ಮುಂಬೈ: ಐಪಿಎಲ್ ಟೂರ್ನಿಯ ಇಂದಿನ ಮೊದಲ ಪಂದ್ಯದಲ್ಲಿ ಲಕ್ನೋ ಸೂಪರ್ ಜೈಂಟ್ಸ್ (LSG) ವಿರುದ್ಧ ಮುಂಬೈ ಇಂಡಿಯನ್ಸ್ (MI) 54 ರನ್ ಗಳ ಭರ್ಜರಿ ಜಯ ದಾಖಲಿಸಿದೆ.
ಮುಂಬೈನ ವಾಂಖೆಡೆ ಕ್ರೀಡಾಂಗಣದಲ್ಲಿ ನಡೆದ ಪಂದ್ಯದಲ್ಲಿ ಮುಂಬೈ ಇಂಡಿಯನ್ಸ್ ತಂಡ ನೀಡಿದ 216 ರನ್ ಗಳ ಬೃಹತ್ ಗುರಿಯನ್ನು ಬೆನ್ನು ಹತ್ತಿದ ಲಕ್ನೋ ಸೂಪರ್ ಜೈಂಟ್ಸ್ ತಂಡ 20 ಓವರ್ ನಲ್ಲಿ 161 ರನ್ ಗಳಿಗೆ ಆಲೌಟ್ ಆಯಿತು. ಆ ಮೂಲಕ ಮುಂಬೈ ಇಂಡಿಯನ್ಸ್ ತಂಡ 54 ರನ್ ಗಳ ಭರ್ಜರಿ ಜಯ ದಾಖಲಿಸಿತು.
ಲಕ್ನೋಪರ ಮಿಚೆಲ್ ಮಾರ್ಶ್ 34, ನಿಕೋಲಸ್ ಪೂರನ್ 27, ಆಯುಷ್ ಬದೋನಿ 35, ಡೇವಿಡ್ ಮಿಲ್ಲರ್ 24 ರನ್ ಗಳಿಸಿದರು. ನಾಯಕ ರಿಷಬ್ ಪಂತ್ ಮತ್ತೆ ಬ್ಯಾಟಿಂಗ್ ನಲ್ಲಿ ವಿಫಲರಾಗಿದ್ದು, ಕೇವಲ 4 ರನ್ ಗಳಿಸಿ ವಿಲ್ ಜಾಕ್ಸ್ ಗೆ ವಿಕೆಟ್ ಒಪ್ಪಿಸಿದ್ದು ಲಕ್ನೋಗೆ ದುಬಾರಿಯಾಯಿತು.
ಮುಂಬೈ ಪರ ಜಸ್ ಪ್ರೀತ್ ಬುಮ್ರಾ 4 ವಿಕೆಟ್ ಪಡೆದು ಗೆಲುವಿನ ರೂವಾರಿಯಾದರು. ಉಳಿದಂತೆ ಟ್ರೆಂಟ್ ಬೌಲ್ಟ್ 3 ವಿಕೆಟ್ ಪಡೆದರೆ, ವಿಲ್ ಜಾಕ್ಸ್ 2 ಮತ್ತು ಕಾರ್ಬಿನ್ ಬಾಷ್ 1 ವಿಕೆಟ್ ಪಡೆದರು.
ಮುಂಬೈ ಭರ್ಜರಿ ಬ್ಯಾಟಿಂಗ್
ಇನ್ನು ಟಾಸ್ ಸೋತರೂ ಮೊದಲು ಬ್ಯಾಟಿಂಗ್ ಮಾಡುವ ಅವಕಾಶ ಪಡೆದ ಮುಂಬೈ ಇಂಡಿಯನ್ಸ್ ತಂಡ ರಿಕಲ್ಟನ್ (58), ಸೂರ್ಯ ಕುಮಾರ್ ಯಾದವ್ (54) ಅರ್ಧಶತಕಗಳ ನೆರವಿನಿಂದ 215 ರನ್ ಗಳ ಬೃಹತ್ ಮೊತ್ತ ಪೇರಿಸಿತು. ಉಳಿದಂತೆ ವಿಲ್ ಜಾಕ್ಸ್ 29 ರನ್, ಕಾರ್ಬಿನ್ ಬಾಷ್ 20 ರನ್ ಮತ್ತು ನಮನ್ ಧಿರ್ ಅಜೇಯ 25 ರನ್ ಗಳಿಸಿದರು.
ಮುಂಬೈಗೆ ಸತತ 5ನೇ ಜಯ
ಹಾಲಿ ಟೂರ್ನಿಯಲ್ಲಿ ಮುಂಬೈ ಇಂಡಿಯನ್ಸ್ ತಂಡಕ್ಕೆ ಇದು ಸತತ 5ನೇ ಜಯವಾಗಿದ್ದು, ಆ ಮೂಲಕ ಐಪಿಎಲ್ ಟೂರ್ನಿಯಲ್ಲಿ 7ನೇ ಬಾರಿಗೆ ಮುಂಬೈ ತಂಡ ಸತತ 5 ಅಥವಾ ಅದಕ್ಕಿಂತ ಹೆಚ್ಚು ಸತತ ಪಂದ್ಯಗಳನ್ನು ಗೆದ್ದ ಸಾಧನೆ ಮಾಡಿದೆ. ಈ ಹಿಂದೆ ಮುಂಬೈ 2008ರಲ್ಲಿ (6 ಪಂದ್ಯ), 2010ರಲ್ಲಿ (5 ಪಂದ್ಯ), 2013ರಲ್ಲಿ (5 ಪಂದ್ಯ), 2015ರಲ್ಲಿ (5 ಪಂದ್ಯ), 2017ರಲ್ಲಿ (6 ಪಂದ್ಯ), 2020ರಲ್ಲಿ (5 ಪಂದ್ಯ) ಸತತ ಪಂದ್ಯಗಳನ್ನು ಜಯಿಸಿತ್ತು.
Most consecutive wins for MI in IPL
Six in 2008
Five in 2010 (Runners up)
Five in 2013 (Champions)
Five in 2015 (Champions)
Six in 2017 (Champions)
Five in 2020 (Champions)
Five in 2025 *
ಅಂಕಪಟ್ಟಿಯಲ್ಲಿ 2ನೇ ಸ್ಥಾನಕ್ಕೆ ಹಾರ್ದಿಕ್ ಪಡೆ
ಅಲ್ಲದೆ ಇಂದಿನ ಗೆಲುವಿನೊಂದಿಗೆ ತನ್ನ ಅಂಕಗಳಿಕೆಯನ್ನು 12ಕ್ಕೆ ಏರಿಸಿಕೊಂಡಿರುವ ಹಾರ್ದಿಕ್ ಪಡೆ 2ನೇ ಸ್ಥಾನಕ್ಕೆ ಜಿಗಿದಿದೆ. ಒಟ್ಟು 10 ಪಂದ್ಯಗಳನ್ನಾಡಿರುವ ಮುಂಬೈ ಇಂಡಿಯನ್ಸ್ ತಂಡ 6 ಗೆಲುವು ಮತ್ತು 4 ಸೋಲಿನೊಂದಿಗೆ 12 ಅಂಕಗಳೊಂದಿಗೆ 2ನೇ ಸ್ಥಾನಕ್ಕೇರಿದೆ. 2ನೇ ಸ್ಥಾನದಲ್ಲಿದ್ದ ಡೆಲ್ಲಿ 3ನೇ ಸ್ಥಾನಕ್ಕೆ ಮತ್ತು 3ನೇ ಸ್ಥಾನದಲ್ಲಿದ್ದ ಆರ್ ಸಿಬಿ 4ನೇ ಸ್ಥಾನಕ್ಕೆ ಕುಸಿದಿದೆ.