2025ರ ಆಗಸ್ಟ್‌ನಲ್ಲಿ ನಡೆಯಲಿರುವ ಬಾಂಗ್ಲಾದೇಶದ ಭಾರತದ ಬಹು ನಿರೀಕ್ಷಿತ ವೈಟ್-ಬಾಲ್ ಪ್ರವಾಸವು ಈಗ ಅನಿವಾರ್ಯವಾಗಿ ಮುಂದೂಡಿಕೆಯಾಗುತ್ತಿದೆ ಎನ್ನಲಾಗಿದೆ. ಭಾರತೀಯ ಕ್ರಿಕೆಟ್ ನಿಯಂತ್ರಣ ಮಂಡಳಿ (ಬಿಸಿಸಿಐ) ಅಥವಾ ಬಾಂಗ್ಲಾದೇಶ ಕ್ರಿಕೆಟ್ ಮಂಡಳಿ (ಬಿಸಿಬಿ) ಈ ಬಗ್ಗೆ ಅಧಿಕೃತ ದೃಢೀಕರಣ ನೀಡಿಲ್ಲವಾದರೂ, ಮೂರು ಏಕದಿನ ಮತ್ತು ಮೂರು ಟಿ20ಗಳನ್ನು ಒಳಗೊಂಡ ಆರು ಪಂದ್ಯಗಳ ಸರಣಿಯು ಯೋಜಿಸಿದಂತೆ ನಡೆಯುವುದು ಅನುಮಾನ ಎನ್ನಲಾಗಿದೆ. ಹೀಗಾಗಿ, ರೋಹಿತ್ ಶರ್ಮಾ ಮತ್ತು ವಿರಾಟ್ ಕೊಹ್ಲಿ 50 ಓವರ್‌ಗಳ ಏಕದಿನ ಮಾದರಿಯಲ್ಲಿ ಮಾತ್ರ ಆಡುತ್ತಿರುವುದರಿಂದ ಅವರನ್ನು ನೋಡಲು ಅಭಿಮಾನಿಗಳು ಮತ್ತಷ್ಟು ಕಾಯಬೇಕಾಗಿದೆ.

ಕ್ರಿಕ್‌ಬಜ್‌ ವರದಿ ಪ್ರಕಾರ, ಬಾಂಗ್ಲಾದೇಶ ಕ್ರಿಕೆಟ್ ಮಂಡಳಿಯು ತನ್ನ ಮಾಧ್ಯಮ ಹಕ್ಕುಗಳ ಟೆಂಡರ್ ಅನ್ನು ಸದ್ದಿಲ್ಲದೆ ನಿಲ್ಲಿಸಿದೆ. ಮೂಲತಃ ಇದು 2025–2027ರ ಸಂಪೂರ್ಣ ಅವಧಿಯನ್ನು ಒಳಗೊಳ್ಳಲು ನಿಗದಿಯಾಗಿತ್ತು. USD 3,000 ಇನ್ವಿಟೇಷನ್ ಟು ಟೆಂಡರ್‌ (ITT) ಡಾಕ್ಯುಮೆಂಟ್ ಸೇರಿದಂತೆ ಟೆಂಡರ್ ಪ್ರಕ್ರಿಯೆಯನ್ನು ಮುಂದೂಡಲಾಗಿದೆ. ಈ ಕಾರಣದಿಂದಾಗಿ, ಭಾರತೀಯ ಪ್ರಸಾರಕರು ಭಾರತ ಪ್ರವಾಸವು ಇದೀಗ ಸ್ಥಗಿತಗೊಂಡಿದೆ ಎಂಬುದಕ್ಕೆ ದೃಢೀಕರಣ ಎಂದು ವ್ಯಾಖ್ಯಾನಿಸುತ್ತಿದ್ದಾರೆ.

'ಭಾರತದ ಸರಣಿ ಇಲ್ಲ ಎಂದು ಅವರು ನಮಗೆ ತಿಳಿಸಿದ್ದಾರೆ. ಟೆಂಡರ್ ಘೋಷಿಸಿದ ನಂತರ, ಅವರು ಐಟಿಟಿಯನ್ನು ಒದಗಿಸಿಲ್ಲ. ಅವರು ಇದೀಗ ಪಾಕಿಸ್ತಾನ ಸರಣಿಗೆ ಮಾತ್ರ ಮಾರಾಟ ಮಾಡುತ್ತಿದ್ದಾರೆ' ಎಂದು ಭಾರತೀಯ ಪ್ರಸಾರಕರೊಬ್ಬರು ಕ್ರಿಕ್‌ಬಜ್‌ಗೆ ತಿಳಿಸಿದ್ದಾರೆ.

ಭಾರತ ಆಗಸ್ಟ್ 17 ರಿಂದ 23 ರವರೆಗೆ ಮೂರು ಏಕದಿನ ಪಂದ್ಯಗಳನ್ನು ಆಡಬೇಕಿತ್ತು. ನಂತರ ಆಗಸ್ಟ್ 26 ರಿಂದ 31 ರವರೆಗೆ ಟಿ 20 ಪಂದ್ಯಗಳನ್ನು ಆಡಬೇಕಿತ್ತು. ಆದಾಗ್ಯೂ, ಹೆಚ್ಚುತ್ತಿರುವ ರಾಜತಾಂತ್ರಿಕ ಉದ್ವಿಗ್ನತೆಗಳು ಮತ್ತು ಬಾಂಗ್ಲಾದೇಶದಲ್ಲಿ ಸರ್ಕಾರದಲ್ಲಿನ ಬದಲಾವಣೆಯು ಭಾರತದ ಬದ್ಧತೆಯ ಹಿಂಜರಿಕೆಯ ಮೇಲೆ ಪ್ರಭಾವ ಬೀರಿದೆ ಎಂದು ವರದಿಯಾಗಿದೆ.

ರಾಜತಾಂತ್ರಿಕವಾಗಿ ಒತ್ತಡಕ್ಕೊಳಗಾಗಿರುವ ನೆರೆಯ ರಾಷ್ಟ್ರಗಳಾದ ಪಾಕಿಸ್ತಾನ ಮತ್ತು ಬಾಂಗ್ಲಾದೇಶದೊಂದಿಗೆ ದ್ವಿಪಕ್ಷೀಯ ಮಾತುಕತೆ ನಡೆಸದಂತೆ ಭಾರತ ಸರ್ಕಾರವು ಸಲಹೆ ನೀಡಿದೆ ಎಂದು ಮೂಲಗಳು ಸೂಚಿಸುತ್ತವೆ. ಆದಾಗ್ಯೂ, ಏಷ್ಯಾ ಕಪ್‌ನಂತಹ ಬಹುಪಕ್ಷೀಯ ಕಾರ್ಯಕ್ರಮಗಳಲ್ಲಿ ಭಾಗವಹಿಸುವುದನ್ನು ಭಾರತ ಇನ್ನೂ ಪರಿಗಣಿಸುತ್ತಿದೆ ಎಂದು ವರದಿಯಾಗಿದೆ.

ಈಗ ಬಿಸಿಬಿ, ಪಾಕಿಸ್ತಾನ ಟಿ20 ಸರಣಿಗೆ (ಜುಲೈ 17–25) ಮಾತ್ರ ಮಾಧ್ಯಮ ಹಕ್ಕುಗಳನ್ನು ಮಾರಾಟ ಮಾಡಲು ಯೋಜಿಸಿದೆ. ಮೂಲತಃ ಮೂರು ಜಾಗತಿಕ ವಿಭಾಗಗಳಲ್ಲಿ ನೀಡಲಾಗುತ್ತಿದ್ದ 49 ತವರು ಪಂದ್ಯಗಳ ಹಕ್ಕುಗಳನ್ನು ಸಂಭಾವ್ಯ ಮರುಹೊಂದಿಕೆಗಾಗಿ ಸ್ಥಗಿತಗೊಳಿಸಿದೆ.

ಸದ್ಯ ಭಾರತದ ಬಾಂಗ್ಲಾದೇಶ ಪ್ರವಾಸವನ್ನು ಇನ್ನೂ ರದ್ದುಗೊಳಿಸಿಲ್ಲ. ಆದರೆ, ಸರ್ಕಾರದ ಅನುಮೋದನೆ ಮತ್ತು ಹೊಸ ವೇಳಾಪಟ್ಟಿ ಇಲ್ಲದೆ, ಸರಣಿಯನ್ನು ಮುಂದೂಡುವ ಸಾಧ್ಯತೆ ಹೆಚ್ಚಿದೆ. ಕುತೂಹಲಕಾರಿಯಾಗಿ, ಆಗಸ್ಟ್‌ನಲ್ಲಿ ನಡೆಯಬೇಕಿದ್ದ ವೇಳಾಪಟ್ಟಿಯಂತೆ ಬಿಸಿಸಿಐಗೆ ಸರಣಿಯನ್ನು ನಡೆಸಲು ಸಾಧ್ಯವಾಗದಿದ್ದರೆ ಬಾಂಗ್ಲಾದೇಶ ಈಗಾಗಲೇ ಪರ್ಯಾಯ ವೇಳಾಪಟ್ಟಿಯನ್ನು ಸಿದ್ಧಪಡಿಸುತ್ತಿದೆ.

ಏಕೆಂದರೆ, ಮೆನ್ ಇನ್ ಬ್ಲೂ ತಂಡವು ಜನವರಿ 2026 ರವರೆಗೆ ಸಾಕಷ್ಟು ಪಂದ್ಯಗಳನ್ನು ಹೊಂದಿದೆ. ಅದರ ನಂತರ, ಟಿ20 ವಿಶ್ವಕಪ್ 2026 ಮತ್ತು ಐಪಿಎಲ್ 2026 ಇವೆ. ಅದಕ್ಕೂ ಮೊದಲು, ಭಾರತ ಈಗಾಗಲೇ ಅನೇಕ ಟಿ 20 ಗಳನ್ನು ಆಡುತ್ತದೆ. ಆದ್ದರಿಂದ, ಮುಂದಿನ ತಿಂಗಳು ಭಾರತದ ಬಾಂಗ್ಲಾದೇಶ ಪ್ರವಾಸ ನಡೆಯದಿದ್ದರೆ, ಬಿಸಿಬಿ ಐಪಿಎಲ್ 2026 ರವರೆಗೆ ಕಾಯಬೇಕಾಗಬಹುದು.