ಸೋಮವಾರ ದಿಮಾಪುರದಲ್ಲಿ ನಡೆದ ನಾಗಾಲ್ಯಾಂಡ್ ವಿರುದ್ಧದ ರಣಜಿ ಟ್ರೋಫಿ 2025-26ರ ಪ್ಲೇಟ್ ಪಂದ್ಯದಲ್ಲಿ ಮಿಜೋರಾಂ ಬ್ಯಾಟ್ಸ್‌ಮನ್ ಚಿನ್ಮಯ್ ಸುತಾರ್ ಇತಿಹಾಸ ನಿರ್ಮಿಸಿದ್ದಾರೆ. ಟಾಸ್ ಸೋತು ಮೊದಲು ಬ್ಯಾಟಿಂಗ್ ಮಾಡಿದ ಮಿಜೋರಾಂ 2ನೇ ದಿನದಂದು 581/9ಕ್ಕೆ ತಮ್ಮ ಮೊದಲ ಇನಿಂಗ್ಸ್ ಅನ್ನು ಡಿಕ್ಲೇರ್ ಮಾಡಿಕೊಂಡಿತು. ಇದಕ್ಕೆ ಸುತಾರ್ ಅವರ 400 ರನ್‌ಗಳ ಅದ್ಭುತ ಬ್ಯಾಟಿಂಗ್ ಕಾರಣ. ಈ ಇನಿಂಗ್ಸ್‌ನೊಂದಿಗೆ, ಸುತಾರ್ ರಣಜಿ ಟ್ರೋಫಿ ಇತಿಹಾಸದಲ್ಲಿ ಇನಿಂಗ್ಸ್‌ವೊಂದರಲ್ಲಿ 400 ರನ್ ಗಳಿಸಿದ ಎರಡನೇ ಬ್ಯಾಟ್ಸ್‌ಮನ್ ಎನಿಸಿಕೊಂಡರು. ಈ ಸಾಧನೆ ಮಾಡಿದ ಮೊದಲಿಗರು ಮಹಾರಾಷ್ಟ್ರದ ಬಿಬಿ ನಿಂಬಾಳ್ಕರ್ ಆಗಿದ್ದು, ಅವರು 1948 ರಲ್ಲಿ ಪುಣೆ ವಿರುದ್ಧ 443* ರನ್ ಗಳಿಸಿದ್ದರು.

ನಿಂಬಾಳ್ಕರ್ ಅವರ ಅಜೇಯ 443 ರನ್ ನಂತರ ರಣಜಿ ಟ್ರೋಫಿ ಇತಿಹಾಸದಲ್ಲಿ ಸುತಾರ್ ಈಗ ಎರಡನೇ ಅತಿ ಹೆಚ್ಚು ವೈಯಕ್ತಿಕ ಸ್ಕೋರ್ ಗಳಿಸಿದ ಆಟಗಾರನಾಗಿದ್ದಾರೆ. ಭಾರತದ ಮಾಜಿ ಆರಂಭಿಕ ಆಟಗಾರ ಪೃಥ್ವಿ ಶಾ 2022-23ರ ಆವೃತ್ತಿಯಲ್ಲಿ ಅಸ್ಸಾಂ ವಿರುದ್ಧ ಮುಂಬೈ ಪರ 379 ರನ್ ಗಳಿಸಿ ಮೂರನೇ ಸ್ಥಾನದಲ್ಲಿದ್ದಾರೆ.

ಭಾರತದ ಮಾಜಿ ಬ್ಯಾಟ್ಸ್‌ಮನ್ ಸಂಜಯ್ ಮಂಜ್ರೇಕರ್, 1990-91ರ ರಣಜಿ ಟ್ರೋಫಿ ಆವೃತ್ತಿಯಲ್ಲಿ ಹೈದರಾಬಾದ್ ವಿರುದ್ಧ ಮುಂಬೈ ಪರ 366 ರನ್ ಗಳಿಸಿ ನಾಲ್ಕನೇ ಸ್ಥಾನದಲ್ಲಿದ್ದಾರೆ. 1993-94ರ ಆವೃತ್ತಿಯಲ್ಲಿ ಆಂಧ್ರಪ್ರದೇಶ ವಿರುದ್ಧ ಹೈದರಾಬಾದ್ ಪರ 344 ರನ್ ಗಳಿಸುವ ಮೂಲಕ ಎಂವಿ ಶ್ರೀಧರ್ ಅಗ್ರ ಐವರ ಪಟ್ಟಿಯಲ್ಲಿ ಸ್ಥಾನ ಪಡೆದಿದ್ದಾರೆ.

ಒಟ್ಟಾರೆಯಾಗಿ, ಸುತಾರ್ ಪ್ರಥಮ ದರ್ಜೆ ಕ್ರಿಕೆಟ್ ಇತಿಹಾಸದಲ್ಲಿ ಇನಿಂಗ್ಸ್‌ವೊಂದರಲ್ಲಿ 400 ರನ್ ಗಳಿಸಿದ 10ನೇ ಆಟಗಾರರಾದರು. ಬ್ರಿಯಾನ್ ಲಾರಾ, ಡಾನ್ ಬ್ರಾಡ್ಮನ್ ಮತ್ತು ಇತರ ಹಲವಾರು ಶ್ರೇಷ್ಠ ಆಟಗಾರರನ್ನು ಒಳಗೊಂಡ ಗಣ್ಯರಿರುವ ಪಟ್ಟಿಯಲ್ಲಿ ಸ್ಥಾನ ಪಡೆದಿದ್ದಾರೆ. ಡರ್ಹ್ಯಾಮ್ ವಿರುದ್ಧ ವಾರ್ವಿಕ್‌ಷೈರ್ ಪರ 501* ರನ್ ಗಳಿಸಿ ಲಾರಾ ಪಟ್ಟಿಯಲ್ಲಿ ಅಗ್ರಸ್ಥಾನದಲ್ಲಿದ್ದಾರೆ.

ಅವರ ಇನಿಂಗ್ಸ್ 46 ಬೌಂಡರಿಗಳು ಮತ್ತು ಏಳು ಸಿಕ್ಸರ್‌ಗಳಿಂದ ತುಂಬಿತ್ತು. ಸುತಾರ್ ಜೊತೆಗೆ, ಜೆಹು ಆಂಡರ್ಸನ್ 69 ರನ್‌ಗಳ ಕೊಡುಗೆ ನೀಡಿದರು. ಅಂತಿಮವಾಗಿ ಮಿಜೋರಾಂ 581/9 ಕ್ಕೆ ಡಿಕ್ಲೇರ್ ಮಾಡಿಕೊಂಡಿತು.

ಕುತೂಹಲಕಾರಿಯಾಗಿ, ಸುತಾರ್ ಈ ವರ್ಷದ ಆರಂಭದಲ್ಲಿ ವಿಜಯ್ ಹಜಾರೆ ಟ್ರೋಫಿಯಲ್ಲಿ ಮಹಾರಾಷ್ಟ್ರ ವಿರುದ್ಧ ಮುಂಬೈ ಪರ ಲಿಸ್ಟ್ ಎ ಪಂದ್ಯಕ್ಕೆ ಪದಾರ್ಪಣೆ ಮಾಡಿದರು. ಆ ಮೊದಲ ಪಂದ್ಯದಲ್ಲಿ ಅವರು ಕೇವಲ ಎರಡು ರನ್‌ಗಳನ್ನು ಗಳಿಸಿದ್ದಾಗ ರನೌಟ್ ಆದರು.

ನಂತರ ಅವರು ಈ ತಿಂಗಳ ಆರಂಭದಲ್ಲಿ ಮಿಜೋರಾಂನ ಆವೃತ್ತಿಯ ಆರಂಭಿಕ ಪಂದ್ಯದಲ್ಲಿ ಪ್ರಥಮ ದರ್ಜೆ ಕ್ರಿಕೆಟ್‌ಗೆ ಪದಾರ್ಪಣೆ ಮಾಡಿದರು. ಮಣಿಪುರ ವಿರುದ್ಧದ ಮೊದಲ ಇನಿಂಗ್ಸ್‌ನಲ್ಲಿ 35 ರನ್ ಗಳಿಸಿದ ನಂತರ, ಸುತಾರ್ ಎರಡನೇ ಇನಿಂಗ್ಸ್‌ನಲ್ಲಿ 99 ರನ್ ಗಳಿಸಿದ್ದರು.