ಬೆಂಗಳೂರು: ವಿರಾಟ್ ಕೊಹ್ಲಿ ಹಾಗೂ ದಕ್ಷಿಣ ಆಫ್ರಿಕಾದ ಮಾಜಿ ನಾಯಕ ಎಬಿ ಡಿವಿಲಿಯರ್ಸ್ ನಡುವಿನ ಸ್ನೇಹ ಕ್ರಿಕೆಟ್ ಮೈದಾನವನ್ನೂ ಮೀರಿದ್ದು, IPL ನಲ್ಲಿ ರಾಯಲ್‌ ಚಾಲೆಂಜರ್ಸ್‌ ಬೆಂಗಳೂರು (ಆರ್‌ಸಿಬಿ) ಪರ ಒಟ್ಟಿಗೆ ಆಡಿದ ಬಳಿಕ ಇಬ್ಬರ ಸ್ನೇಹ ಮತ್ತಷ್ಟು ಗಟ್ಟಿಯಾಯಿತು.
ಆದರೆ, ಕೊಹ್ಲಿಯನ್ನು ಮೊದಲ ಬಾರಿ ಭೇಟಿಯಾದಾಗ ಅವರ ಬಗ್ಗೆ ತಮಗೆ ಅಷ್ಟೇನೂ ಉತ್ತಮ ಅಭಿಪ್ರಾಯ ಮೂಡಿರಲಿಲ್ಲ ಎಂಬುದನ್ನು ಡಿವಿಲಿಯರ್ಸ್ ಇದೀಗ ಬಹಿರಂಗಪಡಿಸಿದ್ದಾರೆ.
ಪ್ರಖರ್‌ ಗುಪ್ತಾ ಅವರ ಪಾಡ್‌ಕಾಸ್ಟ್‌ನಲ್ಲಿ ಮಾತನಾಡಿದ ಎಬಿ ಡಿವಿಲಿಯರ್ಸ್, ಆರಂಭದಲ್ಲಿ ವಿರಾಟ್ ಕೊಹ್ಲಿ ತಮಗೆ ಅಹಂಕಾರಿ ಹಾಗೂ ಜಂಬದ ವ್ಯಕ್ತಿಯಂತೆ ಕಂಡಿದ್ದರು ಎಂದು ಹೇಳಿದ್ದಾರೆ.
ಈ ಬಗ್ಗೆ ಕೇಳಿದಾಗ, “ಹೌದು, ಕೊಹ್ಲಿ ಕೂಡ ಇದನ್ನು ಒಪ್ಪಿಕೊಳ್ಳಬಹುದು ಎಂದು ಭಾವಿಸುತ್ತೇನೆ” ಎಂದು ಪ್ರತಿಕ್ರಿಯಿಸಿದ್ದಾರೆ.
ಕೊಹ್ಲಿಯ ಆತ್ಮವಿಶ್ವಾಸವೇ ಅಹಂಕಾರದಂತೆ ಕಂಡಿತ್ತು!
ಕೊಹ್ಲಿ ಬಗ್ಗೆ ಆರಂಭದಲ್ಲಿ ಹಾಗೆ ಅನಿಸಲು ಕಾರಣವೇನು ಎಂಬ ಪ್ರಶ್ನೆಗೆ ಉತ್ತರಿಸಿದ ಡಿವಿಲಿಯರ್ಸ್, ಅವರಲ್ಲಿದ್ದ ಅಪಾರ ಆತ್ಮವಿಶ್ವಾಸವೇ ಅದಕ್ಕೆ ಕಾರಣ ಎಂದು ವಿವರಿಸಿದ್ದಾರೆ.
“ಅವರಲ್ಲಿ ಹೆಚ್ಚಿನ ಆತ್ಮವಿಶ್ವಾಸವಿತ್ತು. ಅವರು ಯಾವಾಗಲೂ ಅದೇ ರೀತಿಯಲ್ಲಿ ಕ್ರಿಕೆಟ್ ಆಡುತ್ತಿದ್ದರು. ಕೆಲವೊಮ್ಮೆ ಅದನ್ನು ತಪ್ಪಾಗಿ ಅರ್ಥೈಸಿಕೊಳ್ಳಲಾಗುತ್ತದೆ. ನನ್ನ ವಿಚಾರದಲ್ಲೂ ಅದೇ ಆಯಿತು. ಅವರು ಅಗತ್ಯಕ್ಕಿಂತ ಹೆಚ್ಚು ಆತ್ಮವಿಶ್ವಾಸ ಹೊಂದಿರುವಂತೆ ಕಾಣುತ್ತಿದ್ದರು” ಎಂದು ಎಬಿಡಿ ಹೇಳಿದ್ದಾರೆ.
ಕೊಹ್ಲಿ 19, 20 ಹಾಗೂ 21ರ ಹರೆಯದಲ್ಲಿದ್ದಾಗ ತುಂಬಾ ಆತ್ಮವಿಶ್ವಾಸದಿಂದ ಇರುತ್ತಿದ್ದರು. ಆದರೆ, ಯಶಸ್ಸಿನ ಉತ್ತುಂಗಕ್ಕೇರಲು ಅಂತಹ ಆತ್ಮವಿಶ್ವಾಸವೂ ಅಗತ್ಯ ಎಂದು ಅವರು ಅಭಿಪ್ರಾಯಪಟ್ಟಿದ್ದಾರೆ.
“ಅದು ನನ್ನ ಮೊದಲ ಅನಿಸಿಕೆಯಾಗಿತ್ತು. ನಾನು ಇದನ್ನು ತಮಾಷೆಯ ಧಾಟಿಯಲ್ಲಿಯೂ ಹೇಳುತ್ತೇನೆ. ಆದರೆ, ಕೊಹ್ಲಿ ಕೂಡ ಇದನ್ನು ಒಪ್ಪಿಕೊಳ್ಳಬಹುದು ಎಂದು ಭಾವಿಸುತ್ತೇನೆ. ಆ ವಯಸ್ಸಿನಲ್ಲಿ ಅವರು ತುಂಬಾ ಆತ್ಮವಿಶ್ವಾಸ ಹೊಂದಿದ್ದ ಯುವ ಆಟಗಾರರಾಗಿದ್ದರು. ದೊಡ್ಡ ಯಶಸ್ಸು ಗಳಿಸಲು ನಿಮ್ಮ ಸಾಮರ್ಥ್ಯದ ಮೇಲೆ ನಂಬಿಕೆ ಇರುವುದು ಬಹಳ ಮುಖ್ಯ. ವರ್ಷಗಳು ಕಳೆದಂತೆ ಆ ಆತ್ಮವಿಶ್ವಾಸವನ್ನು ಹೇಗೆ ನಿರ್ವಹಿಸಬೇಕು ಎಂಬುದನ್ನು ಕಲಿಯುತ್ತೀರಿ” ಎಂದು ಡಿವಿಲಿಯರ್ಸ್ ಹೇಳಿದ್ದಾರೆ.
ಯಶಸ್ಸಿನೊಂದಿಗೆ ಬದಲಾದ ಕೊಹ್ಲಿ ವ್ಯಕ್ತಿತ್ವ
ಕ್ರಿಕೆಟ್‌ನಲ್ಲಿ ಯಶಸ್ಸಿನ ಮೆಟ್ಟಿಲುಗಳನ್ನು ಏರುತ್ತಾ ಹೋದಂತೆ ಕೊಹ್ಲಿಯ ವ್ಯಕ್ತಿತ್ವದಲ್ಲೂ ಬದಲಾವಣೆ ಕಂಡುಬಂತು ಎಂದು ದಕ್ಷಿಣ ಆಫ್ರಿಕಾದ ಮಾಜಿ ನಾಯಕ ತಿಳಿಸಿದ್ದಾರೆ.
“ವಯಸ್ಸು ಹೆಚ್ಚಾದಂತೆ, ವ್ಯಕ್ತಿಯಾಗಿ ಹಾಗೂ ಕ್ರಿಕೆಟಿಗನಾಗಿ ಹೆಚ್ಚು ಸಮತೋಲನ ಸಾಧಿಸಿದಂತೆ ಆ ಅಹಂಕಾರದ ಭಾವನೆ ಕಡಿಮೆಯಾಯಿತು. ಯುವ ಆಟಗಾರನಾಗಿದ್ದಾಗ ಅವರಿಗೆ ತಮ್ಮನ್ನು ತಾವು ಸಾಬೀತುಪಡಿಸಬೇಕಾದ ಬಹಳಷ್ಟು ಸಂಗತಿಗಳಿದ್ದವು. ಕಾಲಕ್ರಮೇಣ ಅದು ಕಡಿಮೆಯಾಯಿತು. ಜನರೊಂದಿಗೆ ವರ್ತಿಸುವಾಗ ಅತಿಯಾದ ಆತ್ಮವಿಶ್ವಾಸ ತೋರಿಸುವ ಸ್ವಭಾವವೂ ಬದಲಾಯಿತು” ಎಂದು ಎಬಿ ಡಿವಿಲಿಯರ್ಸ್ ವಿವರಿಸಿದ್ದಾರೆ.
ವಿರಾಟ್ ಕೊಹ್ಲಿ ಹಾಗೂ ಎಬಿ ಡಿವಿಲಿಯರ್ಸ್ ಆರ್‌ಸಿಬಿ ಪರ ಹಲವು ವರ್ಷಗಳ ಕಾಲ ಒಟ್ಟಿಗೆ ಆಡಿದ್ದು, ಇಬ್ಬರ ನಡುವಿನ ಸ್ನೇಹ ಕ್ರಿಕೆಟ್ ಅಭಿಮಾನಿಗಳಲ್ಲಿಯೂ ಜನಪ್ರಿಯವಾಗಿದೆ. ಕೊಹ್ಲಿ ಅವರ ಆರಂಭದ ದಿನಗಳ ವ್ಯಕ್ತಿತ್ವದ ಬಗ್ಗೆ ಡಿವಿಲಿಯರ್ಸ್ ನೀಡಿರುವ ಈ ಹೇಳಿಕೆ ಇದೀಗ ಗಮನ ಸೆಳೆದಿದೆ.