ದುಬೈ: ಐಸಿಸಿ ಚಾಂಪಿಯನ್ಸ್ ಟ್ರೋಫಿ ಕ್ರಿಕೆಟ್ ಟೂರ್ನಿಯ ಬಾಂಗ್ಲಾದೇಶ ವಿರುದ್ಧದ ಪಂದ್ಯದಲ್ಲಿ ಭಾರತ ತಂಡದ ರನ್ ಮೆಷಿನ್ ವಿರಾಟ್ ಕೊಹ್ಲಿ ಬೇಗನೇ ಔಟ್ ಆಗುವ ಮೂಲಕ ಬೇಡವಾದ ಕಳಪೆ ದಾಖಲೆಯೊಂದನ್ನು ತಮ್ಮ ಹೆಸರಿಗೆ ಬರೆದುಕೊಂಡಿದ್ದಾರೆ.

ಹೌದು.. ದುಬೈನ ದುಬೈ ಅಂತರರಾಷ್ಟ್ರೀಯ ಕ್ರಿಕೆಟ್ ಕ್ರೀಡಾಂಗಣದಲ್ಲಿ ನಿನ್ನೆ ನಡೆದ ಬಾಂಗ್ಲಾದೇಶ ವಿರುದ್ಧದ ಪಂದ್ಯದಲ್ಲಿ ವಿರಾಟ್ ಕೊಹ್ಲಿ 38 ಎಸೆತಗಳಲ್ಲಿ 22 ರನ್ ಗಳಿಸಿ ಔಟಾದರು. ಭಾರತ ತಂಡ ಕೊಹ್ಲಿ ಬ್ಯಾಟ್ ನಿಂದ ಹೆಚ್ಚಿನ ರನ್ ಗಳನ್ನು ನಿರೀಕ್ಷೆ ಮಾಡಿತ್ತು. ಆದರೆ ಕೊಹ್ಲಿ ರಿಶಾದ್ ಹೊಸೇನ್ ಬೌಲಿಂಗ್ ನಲ್ಲಿ ಸೌಮ್ಯ ಸರ್ಕಾರ್ ಗೆ ಕ್ಯಾಚ್ ನೀಡಿ ಔಟಾದರು.

15 ರನ್ ಗಳ ಅಂತರದಲ್ಲಿ ಅಪರೂಪದ ದಾಖಲೆ ಮಿಸ್

ಈ ಪಂದ್ಯದಲ್ಲಿ ಕೊಹ್ಲಿ ಬೇಗನೇ ಔಟ್ ಆಗದೇ ಹೋಗಿದ್ದರೆ ಇದೇ ಪಂದ್ಯದಲ್ಲಿ ಅವರು ಅಂತಾರಾಷ್ಟ್ರೀಯ ಏಕದಿನ ಕ್ರಿಕೆಟ್ ನಲ್ಲಿ 14 ಸಾವಿರ ರನ್ ಗಳಿಸುವ ಸಾಧನೆ ಮಾಡಬಹುದಿತ್ತು. ಆದರೆ ಕೇವಲ 15 ರನ್ ಗಳ ಅಂತರದಲ್ಲಿ ಅಪರೂಪದ ದಾಖಲೆ ಮಿಸ್ ಮಾಡಿಕೊಂಡಿದ್ದಾರೆ. ಕೊಹ್ಲಿ ಈವರೆಗೂ ಒಟ್ಟು 298 ಪಂದ್ಯಗಳು, 286 ಇನ್ನಿಂಗ್ಸ್ ನಲ್ಲಿ 13,985 ರನ್ ಕಲೆಹಾಕಿದ್ದಾರೆ.

ಬೇಡದ ಕಳಪೆ ದಾಖಲೆ

ಇನ್ನು ಈ ಪಂದ್ಯದಲ್ಲಿ ಸ್ಪಿನ್ನರ್ ಗೆ ಔಟಾಗುವ ಮೂಲಕ ಕೊಹ್ಲಿ ಬೇಡವಾದ ಕಳಪೆ ದಾಖಲೆ ಬರೆದಿದ್ದಾರೆ. ಆ ಮೂಲಕ ಬರೊಬ್ಬರಿ 23ನೇ ಬಾರಿಗೆ ಸ್ಪಿನ್ನರ್ ಗೆ ವಿರಾಟ್ ಕೊಹ್ಲಿ ವಿಕೆಟ್ ಒಪ್ಪಿಸಿದಂತಾಗಿದೆ. ಅಂತಾರಾಷ್ಟ್ರೀಯ ಏಕದಿನ ಕ್ರಿಕೆಟ್ ನಲ್ಲಿ ಆಟಗಾರನೋರ್ವ ಅತೀ ಹೆಚ್ಚು ಬಾರಿ ಸ್ಪಿನ್ನರ್ ಗೆ ವಿಕೆಟ್ ಒಪ್ಪಿಸಿದ ಕಳಪೆ ದಾಖಲೆಗೆ ಕೊಹ್ಲಿ ಪಾತ್ರರಾಗಿದ್ದಾರೆ. ಈ ಪಟ್ಟಿಯಲ್ಲಿ ನ್ಯೂಜಿಲೆಂಡ್ ಬ್ಯಾಟರ್ ಕೇನ್ ವಿಲಿಯಮ್ಸನ್ ಮತ್ತು ಬಾಂಗ್ಲಾದೇಶದ ಬ್ಯಾಟರ್ ಮುಷ್ಫಿಕರ್ ರಹೀಮ್ ತಲಾ 22 ಬಾರಿ ಸ್ಪಿನ್ನರ್ ಗಳಿಗೆ ಔಟಾಗುವ ಮೂಲಕ ಜಂಟಿ 2ನೇ ಸ್ಥಾನದಲ್ಲಿದ್ದಾರೆ.

ಸ್ಪಿನ್ ಬೌಲಿಂಗ್ ನಲ್ಲಿ 1400 ರನ್

ಇನ್ನು ವಿರಾಟ್ ಕೊಹ್ಲಿ ಏಕದಿನ ಕ್ರಿಕೆಟ್ ನಲ್ಲಿ 89 ಇನ್ನಿಂಗ್ಸ್ ಗಳಲ್ಲಿ ಸ್ಪಿನ್ ಬೌಲಿಂಗ್ ನಲ್ಲಿ ಉತ್ತಮ ಸರಾಸರಿ ಹೊಂದಿದ್ದು, 61.354 ಸರಾಸರಿಯಲ್ಲಿ ಮತ್ತು 101.21 ಸ್ಟ್ರೈಕ್ ರೇಟ್ ನಲ್ಲಿ 1411 ರನ್ ಗಳಿಸಿದ್ದಾರೆ. ಇದು ಯಾವುದೇ ಅಂತಾರಾಷ್ಟ್ರೀಯ ಬ್ಯಾಟರ್ ಓರ್ವ ಸ್ಪಿನ್ ಬೌಲಿಂಗ್ ನಲ್ಲಿ ಹೊಂದಿರುವ ಉತ್ತಮ ಬ್ಯಾಟಿಂಗ್ ಪ್ರದರ್ಶನವಾಗಿದೆ.