ಅಹಮದಾಬಾದ್: ಸತತ 2ನೇ ಬಾರಿಗೆ ಆರ್ ಸಿಬಿ ಚಾಂಪಿಯನ್ ಆದ ನಂತರ ತಂಡದ ಸಾಧನೆ ಬಗ್ಗೆ ಕೃನಾಲ್ ಪಾಂಡ್ಯ ಸಂತೋಷ ವ್ಯಕ್ತಪಡಿಸಿದ್ದು, ಪ್ರತಿ ಐಪಿಎಲ್ ಟ್ರೋಫಿಯೂ ವಿಶೇಷ" ಎಂದಿದ್ದಾರೆ.

ಐಪಿಎಲ್ ನಲ್ಲಿ ಅತ್ಯುತ್ತಮ ಸಾಧನೆ ಮಾಡಿದವರಲ್ಲಿ ಕೃನಾಲ್ ಪಾಂಡ್ಯ ಕೂಡಾ ಒಬ್ಬರಾಗಿದ್ದಾರೆ. ಆರ್ ಸಿಬಿ ಸತತ ಎರಡನೇ ಬಾರಿಗೆ ಟ್ರೋಫಿ ಮುಡಿಗೇರಿಸಿಕೊಂಡಿದ್ದು, ತಂಡದ ಯಶಸ್ಸಿನಲ್ಲಿ ಕೃನಾಲ್ ಪಾಂಡ್ಯ ನಿರ್ಣಾಯಕ ಪಾತ್ರ ವಹಿಸಿದ್ದಾರೆ. ಈ ಹಿಂದೆ ಅವರು ಮುಂಬೈ ಇಂಡಿಯನ್ಸ್ ತಂಡದಲ್ಲಿದ್ದಾಗ ಮೂರು ಬಾರಿ ಐಪಿಎಲ್ ಪ್ರಶಸ್ತಿ ಗೆದ್ದುಕೊಂಡಿತ್ತು.

ಈ ಬಾರಿ ಕೃನಾಲ್ ಒಂಬತ್ತು ಪಂದ್ಯಗಳಲ್ಲಿ 37.66 ಸರಾಸರಿ ಮತ್ತು 145.80 ಸ್ಟ್ರೈಕ್ ರೇಟ್‌ನಲ್ಲಿ 226 ರನ್ ಗಳಿಸಿದರು. ಇದರಲ್ಲಿ ಒಂದು ಅರ್ಧ ಶತಕ ಸೇರಿದ್ದು, ಅತಿ ಹೆಚ್ಚು 73 ರನ್ ಗಳಿಸಿದ್ದರು. ಅಲ್ಲದೇ 30.55 ಸರಾಸರಿಯಲ್ಲಿ 14 ವಿಕೆಟ್‌ಗಳನ್ನು ಸಹ ಪಡೆದಿದ್ದಾರೆ. ಫೈನಲ್‌ನಲ್ಲಿ ನಾಲ್ಕು ಓವರ್‌ಗಳಲ್ಲಿ 1 ವಿಕೆಟ್ ಪಡೆದಿದ್ದರು.

ಪಂದ್ಯದ ನಂತರ ಮಾತನಾಡಿದ ಕ್ರುನಾಲ್, "ಇದರ ಬಗ್ಗೆ ಯಾವುದೇ ಸಂದೇಹವಿಲ್ಲ, ಪ್ರತಿಯೊಂದು ಐಪಿಎಲ್ ಟ್ರೋಫಿಯೂ ವಿಶೇಷವಾಗಿದೆ. ಯಾವುದು ಹೆಚ್ಚು ಎಂದು ಆಯ್ಕೆ ಮಾಡಲು ಸಾಧ್ಯವಿಲ್ಲ. ಐಪಿಎಲ್ ಟ್ರೋಫಿಗಳಂತೆಯೇ ಎಲ್ಲವೂ ತುಂಬಾ ಕಷ್ಟಪಟ್ಟು ಸಂಪಾದಿಸಲ್ಪಟ್ಟಿದೆ. 11 ವರ್ಷಗಳಲ್ಲಿ ಐದು ಟ್ರೋಫಿ ಗೆದ್ದ ತಂಡದಲ್ಲಿ ಇರುವುದು ನನಗೆ ತುಂಬಾ ವಿಶೇಷವಾಗಿದೆ ಎಂದು ಅವರು ಹೇಳಿದ್ದಾರೆ.

ಕಳೆದ ಎರಡು ಆವೃತ್ತಿಗಳಲ್ಲಿ ಆರ್‌ಸಿಬಿಯಲ್ಲಿನ ಅವರ ಪಾತ್ರದ ಬಗ್ಗೆ ಬ್ಯಾಟಿಂಗ್ ಕೋಚ್ ಮತ್ತು ಮಾರ್ಗದರ್ಶಕ ದಿನೇಶ್ ಕಾರ್ತಿಕ್, ನಿರ್ದೇಶಕ ಮೊ ಬೊಬಾಟ್ ಮತ್ತು ಮುಖ್ಯ ಕೋಚ್ ಆಂಡಿ ಫ್ಲವರ್ ಅವರ ತರಬೇತಿ ಮತ್ತು ಸಹಾಯಕ ಸಿಬ್ಬಂದಿಯ ನೆರವಿಗೆ ಕೃತಜ್ಞತೆ ಸಲ್ಲಿಸಿದರು.

ಕೆಲವೊಮ್ಮೆ ಹರಾಜಿನಲ್ಲಿಯೇ ತಂಡ ಅರ್ಧದಷ್ಟು ಗೆಲ್ಲುತ್ತದೆ. ಅವರು ಒಳ್ಳೆಯ ಕೆಲಸ ಮಾಡಿದ್ದಾರೆಂದು ಭಾವಿಸುತ್ತೇನೆ. ಬಳಿಕ ಹೊರಗೆ ಉತ್ತಮ ಪ್ರದರ್ಶನ ನೀಡುವುದು ನಮ್ಮ ಜವಾಬ್ದಾರಿಯಾಗಿತ್ತು. ಸತತವಾಗಿ ಟ್ರೋಫಿ ಹಿಡಿದಿಟ್ಟುಕೊಳ್ಳಲು ಸಾಧ್ಯವಾಯಿತು ಎಂದು ಸಂತೋಷವಾಗಿದೆ. ಈ ಎಲ್ಲಾ 18 ವರ್ಷಗಳ ಕಾಯುವಿಕೆ ತದನಂತರ ಎರಡು ಸತತ ಟ್ರೋಫಿಗಳನ್ನು ಗೆದ್ದಿದ್ದು, ಎಲ್ಲವೂ ಆರ್‌ಸಿಬಿ ಅಭಿಮಾನಿಗಳಿಗೆ. ನಾವು ಎಲ್ಲಿಗೆ ಹೋದರೂ, ಅವರು ನಮ್ಮನ್ನು ಬೆಂಬಲಿಸಿದ್ದಾರೆ. ಮತ್ತು ಸ್ಪಷ್ಟವಾಗಿ ವಿರಾಟ್‌ಗೂ ಸಹ, ಬಹಳ ವಿಶೇಷ. ಸತತ ಎರಡು ಟ್ರೋಫಿ ಗೆದ್ದಿರುವುದು ಅದ್ಭುತವಾಗಿದೆ ಎಂದು ಅವರು ಹೇಳಿದ್ದಾರೆ.