ಕಾನ್ಪುರ: ಭಾರತದ ವಿರುದ್ಧದ ಮೊದಲ ಟೆಸ್ಟ್ ಪಂದ್ಯದ ಮೊದಲ ಇನ್ನಿಂಗ್ಸ್ ನಲ್ಲಿ ಭರ್ಜರಿ ಬ್ಯಾಟಿಂಗ್ ಪ್ರದರ್ಶನ ಮಾಡುತ್ತಿರುವ ವಿಲ್ ಯಂಗ್ ಮತ್ತು ಟಾಮ್ ಲಥಾಮ್ ದಾಖಲೆಗೆ ಪಾತ್ರರಾಗಿದ್ದಾರೆ.
ಕಾನ್ಪುರದಲ್ಲಿ ನಡೆಯುತ್ತಿರುವ ಮೊದಲ ಟೆಸ್ಟ್ ಪಂದ್ಯದಲ್ಲಿ ಈ ಜೋಡಿ 2ನೇ ದಿನದಾಟದ ಅಂತ್ಯಕ್ಕೆ 129ರನ್ ಗಳ ಅಜೇಯ ಜೊತೆಯಾಟವನ್ನಾಡಿದ್ದು, ಮೂರನೇ ದಿನಕ್ಕೆ ಕ್ರೀಸ್ ಕಾಯ್ದುಕೊಂಡಿದೆ. ಆ ಮೂಲಕ ಈ ಜೋಡಿ ವಿಶೇಷ ದಾಖಲೆಯನ್ನು ನಿರ್ಮಿಸಿದ್ದು, ಭಾರತದಲ್ಲಿ ನ್ಯೂಜಿಲೆಂಡ್ ಪರ 3ನೇ ಅತ್ಯಧಿಕ ರನ್ ಗಳ ಜೊತೆಯಾಟವಾಡಿದೆ.
ಈ ಹಿಂದೆ 2003/04ರಲ್ಲಿ ಎಂ ರಿಚರ್ಡ್ಸನ್ ಮತ್ತು ಎಲ್ ವಿನ್ಸೆಂಟ್ ಜೋಡಿ ಮೊಹಾಲಿಯನ್ನಿ ನಡೆದ ಪಂದ್ಯದಲ್ಲಿ ಕಿವೀಸ್ ಪರ ದಾಖಲೆಯ ಗರಿಷ್ಠ 231ರನ್ ಗಳ ಜೊತೆಯಾಟವಾಡಿತ್ತು. ಇದು ಕಿವೀಸ್ ಪರ ಭಾರತದಲ್ಲಿ ಅತ್ಯಧಿಕ ಜೊತೆಯಾಟವಾಗಿದೆ. ಇದಕ್ಕೂ ಮೊದಲು 1999/2000ರಲ್ಲಿ ಅಹ್ಮದಾಬಾದ್ ಪಂದ್ಯದಲ್ಲಿ ಎಂ ಹಾರ್ನೆ-ಜಿ ಸ್ಟೆಡ್ ಜೋಡಿ 131 ರನ್ ಗಳ ಜೊತೆಯಾಟವಾಡಿತ್ತು. ಇದು 2ನೇ ಸ್ಥಾನದಲ್ಲಿದ್ದು, ಇದೀಗ ಲಾಥಮ್-ಯಂಗ್ ಜೋಡಿ ಈ ದಾಖಲೆಯನ್ನು ಹಿಂದಿಕ್ಕುವ ಹಂತದಲ್ಲಿದೆ. ಈ ಜೋಡಿ ನಾಳೆ ಕೇವಲ 2ರನ್ ಗಳಿಸಿದರೆ ಈ ದಾಖಲೆಯನ್ನು ಹಿಂದಿಕ್ಕಿ 2ನೇ ಸ್ಥಾನಕ್ಕೇರುತ್ತದೆ.
ಪ್ರಸ್ತುತ 75ರನ್ ಗಳಿಸಿರುವ ವಿಲ್ ಯಂಗ್ ಮತ್ತು 50 ರನ್ ಕಲೆಹಾಕಿರುವ ಟಾಮ್ ಲಾಥಮ್ ಮೂರನೇ ದಿನಕ್ಕೆ ಕ್ರೀಸ್ ಕಾಯ್ದುಕೊಂಡಿದ್ದಾರೆ.