ಕೋಲ್ಕತಾ: ಐಪಿಎಲ್ ಟೂರ್ನಿಯ ಇಂದಿನ ಪಂದ್ಯದಲ್ಲಿ ಮುಂಬೈ ಇಂಡಿಯನ್ಸ್ ವಿರುದ್ಧ ಕೋಲ್ಕತಾ ನೈಟ್ ರೈಡರ್ಸ್ ತಂಡ ಗೆಲುವು ಸಾಧಿಸಿದ್ದು, ಪ್ಲೇಆಫ್ ಸಸ್ಪನ್ಸ್ ಮುಂದುವರೆದಿದೆ.

ಕೋಲ್ಕತಾದ ಈಡೆನ್ ಗಾರ್ಡನ್ ಕ್ರೀಡಾಂಗಣದಲ್ಲಿ ಇಂದು ನಡೆದ ಪಂದ್ಯದಲ್ಲಿ ಮುಂಬೈ ಇಂಡಿಯನ್ಸ್ ನೀಡಿದ್ದ 148 ರನ್ ಗಳ ಸಾಧಾರಣ ಗುರಿ ಬೆನ್ನು ಹತ್ತಿದ ಕೋಲ್ಕತಾ ನೈಟ್ ರೈಡರ್ಸ್ ತಂಡ 18.5 ಓವರ್ ನಲ್ಲಿ 6 ವಿಕೆಟ್ ನಷ್ಟಕ್ಕೆ 148 ರನ್ ಪೇರಿಸಿ 4 ವಿಕೆಟ್ ಅಂತರದಲ್ಲಿ ಗೆದ್ದು ಬೀಗಿತು.

ಕೋಲ್ಕತಾ ಪರ ಕನ್ನಡಿಗ ಮನೀಷ್ ಪಾಂಡೆ (45) ಮತ್ತು ರೋಮನ್ ಪೊವೆಲ್ (40) ಉತ್ತಮ ಬ್ಯಾಟಿಂಗ್ ನಡೆಸಿ ತಂಡದ ಗೆಲುವಿನಲ್ಲಿ ಮಹತ್ತರ ಪಾತ್ರವಹಿಸಿದರಾದರೂ ಇಬ್ಬರೂ ಕೆಲವೇ ರನ್ ಗಳ ಅಂತರದಲ್ಲಿ ಅರ್ಧಶತಕ ಮಿಸ್ ಮಾಡಿಕೊಂಡರು. ಅಂತಿಮವಾಗಿ ರಿಂಕು ಸಿಂಗ್ (ಅಜೇಯ 9) ಮತ್ತು ಅನುಕುಲ್ ರಾಯ್ (ಅಜೇಯ 4) ಗೆಲುವಿನ ಔಪಚಾರಿಕತೆ ಪೂರ್ಣಗೊಳಿಸಿದರು.

ರನ್ ಗಳಿಸಲು ತಿಣುಕಾಡಿದ ಮುಂಬೈ ಇಂಡಿಯನ್ಸ್

ಇದಕ್ಕೂ ಮೊದಲು ಟಾಸ್ ಸೋತರೂ ಮೊದಲು ಬ್ಯಾಟಿಂಗ್ ಮಾಡಿದ ಮುಂಬೈ ಇಂಡಿಯನ್ಸ್ ತಂಡ ಅಕ್ಷರಶಃ ಬ್ಯಾಟಿಂಗ್ ಮಾಡಲು ಪರದಾಡಿತು. ಆರಂಭಿಕ ಆಟಗಾರರಾದ ರ್ಯಾನ್ ರಿಕಲ್ಟನ್ (6) ರೋಹಿತ್ ಶರ್ಮಾ (15) ಬೇಗನೆ ವಿಕೆಟ್ ಒಪ್ಪಿಸಿದರು.

ಬಳಿಕ ಬಂದ ನಮನ್ ಧೀರ್ ಶೂನ್ಯ ಸುತ್ತಿದರೆ, ಸೂರ್ಯ ಕುಮಾರ್ ಯಾದವ್ 15 ರನ್ ಗಳಿಸಿ ಔಟಾದರು. ತಿಲಕ್ ವರ್ಮಾ 20, ನಾಯಕ ಹಾರ್ದಿಕ್ ಪಾಂಡ್ಯಾ 26, ವಿಲ್ ಜ್ಯಾಕ್ಸ್ 14, ದೀಪಕ್ ಚಹರ್ 10 ರನ್ ಗಳಿಸಿದರು. ಕಾರ್ಬಿನ್ ಬಾಷ್ ಕೇವಲ 18 ಎಸೆತಗಳ್ಲಲಿ ಅಜೇಯ 32 ರನ್ ಗಳಿಸಿ ಕೋಲ್ಕತಾಗೆ ಪ್ರತಿರೋಧ ತೋರಿದರು.

ಕೋಲ್ಕತಾ ಪರ ಸೌರಭ್ ದುಬೆ, ಕೆಮರೂನ್ ಗ್ರೀನ್, ಕಾರ್ತಿಕ್ ತ್ಯಾಗಿ ತಲಾ 2 ವಿಕೆಟ್ ಪಡೆದರೆ, ಸುನಿಲ್ ನರೈನ್ 1 ವಿಕೆಟ್ ಪಡೆದರು.

ಮುಂದುವರೆದ ಪ್ಲೇಆಫ್ ಸಸ್ಪನ್ಸ್!

ಈ ಗೆಲುವಿನೊಂದಿಗೆ ಕೋಲ್ಕತಾ ತಂಡ 2 ಅಂಕ ಪಡೆದಿದ್ದು, ಅಂತೆಯೇ ಟೂರ್ನಿಯಲ್ಲಿ ಪ್ಲೇಆಫ್ ಸಸ್ಪನ್ಸ್ ಮುಂದುವರೆದಿದೆ. ಈಗಾಗಲೇ ಆರ್ ಸಿಬಿ, ಗುಜರಾತ್ ಟೈಟನ್ಸ್ ಮತ್ತು ಸನ್ ರೈಸರ್ಸ್ ಹೈದರಾಬಾದ್ ಪ್ಲೇಆಫ್ ಗೇರಿದೆ. ಉಳಿದಿರುವ ಒಂದು ಸ್ಥಾನಕ್ಕೆ 5 ತಂಡಗಳ ನಡುವೆ ಪೈಪೋಟಿ ಏರ್ಪಟ್ಟಿದೆ. ಕೋಲ್ಕತಾ ಇನ್ನೊಂದು ಲೀಗ್ ಪಂದ್ಯಗಳು ಬಾಕಿ ಇದ್ದು, ಪ್ರಸ್ತುತ 13 ಅಂಕಗಳನ್ನು ಹೊಂದಿದ್ದು, 6ನೇ ಸ್ಥಾನದಲ್ಲಿದೆ.