ಆರ್ಸಿಬಿ ತಂಡ ತಮ್ಮ ಹೃದಯಕ್ಕೆ ಯಾವಾಗಲೂ ಹತ್ತಿರ ಎಂಬುದನ್ನು ಮತ್ತೊಮ್ಮೆ ವಿರಾಟ್ ಕೊಹ್ಲಿ ಸಾಬೀತುಪಡಿಸಿದ್ದಾರೆ. ತಂಡವನ್ನು ಸತತ ಎರಡನೇ ಐಪಿಎಲ್ ಪ್ರಶಸ್ತಿಯತ್ತ ಮುನ್ನಡೆಸಿದ ಬಳಿಕ ಭಾವನಾತ್ಮಕ ಸಂದೇಶವೊಂದನ್ನು ಹಂಚಿಕೊಂಡಿದ್ದು, ಅದು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ.
ವಿರಾಟ್ ಕೊಹ್ಲಿ ಅವರ ನಾಯಕತ್ವದಲ್ಲಿ Royal Challengers Bengaluru ತಂಡವು 2026ರ ಐಪಿಎಲ್ ಫೈನಲ್ನಲ್ಲಿ ಗುಜರಾತ್ ಟೈಟಾನ್ಸ್ ವಿರುದ್ಧ ಐದು ವಿಕೆಟ್ಗಳ ಗೆಲುವು ಸಾಧಿಸಿ ಸತತ ಎರಡನೇ ಬಾರಿಗೆ ಪ್ರಶಸ್ತಿ ಮುಡಿಗೇರಿತು.
ಫೈನಲ್ ಗೆಲುವಿನ ಸುಮಾರು ಒಂದು ವಾರದ ಬಳಿಕ ವಿರಾಟ್ ಕೊಹ್ಲಿ ಸಾಮಾಜಿಕ ಜಾಲತಾಣದಲ್ಲಿ ತಮ್ಮ ಭಾವನೆಗಳನ್ನು ಹಂಚಿಕೊಂಡಿದ್ದಾರೆ.
"ಅಚಲ ನಂಬಿಕೆಯಿಂದ ಈ ಬಾರಿಯ ಐಪಿಎಲ್ ಸೀಸನ್ ಆರಂಭಿಸಿದ್ದೆವು. ಸತತ ಎರಡು ಪ್ರಶಸ್ತಿಗಳೊಂದಿಗೆ ಮುಗಿಸಿದೆವು. ಈ ತಂಡ ಒಟ್ಟಾಗಿ ಪ್ರತಿಯೊಂದು ಭಾವನೆಯನ್ನು ಅನುಭವಿಸಿದೆ. ಸಂತೋಷದ ಕ್ಷಣಗಳು, ಒತ್ತಡ, ಸವಾಲುಗಳು ಮತ್ತು ಅಚಲ ಬೆಂಬಲ—ಎಲ್ಲವನ್ನೂ ಒಟ್ಟಾಗಿ ಎದುರಿಸಿದ್ದೇವೆ. ಇದು ಇನ್ನಷ್ಟು ವಿಶೇಷವಾಗಿ ಭಾಸವಾಗುತ್ತಿದೆ, ಏಕೆಂದರೆ... ಈ ಸ್ಥಳವೇ ನನ್ನ ಮನೆ!" ಎಂದು ವಿರಾಟ್ ಕೊಹ್ಲಿ ಸೋಷಿಯಲ್ ಮೀಡಿಯಾದಲ್ಲಿ ಬರೆದುಕೊಂಡಿದ್ದಾರೆ.
ಫೈನಲ್ ಪಂದ್ಯದಲ್ಲಿ ಆರ್ಸಿಬಿ ಮೊದಲು ಗುಜರಾತ್ ಟೈಟನ್ಸ್ ತಂಡವನ್ನು 155/8 ಮೊತ್ತಕ್ಕೆ ನಿಯಂತ್ರಿಸಿತು. ಬಳಿಕ 18 ಓವರ್ಗಳಲ್ಲಿ ಗುರಿ ತಲುಪಿ ಸುಲಭವಾಗಿ ಗೆಲುವು ದಾಖಲಿಸಿತು. ವಿರಾಟ್ ಕೊಹ್ಲಿ 42 ಎಸೆತಗಳಲ್ಲಿ ಅಜೇಯ 75 ರನ್ಗಳನ್ನು ಗಳಿಸಿ ಮಿಂಚಿದರು. ಅವರ ಇನ್ನಿಂಗ್ಸ್ನಲ್ಲಿ ಒಂಬತ್ತು ಬೌಂಡರಿ ಹಾಗೂ ಮೂರು ಸಿಕ್ಸರ್ ಒಳಗೊಂಡಿದ್ದವು. ಪ್ರಶಸ್ತಿ ಗೆಲುವಿಗೆ ಕಾರಣವಾದ ಅಂತಿಮ ಹೊಡೆತವೂ ಅವರ ಬ್ಯಾಟ್ನಿಂದಲೇ ಹೊರಬಂದಿತು.
2025ರಲ್ಲಿ ಮೊದಲ ಬಾರಿಗೆ ಐಪಿಎಲ್ ಟ್ರೋಫಿ ಗೆದ್ದಿದ್ದ ಆರ್ಸಿಬಿ, ಇದೀಗ ಸತತ ಎರಡನೇ ವರ್ಷವೂ ಚಾಂಪಿಯನ್ ಆಗಿದೆ. ಕಳೆದ ವರ್ಷದಂತೆ ಈ ಬಾರಿ ಫೈನಲ್ನಲ್ಲಿ ಅಷ್ಟೊಂದು ಒತ್ತಡ ಇರಲಿಲ್ಲ ಎಂದು ವಿರಾಟ್ ಕೊಹ್ಲಿ ಹೇಳಿದರು.
ಕಳೆದ ವರ್ಷದಂತೆಯೇ ಒತ್ತಡ ಈ ಬಾರಿ ಅನುಭವವಾಗಲಿಲ್ಲ ಎಂದು ನಾನು ಕೆಲ ಆಟಗಾರರಿಗೆ ಹೇಳಿದ್ದೆ. ನಮ್ಮ ತಂಡದ ಸಾಮರ್ಥ್ಯ ಏನು ಎಂಬುದು ನಮಗೆ ತಿಳಿದಿತ್ತು. ನಾವು ಅಂಕಪಟ್ಟಿಯಲ್ಲಿ ಅಗ್ರಸ್ಥಾನ ಪಡೆದಿದ್ದೆವು. ಮೊದಲ ಸ್ಥಾನದಲ್ಲಿದ್ದದ್ದಕ್ಕೆ ಕಾರಣವೂ ಅದೇ ಎಂದು ಹೇಳಿಕೊಂಡಿದ್ದಾರೆ.
2008ರಿಂದ ಆರ್ ಸಿಬಿ ನಂಟು
2008ರಲ್ಲಿ ಐಪಿಎಲ್ ಆರಂಭವಾದಾಗಿನಿಂದಲೇ ಆರ್ಸಿಬಿಯನ್ನು ಪ್ರತಿನಿಧಿಸುತ್ತಿರುವ ವಿರಾಟ್ ಕೊಹ್ಲಿ ಮತ್ತು ಫ್ರಾಂಚೈಸಿಯ ನಡುವಿನ ಬಾಂಧವ್ಯ ವಿಶೇಷವಾಗಿದೆ. ಅವರ "HOME" ಸಂದೇಶ ಅಭಿಮಾನಿಗಳ ಮನಸ್ಸನ್ನು ಮುಟ್ಟಿದ್ದು, ಐಪಿಎಲ್ ಪೂರ್ತಿ ಆರ್ಸಿಬಿ ಜೆರ್ಸಿಯಲ್ಲೇ ಅವರನ್ನು ಕಂಡಿರುವ ಅಭಿಮಾನಿಗಳು ಅದನ್ನು ಭಾವನಾತ್ಮಕವಾಗಿ ಸ್ವೀಕರಿಸಿದ್ದಾರೆ.
38ನೇ ವಯಸ್ಸಿನ ಸಮೀಪದಲ್ಲಿರುವ ವಿರಾಟ್ ಕೊಹ್ಲಿ ತಮ್ಮ ಆಟದಲ್ಲಿ ಬದಲಾವಣೆಗಳನ್ನು ಅಳವಡಿಸಿಕೊಳ್ಳುವ ಅಗತ್ಯದ ಬಗ್ಗೆ ಮಾತನಾಡಿದ್ದಾರೆ.
"ಇಂದಿನ ಕ್ರೀಡೆಯ ಬೇಡಿಕೆ ಅಂಥದ್ದಾಗಿದೆ. ಯುವ ಆಟಗಾರರು ನಿರಂತರವಾಗಿ ನಿಮಗೆ ಸವಾಲು ಹಾಕುತ್ತಾರೆ, ನಿಮ್ಮ ಆಟವನ್ನು ಮತ್ತಷ್ಟು ಉತ್ತಮಗೊಳಿಸಲು ಪ್ರೇರೇಪಿಸುತ್ತಾರೆ. ಇದು ರೋಚಕ ಪರಿಸ್ಥಿತಿ, ಏಕೆಂದರೆ ಅದು ನಿಮಗೆ ಸುಧಾರಿಸಿಕೊಳ್ಳಲು ಮತ್ತು ಹೊಸ ಗುರಿಗಳತ್ತ ಕೆಲಸ ಮಾಡಲು ಅವಕಾಶ ನೀಡುತ್ತದೆ ಎಂದು ಹೇಳಿದ್ದಾರೆ.