ನಾಗಪುರ: ರಣಜಿ ಕ್ರಿಕೆಟ್ ನಲ್ಲಿ ಹಿರಿಯ ಕ್ರಿಕೆಟಿಗ ವಾಸಿಂ ಜಾಫರ್ ದಾಖಲೆ ನಿರ್ಮಾಣ ಮಾಡಿದ್ದು, ಈ ಮಾದರಿಯ ಕ್ರಿಕೆಟ್ ನಲ್ಲಿ 12 ಸಾವಿರ ರನ್ ಪೇರಿಸಿದ ಮೊದಲ ಆಟಗಾರ ಎಂಬ ಕೀರ್ತಿಗೆ ಭಾಜನರಾಗಿದ್ದಾರೆ.

ವಿಧರ್ಭ ಕ್ರಿಕೆಟ್ ಅಸೋಸಿಯೇಷನ್ ಕ್ರೀಡಾಂಗಣದಲ್ಲಿ ನಡೆದ ರಣಜಿ ಎಲೈಟ್ ಗ್ರೂಪ್ ಎ ಮತ್ತು ಗ್ರೂಪ್ ಬಿಯ ಮುಂಬೈ ಮತ್ತು ವಿಧರ್ಭ ನಡುವಿನ ಪಂದ್ಯದಲ್ಲಿ ವಸೀಂ ಜಾಫರ್ ಈ ಸಾಧನೆ ಗೈದಿದ್ದಾರೆ. 

2019 ಮತ್ತು 2020ನೇ ಸಾಲಿನ ಕ್ರಿಕೆಟ್ ಋತುವಿನ ಆರಂಭದಲ್ಲೇ ಜಾಫರ್ ಈ ಸಾಧನೆ ಗೈದಿದ್ದಾರೆ. ಇದಕ್ಕೂ ಮೊದಲು 1996-97ರಲ್ಲಿ ರಣಜಿ ಆರಂಭಿಸಿದ್ದ ಜಾಫರ್ 150ನೇ ರಣಜಿ ಪಂದ್ಯವನ್ನಾಡುವ ಮೂಲಕ ಅತೀ ಹೆಚ್ಚು ರಣಜಿ ಪಂದ್ಯವನ್ನಾಡಿದ ಆಟಗಾರ ಎಂಬ ಕೀರ್ತಿಗೆ ಭಾಜನರಾಗಿದ್ದರು.  

ಜಾಫರ್ ಭಾರತ ಕ್ರಿಕೆಟ್ ತಂಡದ ಪರ 31 ಟೆಸ್ಟ್ ಹಾಗೂ 2 ಏಕದಿನ ಪಂದ್ಯಗಳನ್ನಾಡಿದ್ದು, 2008ರಲ್ಲಿ ದಕ್ಷಿಣ ಆಫ್ರಿಕಾ ವಿರುದ್ಧದ ಸರಣಿಯಲ್ಲಿ ಕೊನೆಯದಾಗಿ ಭಾರತ ತಂಡವನ್ನು ಪ್ರತಿನಿಧಿಸಿದ್ದರು.