ಕೋಲ್ಕತ್ತಾ: ಬಿಸಿಸಿಐ ಸೂಚನೆ ಮೇರೆಗೆ ಬಾಂಗ್ಲಾದೇಶದ ವೇಗಿ ಮುಸ್ತಾಫಿಜುರ್ ರೆಹಮಾನ್ ಅವರನ್ನು ಕೋಲ್ಕತ್ತಾ ನೈಟ್ ರೈಡರ್ಸ್ (ಕೆಕೆಆರ್) ತಂಡದಿಂದ ಬಿಡುಗಡೆ ಮಾಡಿದ ನಂತರ, ಐಪಿಎಲ್ 2026ನೇ ಆವೃತ್ತಿಯ ಅವರ ಒಪ್ಪಂದವನ್ನು ರದ್ದುಗೊಳಿಸುವಲ್ಲಿ ಅವರ ಪಾತ್ರವಿಲ್ಲದಿದ್ದರೂ, ಯಾವುದೇ ಹಣಕಾಸಿನ ಪರಿಹಾರ ಪಡೆಯುವ ಸಾಧ್ಯತೆ ಕಡಿಮೆ ಎನ್ನಲಾಗಿದೆ.

ಚೆನ್ನೈ ಸೂಪರ್ ಕಿಂಗ್ಸ್ (CSK) ಮತ್ತು ದೆಹಲಿ ಕ್ಯಾಪಿಟಲ್ಸ್‌ (DC) ನಿಂದ ಸ್ಪರ್ಧಾತ್ಮಕ ಬಿಡ್‌ಗಳ ನಂತರ ಐಪಿಎಲ್ ಹರಾಜಿನಲ್ಲಿ ಮುಸ್ತಾಫಿಜುರ್ ಅವರನ್ನು ಕೆಕೆಆರ್ ₹ 9.20 ಕೋಟಿಗೆ ಖರೀದಿಸಿತು.

ಭಾರತೀಯ ಕ್ರಿಕೆಟ್ ಮಂಡಳಿಯು ತನ್ನ ನಿರ್ಧಾರಕ್ಕೆ ಕಾರಣಗಳನ್ನು ನಿರ್ದಿಷ್ಟಪಡಿಸಿಲ್ಲವಾದರೂ, 'ಸುತ್ತಮುತ್ತಲಿನ ಬೆಳವಣಿಗೆಗಳಿಂದ' ಈ ಕ್ರಮ ಅಗತ್ಯವಾಗಿದೆ ಎಂದು ಹೇಳಿದೆ.

ಇದಕ್ಕೆ ಪ್ರತಿಕ್ರಿಯಿಸಿರುವ ಬಾಂಗ್ಲಾದೇಶ ಕ್ರಿಕೆಟ್ ಮಂಡಳಿಯು, ಬಾಂಗ್ಲಾದೇಶದ ಆಟಗಾರರಿಗೆ ಭಾರತವು ಸುರಕ್ಷಿತವಲ್ಲದ ಕಾರಣ, T20 ವಿಶ್ವಕಪ್ ಪಂದ್ಯಗಳನ್ನು ಭಾರತದಿಂದ ಹೊರಗೆ ಶ್ರೀಲಂಕಾಕ್ಕೆ ಸ್ಥಳಾಂತರಿಸಬೇಕೆಂದು ಒತ್ತಾಯಿಸಿದೆ.

ಈ ಕ್ರಮವು ಆಟಗಾರರ ಹಕ್ಕುಗಳ ಬಗ್ಗೆ ಚರ್ಚೆಯನ್ನು ಹುಟ್ಟುಹಾಕಿದೆ. ವಿಶೇಷವಾಗಿ ಮುಸ್ತಾಫಿಜುರ್ ಸ್ವಯಂಪ್ರೇರಣೆಯಿಂದ ಸ್ಪರ್ಧೆಯಿಂದ ಹಿಂದೆ ಸರಿದಿಲ್ಲ ಅಥವಾ ಯಾವುದೇ ತಪ್ಪು ಆರೋಪ ಹೊತ್ತುಕೊಂಡಿಲ್ಲ. ಹೀಗಾಗಿ, ಅಸ್ತಿತ್ವದಲ್ಲಿರುವ ವಿಮಾ ಚೌಕಟ್ಟು ಪರಿಹಾರಕ್ಕೆ ಕಡಿಮೆ ಅವಕಾಶ ನೀಡುತ್ತದೆ ಎಂದು ಮೂಲಗಳು ಹೇಳಿವೆ.

'ಎಲ್ಲ ಐಪಿಎಲ್ ಆಟಗಾರರ ಸಂಬಳವನ್ನು ವಿಮೆಯಿಂದ ರಕ್ಷಿಸಲಾಗುತ್ತದೆ. ವಿದೇಶಿ ಆಟಗಾರರಿಗೆ, ತಂಡದ ಶಿಬಿರಕ್ಕೆ ಸೇರಿದ ನಂತರ ಅಥವಾ ಪಂದ್ಯಾವಳಿ ನಡೆಯುತ್ತಿರುವಾಗ ಅವರು ಗಾಯಗೊಂಡರೆ, ಫ್ರಾಂಚೈಸಿ ಸಾಮಾನ್ಯವಾಗಿ ಈ ವಿಮೆಯ ಮೂಲಕ ಪಾವತಿಯನ್ನು ಭರಿಸುತ್ತದೆ. ಹೆಚ್ಚಿನ ಆಟಗಾರರಿಗೆ, ಅವರು ಗಾಯಗೊಂಡರೆ ವಿಮೆಯು ಅವರ ಸಂಬಳದ ಅರ್ಧದಷ್ಟು (ಶೇ 50) ಮಾತ್ರ ಒಳಗೊಳ್ಳುತ್ತದೆ. ಆದಾಗ್ಯೂ, ಸೆಂಟ್ರಲ್ ಒಪ್ಪಂದ ಹೊಂದಿರುವ ಭಾರತೀಯ ಆಟಗಾರರು ಉತ್ತಮ ಸ್ಥಿತಿಯಲ್ಲಿದ್ದಾರೆ. ಏಕೆಂದರೆ, ಬಿಸಿಸಿಐ ಸಾಮಾನ್ಯವಾಗಿ ಅವರು ಗಾಯಗೊಂಡಾಗಲೂ ಅವರಿಗೆ ಸಂಪೂರ್ಣವಾಗಿ ಪಾವತಿಸುತ್ತದೆ' ಎಂದು ಐಪಿಎಲ್‌ನ ಬಗ್ಗೆ ತಿಳಿದಿರುವ ಮೂಲವೊಂದು ಪಿಟಿಐಗೆ ತಿಳಿಸಿದೆ.

ಆದಾಗ್ಯೂ, ಮುಸ್ತಾಫಿಜುರ್ ಪ್ರಕರಣವು ಪ್ರಮಾಣಿತ ವಿಮಾ ಷರತ್ತುಗಳ ಅಡಿಯಲ್ಲಿ ಬರುವುದಿಲ್ಲ. ಗಾಯ ಅಥವಾ ಲೀಗ್‌ನಲ್ಲಿ ಭಾಗವಹಿಸುವಿಕೆಗೆ ಸಂಬಂಧಿಸಿದ ಕ್ರಿಕೆಟ್ ಕಾರಣದಿಂದ ಬಿಡುಗಡೆ ಆಗಿಲ್ಲದ ಕಾರಣ, ಒಪ್ಪಂದದಡಿಯಲ್ಲಿ KKR ಅವರಿಗೆ ಯಾವುದೇ ಮೊತ್ತವನ್ನು ಪಾವತಿಸಲು ಬದ್ಧವಾಗಿಲ್ಲ.

'ವಿಮಾ ಕ್ಲೇಮ್‌ನ ಸಂದರ್ಭದಲ್ಲಿ, ಈ ಸದ್ಯದ ಪರಿಸ್ಥಿತಿ ಒಳಗೊಳ್ಳುವುದಿಲ್ಲ. ಆದ್ದರಿಂದ KKR ಒಂದು ಪೈಸೆಯನ್ನೂ ಪಾವತಿಸಲು ಯಾವುದೇ ಅಧಿಕೃತ ಬಾಧ್ಯತೆಯನ್ನು ಹೊಂದಿಲ್ಲ'.

'ಇದು ದುರದೃಷ್ಟಕರ, ಆದರೆ ಮುಸ್ತಾಫಿಜುರ್‌ಗೆ ಕಾನೂನು ಮಾರ್ಗವನ್ನು ಆರಿಸಿಕೊಳ್ಳುವುದನ್ನು ಬಿಟ್ಟು ಹೆಚ್ಚಿನ ಆಯ್ಕೆಗಳಿಲ್ಲ ಮತ್ತು ಅದೂ ಸಹ ಐಪಿಎಲ್ ಭಾರತೀಯ ಕಾನೂನು ವ್ಯಾಪ್ತಿಗೆ ಬರುತ್ತದೆ. ಯಾವುದೇ ವಿದೇಶಿ ಕ್ರಿಕೆಟಿಗರು ಇದರ ಮೂಲಕ ಹೋಗಲು ಅಥವಾ ಕ್ರೀಡಾ ಮಧ್ಯಸ್ಥಿಕೆ ನ್ಯಾಯಾಲಯ (ಸಿಎಎಸ್) ಮಾರ್ಗವನ್ನು ಅನುಸರಿಸಲು ಬಯಸುವುದಿಲ್ಲ' ಎಂದು ಮೂಲಗಳು ತಿಳಿಸಿವೆ.

'ಭಾರತ-ಬಾಂಗ್ಲಾದೇಶದ ರಾಜಕೀಯ ಸನ್ನಿವೇಶವು ಭಾರತ-ಪಾಕ್‌ಗಿಂತ ಹೆಚ್ಚು ಅಸ್ಥಿರವಾಗಿದೆ ಮತ್ತು ಅದು ಮುಂದಿನ ವರ್ಷ ಬದಲಾಗಬಹುದು. ಹೀಗಿರುವಾಗ, ಒಬ್ಬರು ಕಾನೂನು ಸಹಾಯದ ಅಪಾಯವನ್ನು ಏಕೆ ತೆಗೆದುಕೊಳ್ಳಬೇಕು' ಎಂದು ಮೂಲಗಳು ತಿಳಿಸಿವೆ.