ ಅವಕಾಶವನ್ನು ಈ ರೀತಿ ಬಳಸಿಕೊಂಡಿದ್ದು, ಖುಷಿ ತಂದಿದೆ. ಇದೇ ಪ್ರದರ್ಶನವನ್ನು ಮುಂದುವರೆಸುವ ಆಸೆ ನನ್ನದಾಗಿದೆ.
"ನನಗೆ ನಾಯಕ ಹಾಗೂ ಕೋಚ್ ಸಮರ್ಥನೆ ನೀಡಿದ್ದಾರೆ. ಟೆಸ್ಟ್ ಕ್ರಿಕೆಟ್ ವಿಭಿನ್ನವಾಗಿದ್ದು, ಇದರಲ್ಲಿ ದ್ವಿಶತಕ ಬಾರಿಸುವುದು ಆತ್ಮವಿಶ್ವಾಸ ಹೆಚ್ಚಿಸುತ್ತದೆ. ತಪ್ಪುಗಳಿಂದಲೇ ನಾನು ಔಟ್ ಆಗುತ್ತೇನೆ ಎಂಬುದನ್ನು ಅರಿತಿದ್ದೇನೆ. ದೊಡ್ಡ ಇನ್ನಿಂಗ್ಸ್ ಕಟ್ಟಿ ತಂಡವನ್ನು ಸುಸ್ಥಿತಿಯಲ್ಲಿ ನಿಲ್ಲಿಸುವ ಇರಾದೆ ನನ್ನದಾಗಿತ್ತು" ಎಂದಿದ್ದಾರೆ.