ಭಾರತದ ಮಾಜಿ ಕ್ರಿಕೆಟಿಗ ಮತ್ತು ನಿರೂಪಕ ಆಕಾಶ್ ಚೋಪ್ರಾ ಐಪಿಎಲ್ 2027ರ ಆವೃತ್ತಿಗೂ ಮುನ್ನ ಡೆಲ್ಲಿ ಕ್ಯಾಪಿಟಲ್ಸ್ (DC) ತಂಡದ ಬಗ್ಗೆ ಕೆಲವು ದೊಡ್ಡ ಪ್ರಶ್ನೆಗಳನ್ನು ಎತ್ತಿದ್ದಾರೆ. ನಾಯಕ ಯಾರೆಂದು ನಿರ್ಧರಿಸುವುದರಿಂದ ಹಿಡಿದು ವೇಗದ ಬೌಲಿಂಗ್ ದಾಳಿಯನ್ನು ಸರಿಪಡಿಸುವವರೆಗೆ, ತಂಡವು ಇನ್ನೂ ಪರಿಹರಿಸಬೇಕಾದ ಸಾಕಷ್ಟು ಒಗಟುಗಳಿವೆ ಎಂದು ಚೋಪ್ರಾ ನಂಬಿದ್ದಾರೆ. ತಂಡವನ್ನು ಯಾರು ಮುನ್ನಡೆಸುತ್ತಾರೆ ಎಂಬುದು ಈಗಿರುವ ದೊಡ್ಡ ಪ್ರಶ್ನೆಯಾಗಿದೆ. ಕೆಎಲ್ ರಾಹುಲ್ ತಂಡದಲ್ಲಿದ್ದು, ಈಗ ರಿಷಭ್ ಪಂತ್ ಕೂಡ ತಂಡಕ್ಕೆ ಮರಳಿರುವುದರಿಂದ, ಡೆಲ್ಲಿಗೆ ಆಯ್ಕೆಗಳಿವೆ. ವಿಶೇಷವಾಗಿ ಅಕ್ಷರ್ ಪಟೇಲ್ ಈ ಹುದ್ದೆಯನ್ನು ಬಯಸುವುದಿಲ್ಲ ಎಂದು ವರದಿಯಾಗಿದೆ. ಲಕ್ನೋ ಸೂಪರ್ ಜೈಂಟ್ಸ್‌ನಿಂದ ಹಿಂತಿರುಗಿದ ಪಂತ್ ನಾಯಕತ್ವದ ಪಾತ್ರವನ್ನು ವಹಿಸಿಕೊಳ್ಳಲು ಇಚ್ಛಿಸದಿದ್ದರೂ, ರಾಹುಲ್ ನಂಬರ್ 1 ಅಭ್ಯರ್ಥಿಯಾಗಿ ಹೊರಹೊಮ್ಮಿದ್ದಾರೆ.
'ವಾಸ್ತವವಾಗಿ ಇಲ್ಲಿ ಹಲವು ಪ್ರಶ್ನೆಗಳಿವೆ. ಇದೊಂದು ರೀತಿಯ 'ಬಹು ಆಯ್ಕೆಯ ಪ್ರಶ್ನೆ' (MCQ) ಇದ್ದಂತಿದೆ; ಏಕೆಂದರೆ ನಾಯಕ ಯಾರು? ರಿಷಬ್ ಪಂತ್ ನಾಯಕತ್ವದ ಅಭ್ಯರ್ಥಿಯಾಗಿದ್ದಾರೆ, ಕೆಎಲ್ ರಾಹುಲ್ ಕೂಡ ಒಂದು ಆಯ್ಕೆಯಾಗಿದ್ದಾರೆ. ಇನ್ನು ಅಕ್ಷರ್ ಅವರಿಗೆ ನಾಯಕರಾಗಲು ಇಷ್ಟವಿಲ್ಲ ಎಂದು ನಾನು ಕೇಳಪಟ್ಟಿದ್ದೇನೆ. ಹೀಗಾಗಿ, ನಡೆಯುತ್ತಿರುವ ಬೆಳವಣಿಗೆಗಳನ್ನು ಗಮನಿಸಿದರೆ, ತಂಡವನ್ನು ಯಾರು ಮುನ್ನಡೆಸುತ್ತಾರೆ ಎಂಬುದು ಯಾರಿಗೂ ತಿಳಿದಿಲ್ಲ. ಸದ್ಯದ ಪರಿಸ್ಥಿತಿಯಲ್ಲಿ ಕೆಎಲ್ ರಾಹುಲ್ ನಾಯಕರಾಗುವ ಸಾಧ್ಯತೆಯೇ ಹೆಚ್ಚಿದೆ' ಎಂದರು.
ಪಂತ್‌ಗೆ ಬದಲಾಗಿ ಸ್ಟಾರ್ ಸ್ಪಿನ್ನರ್ ಕುಲದೀಪ್ ಯಾದವ್ ಅವರನ್ನು ಲಕ್ನೋ ಸೂಪರ್ ಜೈಂಟ್ಸ್‌ಗೆ (LSG) ನೀಡುವ ಮೂಲಕ ದೆಹಲಿ ತಂಡವು ಒಂದು ದೊಡ್ಡ ಬದಲಾವಣೆಯನ್ನು ಮಾಡಿಕೊಂಡಿದೆ.
'ಇನ್ನು ರಿಷಬ್ ಪಂತ್ ವಿಷಯಕ್ಕೆ ಬಂದರೆ, ಅವರನ್ನು ತಂಡಕ್ಕೆ ಸೇರಿಸಿಕೊಂಡ ಮೇಲೆ, ಅವರು ಖಂಡಿತವಾಗಿಯೂ ಅಗ್ರ ನಾಲ್ಕು ಕ್ರಮಾಂಕದೊಳಗೆ ಬ್ಯಾಟಿಂಗ್ ಮಾಡಬೇಕು. ಒಂದು ವೇಳೆ ಅವರನ್ನು ಅದಕ್ಕಿಂತ ಕೆಳಗಿನ ಕ್ರಮಾಂಕದಲ್ಲಿ ಕಳುಹಿಸಿದರೆ, ಅವರ ಸಾಮರ್ಥ್ಯವನ್ನು ಸಂಪೂರ್ಣವಾಗಿ ಬಳಸಿಕೊಂಡಂತಾಗುವುದಿಲ್ಲ. ಈ ಟ್ರೇಡ್‌ನಲ್ಲಿ ಲಕ್ನೋ ಸೂಪರ್ ಜೈಂಟ್ಸ್ (LSG) ಹೆಚ್ಚು ಲಾಭದಾಯಕ ಸ್ಥಿತಿಯಲ್ಲಿದೆ ಎಂದು ನನಗೆ ಅನ್ನಿಸುತ್ತದೆ; ಏಕೆಂದರೆ, ಆ ಪಿಚ್‌ಗೆ ಕುಲದೀಪ್ ಅವರಂತಹ ದರ್ಜೆಯ ಬೌಲರ್‌ಗಿಂತ ಉತ್ತಮ ಆಯ್ಕೆ ಇನ್ನೊಂದಿರಲು ಸಾಧ್ಯವೇ ಇಲ್ಲ' ಎಂದು ಅವರು ಹೇಳಿದರು.
'ಅಶುತೋಷ್ ಶರ್ಮಾ, ಸಮೀರ್ ರಿಜ್ವಿ, ಟ್ರಿಸ್ಟಾನ್ ಸ್ಟಬ್ಸ್, ಜೊತೆಗೆ ಅಕ್ಷರ್ ಪಟೇಲ್ ಇದ್ದಾರೆ, ಹಾಗೆಯೇ ಡೇವಿಡ್ ಮಿಲ್ಲರ್ ಕೂಡ ಇದ್ದಾರೆ. ಹೀಗಾಗಿ, ಇದೊಂದು ಉತ್ತಮ ತಂಡದ ರಚನೆ. ಆದರೆ, ಇವರಿಗೆ ಬೌಲಿಂಗ್ ವಿಭಾಗವು ಸಮಸ್ಯೆಯಾಗಬಹುದು. ಏಕೆಂದರೆ, ಮಿಚೆಲ್ ಸ್ಟಾರ್ಕ್ ಆಡುತ್ತಾರೆಯೇ? ಅವರು ಆಡಲು ಲಭ್ಯವಿರುತ್ತಾರೋ ಇಲ್ಲವೋ ಎಂಬುದು ಚರ್ಚೆಯ ವಿಷಯವಾಗಿದೆ. ಈ ಆವೃತ್ತಿಯಲ್ಲಿ ಅವರ ವೇಗದ ಬೌಲಿಂಗ್ ವಿಭಾಗದಲ್ಲಿ ಸಮಸ್ಯೆ ಎದುರಾಗಲಿದೆ; ಇದನ್ನು ಅವರು ಹೇಗೆ ನಿಭಾಯಿಸಲು ಯೋಜಿಸಿದ್ದಾರೆ ಎಂಬುದು ನನಗೆ ತಿಳಿದಿಲ್ಲ' ಎಂದು ಹೇಳಿದರು.
'ಮುಕೇಶ್ ಅವರಿಗೆ ಎಂಟು ಕೋಟಿ, ಔಕಿಬ್ ನಬಿಗೆ ₹8.4 ಕೋಟಿ ಮತ್ತು ಮಿಚೆಲ್ ಸ್ಟಾರ್ಕ್ಗೆ ಸುಮಾರು ₹12 ಕೋಟಿ ನೀಡಲಾಗಿದೆ; ಹೀಗೆ ಒಟ್ಟಾರೆ ದೊಡ್ಡ ಮೊತ್ತವೇ ಖರ್ಚಾಗಿದೆ. ಲುಂಗಿ ಎನ್ಗಿಡಿ ಕೇವಲ ₹2 ಕೋಟಿಗೆ ಸಿಕ್ಕರು, ಇದು ಅತ್ಯಂತ ಲಾಭದಾಯಕ ಖರೀದಿಯಾಯಿತು. ದುಷ್ಮಂತ್ ಚಮೀರಾ ಮತ್ತು ಕೈಲ್ ಜೇಮಿಸನ್ ಕೂಡ ಅಷ್ಟೇನೂ ದುಬಾರಿಯಾಗಿರಲಿಲ್ಲ. ಆದರೆ, ಹೆಚ್ಚು ಬೆಲೆ ನೀಡಿ ಖರೀದಿಸಿದ ಆಟಗಾರರು ಲಭ್ಯವಿರುತ್ತಾರೆಯೇ ಎಂಬುದು ಖಚಿತವಿಲ್ಲ. ಅವರ ಹಿಂದಿನ ಸಾಧನೆ ಮತ್ತು ಸದ್ಯದ ಫಾರ್ಮ್ ಬಗ್ಗೆ ಅನಿಶ್ಚಿತತೆಯಿದೆ; ಅಲ್ಲದೆ, ಮುಕೇಶ್ ಕುಮಾರ್ ಅವರ ಟಿ20 ಪ್ರದರ್ಶನದ ಅಂಕಿಅಂಶಗಳು ಇತ್ತೀಚೆಗೆ ಸ್ವಲ್ಪ ಕುಸಿದಿವೆ' ಎಂದು ಅವರು ಹೇಳಿದರು.