ದುರದೃಷ್ಟಕರ ಬೆಳವಣಿಗೆಯೊಂದರಲ್ಲಿ, ಇಸ್ಲಾಮಾಬಾದ್ ಯುನೈಟೆಡ್ ವೇಗದ ಬೌಲರ್ ಮಿರ್ ಹಮ್ಜಾ ಸಜ್ಜದ್ ಅವರ ತಲೆಯ ಹಿಂಭಾಗಕ್ಕೆ ಪೆಟ್ಟು ಬಿದ್ದಿದ್ದು, ಆಸ್ಪತ್ರೆಗೆ ದಾಖಲಾಗಿದ್ದಾರೆ. ಹನೀಫ್ ಮೊಹಮ್ಮದ್ ಹೈ-ಪರ್ಫಾರ್ಮೆನ್ಸ್ ಸೆಂಟರ್ನಲ್ಲಿ ನೆಟ್ ಸೆಷನ್ನಲ್ಲಿ 24 ವರ್ಷದ ಆಟಗಾರನಿಗೆ ಹಿಂಬದಿಯಿಂದ ಹೊಡೆತ ಬಿದ್ದಿದ್ದು, ಸ್ವಲ್ಪ ಸಮಯದವರೆಗೆ ಪ್ರಜ್ಞೆ ತಪ್ಪಿದ್ದರು.
ಜಿಯೋ ಸೂಪರ್ ಪ್ರಕಾರ, ನ್ಯೂಜಿಲೆಂಡ್ ಬ್ಯಾಟ್ಸ್ಮನ್ ಮಾರ್ಕ್ ಚಪ್ಪನ್ ಅವರು ಆಡಿದ ತಪ್ಪು ಹೊಡೆತದಿಂದಾಗಿ ಸಜ್ಜದ್ ಅವರ ತಲೆಗೆ ಏಟು ಬಿದ್ದಿದ್ದು, ಕುಸಿದು ಬಿದ್ದಿದ್ದಾರೆ. ಈ ಘಟನೆಯಿಂದಾಗಿ ಅಭ್ಯಾಸ ಸ್ಥಗಿತಗೊಂಡಿತು. ವೇಗದ ಬೌಲರ್ ಅವರನ್ನು ವೈದ್ಯಕೀಯ ಮೌಲ್ಯಮಾಪನಕ್ಕಾಗಿ ತರಬೇತಿ ಸೌಲಭ್ಯದಿಂದ ಸುಮಾರು 3-4 ಕಿಮೀ ದೂರದಲ್ಲಿರುವ ಆಗಾ ಖಾನ್ ಆಸ್ಪತ್ರೆಗೆ ಕರೆದೊಯ್ಯಲಾಯಿತು.
ಸಜ್ಜದ್ ಅವರಿಗೆ ಪ್ರಜ್ಞೆ ಬಂದಿದ್ದು, ಜೀವಕ್ಕೆ ಯಾವುದೇ ತೊಂದರೆ ಇಲ್ಲ. ಸದ್ಯ ಅವರು ಸ್ಥಿರರಾಗಿದ್ದಾರೆ ಎಂದು ಇಸ್ಲಾಮಾಬಾದ್ ದೃಢಪಡಿಸಿದೆ. ಮುನ್ನೆಚ್ಚರಿಕೆ ಕ್ರಮವಾಗಿ, ವೇಗದ ಬೌಲರ್ ಕಂಪ್ಯೂಟೆಡ್ ಟೊಮೊಗ್ರಫಿ (CT) ಗೆ ಒಳಗಾಗಲಿದ್ದಾರೆ.
'ಇಂದು ಮುಂಜಾನೆ ತರಬೇತಿ ಅವಧಿಯಲ್ಲಿ, ಇಸ್ಲಾಮಾಬಾದ್ ಯುನೈಟೆಡ್ನ ಮಿರ್ ಹಮ್ಜಾ ಸಜ್ಜದ್ ಅವರ ತಲೆಗೆ ಪೆಟ್ಟು ಬಿದ್ದಿದೆ. ಅಭ್ಯಾಸದ ವೇಳೆ ಈ ಘಟನೆ ಸಂಭವಿಸಿದ್ದು, ತಕ್ಷಣವೇ ತರಬೇತಿಯನ್ನು ಸ್ಥಗಿತಗೊಳಿಸಿತು. ಅವರಿಗೆ ಸ್ಥಳದಲ್ಲೇ ವೈದ್ಯಕೀಯ ಸಿಬ್ಬಂದಿ ಚಿಕಿತ್ಸೆ ನೀಡಿದರು ಮತ್ತು ನಂತರ ಹೆಚ್ಚಿನ ಚಿಕಿತ್ಸೆಗಾಗಿ ಅಗಾ ಖಾನ್ ಆಸ್ಪತ್ರೆಗೆ ಸ್ಥಳಾಂತರಿಸಲಾಗಿದೆ. ಡಾ. ಓವೈಸ್, ಅರೆವೈದ್ಯರೊಂದಿಗೆ ಅವರ ಆರೈಕೆಯನ್ನು ನೋಡಿಕೊಳ್ಳುತ್ತಿದ್ದಾರೆ.
'ಮಿರ್ ಹಮ್ಜಾ ಸಜ್ಜದ್ ಅವರಿಗೆ ಪ್ರಜ್ಞೆ ಬಂದಿದೆ ಮತ್ತು ಸದ್ಯ ಅವರ ಆರೋಗ್ಯ ಸ್ಥಿರವಾಗಿದೆ. ಮುನ್ನೆಚ್ಚರಿಕೆ ಕ್ರಮವಾಗಿ ಶೀಘ್ರದಲ್ಲೇ ಸಿಟಿ ಸ್ಕ್ಯಾನ್ ಮಾಡಲಾಗುವುದು. ಇಡೀ ಇಸ್ಲಾಮಾಬಾದ್ ಯುನೈಟೆಡ್ ತಂಡವು ಹಮ್ಜಾ ಅವರ ತ್ವರಿತ ಚೇತರಿಕೆಗಾಗಿ ಪ್ರಾರ್ಥಿಸುತ್ತಿದೆ ಮತ್ತು ಈ ಸಮಯದಲ್ಲಿ ಅವರ ಬೆಂಬಲಕ್ಕೆ ದೃಢವಾಗಿ ನಿಂತಿದೆ. ಹೆಚ್ಚಿನ ನವೀಕರಣಗಳನ್ನು ಹಂತ ಹಂತವಾಗಿ ಹಂಚಿಕೊಳ್ಳಲಾಗುವುದು' ಎಂದು ಇಸ್ಲಾಮಾಬಾದ್ ಹೇಳಿಕೆಯಲ್ಲಿ ತಿಳಿಸಿದೆ.
ಇದು ಪಾಕಿಸ್ತಾನ ಸೂಪರ್ ಲೀಗ್ (ಪಿಎಸ್ಎಲ್) ನಲ್ಲಿ ಸಜ್ಜದ್ ಅವರ ಮೊದಲ ಆವೃತ್ತಿಯಾಗಿದೆ. ಅವರನ್ನು ಪಾಕಿಸ್ತಾನಿ ರೂಪಾಯಿ 70 ಲಕ್ಷಕ್ಕೆ ಹರಾಜಿನಲ್ಲಿ ಖರೀದಿಸಲಾಯಿತು. ಆದರೆ, ಇನ್ನೂ ಲೀಗ್ನಲ್ಲಿ ಪದಾರ್ಪಣೆ ಮಾಡಿಲ್ಲ. ಏಪ್ರಿಲ್ 9 ರಂದು ಲಾಹೋರ್ ಖಲಂದರ್ ವಿರುದ್ಧ ನಡೆಯಲಿರುವ ಪಂದ್ಯಕ್ಕೆ ಇಸ್ಲಾಮಾಬಾದ್ ತಂಡದ ಭಾಗವಾಗಲು ಅವರಿಗೆ ವೈದ್ಯಕೀಯವಾಗಿ ಅನುಮತಿ ಸಿಗುತ್ತದೆಯೇ ಎಂಬುದು ಖಚಿತವಿಲ್ಲ.