ಐಪಿಎಲ್ ಹರಾಜಿನಲ್ಲಿ ಕೋಲ್ಕತ್ತಾ ನೈಟ್ ರೈಡರ್ಸ್ (KKR) ತಂಡವು ನಾಯಕತ್ವಕ್ಕಾಗಿ ವಿದೇಶಿ ಆಟಗಾರನೊಬ್ಬನನ್ನು ಪಡೆಯಲು ವಿಫಲವಾದರೆ, ಬ್ಯಾಟರ್ ರಿಂಕು ಸಿಂಗ್ ಅವರಿಗೆ ನಾಯಕತ್ವದ ಜವಾಬ್ದಾರಿಯನ್ನು ನೀಡುವ ಬಗ್ಗೆ ಪರಿಗಣಿಸಬೇಕು ಎಂದು ಭಾರತೀಯ ಮಾಜಿ ಕ್ರಿಕೆಟಿಗ ಆಕಾಶ್ ಚೋಪ್ರಾ ಹೇಳಿದ್ದಾರೆ. ಈ ವರ್ಷದ ಡಿಸೆಂಬರ್ 16 ರಂದು ಐಪಿಎಲ್ 2027ರ ಹರಾಜು ನಡೆಯಲಿರುವ ಹಿನ್ನೆಲೆಯಲ್ಲಿ, ಜಿಯೋಸ್ಟಾರ್‌ನ 'ಗೇಮ್ ಪ್ಲಾನ್' ಕಾರ್ಯಕ್ರಮದಲ್ಲಿ ಆಕಾಶ್ ಚೋಪ್ರಾ ಈ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.

ಅಜಿಂಕ್ಯ ರಹಾನೆ ನಾಯಕತ್ವದಲ್ಲಿ ಮೂರು ಬಾರಿಯ ಚಾಂಪಿಯನ್ ತಂಡವು ಈ ಆವೃತ್ತಿಯಲ್ಲಿ ಏಳನೇ ಸ್ಥಾನಕ್ಕೆ ತೃಪ್ತಿಪಟ್ಟುಕೊಂಡಿತ್ತು. ರಹಾನೆ ಇದೀಗ ನಿವೃತ್ತರಾಗಿದ್ದಾರೆ. ಜೊತೆಗೆ, ತಂಡವು ಪ್ರಮುಖ ಆಟಗಾರರ ಲಭ್ಯತೆಯ ಬಗ್ಗೆಯೂ ಚಿಂತೆಯಲ್ಲಿದೆ; ಕ್ಯಾಮರೂನ್ ಗ್ರೀನ್ ಅವರು ಮುಂದಿನ ವರ್ಷ 50 ಓವರ್‌ಗಳ ವಿಶ್ವಕಪ್ ಮತ್ತು 'ದಿ ಆಶಸ್' ಸರಣಿಯಲ್ಲಿ ನಿರತರಾಗಬಹುದು. ಹಾಗೆಯೇ, ಶ್ರೀಲಂಕಾದ ವೇಗದ ಬೌಲರ್ ಮತಿಶಾ ಪತಿರಾಣಾ ಕೂಡ ಗಾಯದ ಸಮಸ್ಯೆಯಿಂದಾಗಿ ಮೇ ತಿಂಗಳಿನಿಂದ ಯಾವುದೇ ಪಂದ್ಯದಲ್ಲಿ ಆಡಿಲ್ಲ.

'KKR ತಂಡವು ಗ್ರೀನ್ ಮತ್ತು ಪತಿರಾಣಾ ಅವರನ್ನು ಕೈಬಿಡುವ ಬಗ್ಗೆ ಯೋಚಿಸಬೇಕು; ಹೀಗೆ ಮಾಡುವುದರಿಂದ ಅವರ ಬಳಿ ₹43 ಕೋಟಿ ಮೊತ್ತ ಉಳಿಯಲಿದೆ ಎಂದು ಹೇಳಿದರು.

'ನಾನು ₹25.2 ಕೋಟಿ ಮೌಲ್ಯದ ಕ್ಯಾಮರೂನ್ ಗ್ರೀನ್ ಅವರನ್ನು ತಂಡದಿಂದ ಕೈಬಿಡಲು ಯೋಚಿಸುತ್ತಿದ್ದೇನೆ. ಮುಂದಿನ ವರ್ಷ ಏಕದಿನ ವಿಶ್ವಕಪ್ ಮತ್ತು ಆಶಸ್ ಸರಣಿ ನಡೆಯುವುದರಿಂದ, ಅವರು ಲಭ್ಯವಿರುತ್ತಾರೆಯೇ ಅಥವಾ ಎಷ್ಟು ಪಂದ್ಯಗಳನ್ನು ಆಡುತ್ತಾರೆ ಎಂಬುದು ಖಚಿತವಿಲ್ಲ. ಅವರನ್ನು ತಂಡದಿಂದ ಬಿಡುಗಡೆ ಮಾಡಿದರೂ, ಒಂದು ವೇಳೆ ಮತ್ತೆ ಖರೀದಿಸಬೇಕೆಂದು ಅನಿಸಿದರೆ, ನೀವು ಅವರನ್ನು ಶೇ 50ರಷ್ಟು ಕಡಿಮೆ ಬೆಲೆಗೆ ಸುಲಭವಾಗಿ ಮರಳಿ ಪಡೆಯಬಹುದು. ಎರಡನೆಯದಾಗಿ, ಮತೀಶಾ ಪತಿರಾಣಾ ಕೂಡ ಆಡುತ್ತಿಲ್ಲ, ಹೀಗಾಗಿ ಅವರ ಮೇಲಿನ ₹18 ಕೋಟಿ ಹೂಡಿಕೆಯೂ ವ್ಯರ್ಥವಾಗಲಿದೆ. ಈ ಹರಾಜಿನಲ್ಲಿ ಕೆಕೆಆರ್ ತಂಡವು ಅತಿ ಹೆಚ್ಚು ಹಣದೊಂದಿಗೆ ಭಾಗವಹಿಸುವ ಸಾಧ್ಯತೆಯಿದೆ, ಆದ್ದರಿಂದ ಇದೇ ಪ್ರಮುಖ ವಿಷಯವಾಗಲಿದೆ' ಎಂದು ಅವರು ಹೇಳಿದರು.

'ಮುಸ್ತಾಫಿಜುರ್ ರೆಹಮಾನ್ ಅವರ ವಿಷಯದಲ್ಲಿ ಏನಾಗಲಿದೆ ಎಂಬುದು ನಮಗೆ ತಿಳಿದಿಲ್ಲ. ಅವರು ಲಭ್ಯವಿದ್ದು ಆಡಲು ಸಾಧ್ಯವಾದರೆ, ಅವರನ್ನು ತಂಡದಲ್ಲಿ ಉಳಿಸಿಕೊಳ್ಳಲು ನೀವು ಬಯಸುತ್ತೀರಿ; ಆದರೆ ಅವರು ಆಡಲು ಸಾಧ್ಯವೇ? ಆ ಬಗ್ಗೆ ನಮಗೆ ಖಚಿತವಿಲ್ಲ. ಒಂದು ವೇಳೆ ಅವರು ಆಡಲು ಸಾಧ್ಯವಾದರೆ, ನಾನು ಅವರನ್ನು ತಂಡದಲ್ಲಿ ಉಳಿಸಿಕೊಳ್ಳುತ್ತಿದ್ದೆ, ಏಕೆಂದರೆ ಇಬ್ಬರು ಆಟಗಾರರನ್ನು ಕೈಬಿಟ್ಟಿದ್ದರಿಂದ ನಿಮ್ಮ ಬಳಿ ಈಗಾಗಲೇ 43 ಕೋಟಿ ರೂಪಾಯಿಗಳ ಹೆಚ್ಚುವರಿ ಮೊತ್ತವಿದೆ' ಎಂದು ಅವರು ಹೇಳಿದರು.

'ರಿಂಕು ಸಿಂಗ್ ಅವರನ್ನು ನಾಯಕರನ್ನಾಗಿ ನೇಮಿಸಿ. ನೀವು ಈಗಾಗಲೇ ಅವರನ್ನು ಉಪನಾಯಕರನ್ನಾಗಿ ಮಾಡಿದ್ದೀರಿ, ಅಲ್ಲವೇ? ಹಾಗಾದರೆ ಈಗ ಅವರನ್ನು ನಾಯಕರನ್ನಾಗಿ ಮಾಡಿ. ಅವರು ಯುಪಿಟಿ20 ನಲ್ಲಿ ತಮ್ಮ ತಂಡವನ್ನು ಮುನ್ನಡೆಸಿದ್ದಾರೆ. ಕೆಲವೊಮ್ಮೆ ವ್ಯಕ್ತಿಗಳನ್ನು ನೇರವಾಗಿ ಕಠಿಣ ಸವಾಲಿನ ಸನ್ನಿವೇಶಕ್ಕೆ ತಳ್ಳಿ, ಏನಾಗುತ್ತದೆ ಎಂದು ನೋಡಬೇಕಾಗುತ್ತದೆ. ಹರಾಜಿನಲ್ಲಿ ಬೇರೆ ಯಾರಾದರೂ ಸೂಕ್ತ ಆಟಗಾರ ಸಿಗದಿದ್ದರೆ, ರಿಂಕು ಅವರಿಗೆ ಈ ಅವಕಾಶ ನೀಡಬಹುದು. ಒಂದು ವೇಳೆ ಬೇರೆ ಯಾರೂ ಸಿಗದಿದ್ದರೆ, ವಿದೇಶಿ ಆಟಗಾರರ ಕಡೆಗೆ ನೋಡುವ ಬದಲು, ನಾನು ಖಂಡಿತವಾಗಿಯೂ ರಿಂಕು ಅವರನ್ನೇ ಆಯ್ಕೆ ಮಾಡುತ್ತೇನೆ' ಎಂದು ಅವರು ಹೇಳಿದರು.