ನವದೆಹಲಿ: ದೆಹಲಿಯ ಶಾಹೀನ್ ಬಾಗ್ ನಲ್ಲಿ ಸಿಎಎ ವಿರೋಧಿಸಿ ಪ್ರತಿಭಟನೆ ನಡೆಯುತ್ತಿದ್ದು ಈ ಪ್ರತಿಭಟನೆಯಲ್ಲಿ ಟೀಂ ಇಂಡಿಯಾ ಮಾಜಿ ಕ್ರಿಕೆಟಿಗ ಇರ್ಫಾನ್ ಪಠಾಣ್ ಅವರು ಭಾಗಿಯಾಗಿದ್ದರು ಎಂಬ ವಿಡಿಯೋ ಇದೀಗ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗುತ್ತಿದೆ.
17 ಸೆಕೆಂಡ್ ಗಳ ಈ ವಿಡಿಯೋದಲ್ಲಿ ಸಿಎಎ, ಎನ್ಆರ್ಸಿ ವಿರುದ್ಧದ ಪ್ರತಿಭಟನೆಯಲ್ಲಿ ಮತ್ತೊಂದು ಸಿಂಹ ಎಂಟ್ರಿಯಾಗಿದೆ. ಅದರ ಹೆಸರು ಇರ್ಫಾನ್ ಪಠಾಣ್ ಎಂದು ಬರೆಯಲಾಗಿದೆ. ಈ ವಿಡಿಯೋ ಇದೀಗ ಸಾಕಷ್ಟು ವೈರಲ್ ಆಗಿದ್ದು 80 ಸಾವಿರ ವೀಕ್ಷಣೆ ಕಂಡಿದೆ.
ಆದರೆ ವಿಡಿಯೋ ಬಗ್ಗೆ ಅಸಲಿ ಸತ್ಯವೇ ಬೇರೆ ಇದೆ. ಈ ವಿಡಿಯೋ ಶಾಹೀನ್ ಬಾಗ್ ನಲ್ಲಿ ನಡೆಯುತ್ತಿರುವ ಪ್ರತಿಭಟನೆಯ ಇರ್ಫಾನ್ ಪಠಾಣ್ ಭಾಗಿಯಾಗಿರುವುದಲ್ಲ. ಅಸಲಿಗೆ ಜನವರಿ 14ರಂದು ಪಶ್ಚಿಮ ಬಂಗಾಳದ ಕಮರ್ಹಟಿ ಪ್ರದೇಶದಲ್ಲಿ ನಡೆದ ಪ್ರೀಮಿಯರ್ ನಾಕೌಟ್ ಕ್ರಿಕೆಟ್ ಟೂರ್ನಿಗೆ ಇರ್ಫಾನ್ ಚಾಲನೆ ನೀಡಿದ್ದರು.
ಅಂದು ಚಿತ್ರೀಕರಿಸಿದ್ದ ವಿಡಿಯೋವನ್ನು ತಿರುಚಿ ಇದೀಗ ಅದಕ್ಕೆ ಶಾಹೀನ್ ಬಾಗ್ ಲಿಂಗ್ ಮಾಡಿ ಸಾಮಾಜಿಕ ಜಾಲತಾಣದಲ್ಲಿ ಪೋಸ್ಟ್ ಮಾಡಿದ್ದಾರೆ. ಲ್ಯಾಬ್ ಅಜಾದ್ ಹೈ ತೇರೆ ಎಂಬ ಫೇಸ್ ಬುಕ್ ಪೇಜ್ ನಲ್ಲಿ ಈ ವಿಡಿಯೋ ಜನವರಿ 24ರಂದು ಪೋಸ್ಟ್ ಮಾಡಲಾಗಿದೆ.