ತಿರುವನಂತಪುರಂ: ದಾಖಲೆಗಳು ಮತ್ತು ಮೈಲಿಗಲ್ಲುಗಳಿಗಿಂತ ತಂಡಕ್ಕಾಗಿ ತನ್ನ ಜವಾಬ್ದಾರಿ ನಿರ್ವಹಿಸುವುದೇ ಯಾವಾಗಲೂ ತಮ್ಮ ಮೊದಲ ಆದ್ಯತೆಯಾಗಿತ್ತು ಎಂದು ವಿರಾಟ್ ಕೊಹ್ಲಿ ಹೇಳಿದ್ದಾರೆ.
ಕೇರಳದ ತಿರುವನಂತಪುರಂನ ಗ್ರೀನ್ ಫೀಲ್ಡ್ ಅಂತಾರಾಷ್ಟ್ರೀಯ ಮೈದಾನದಲ್ಲಿ ಇಂದು ನಡೆದ ಮೊದಲ ಏಕದಿನ ಪಂದ್ಯದಲ್ಲಿ ವಿಂಡೀಸ್ ನೀಡಿದ್ದ 296 ರನ್ ಗಳ ಸವಾಲಿನ ಗುರಿಯನ್ನು ಬೆನ್ನು ಹತ್ತಿದ ಭಾರತ ಕೇವಲ 41.4 ಓವರ್ ನಲ್ಲೇ 2 ವಿಕೆಟ್ ಕಳೆದುಕೊಂಡು 300 ರನ್ ಪೇರಿಸಿ 8 ವಿಕೆಟ್ ಅಂತರದಲ್ಲಿ ಭರ್ಜರಿ ಜಯಬೇರಿ ಭಾರಿಸಿತು.
ಈ ಪಂದ್ಯದಲ್ಲಿ ಭಾರತದ ಗೆಲುವಿನಲ್ಲಿ ಮಹತ್ತರ ಪಾತ್ರವಹಿಸಿದ ವಿರಾಟ್ ಕೊಹ್ಲಿ ಪಂದ್ಯದ ಬಳಿಕ ಸಾಕಷ್ಟು ವಿಚಾರಗಳ ಬಗ್ಗೆ ಮಾತನಾಡಿದರು. ತಮ್ಮ 15,000 ODI ರನ್ಗಳ ಸಾಧನೆಯ ಬಳಿಕ ಮಾತನಾಡಿದ ಕೊಹ್ಲಿ, ತಮ್ಮ ವೃತ್ತಿಜೀವನದ ಈ ಹಂತವನ್ನು ಅತ್ಯಂತ ಕೃತಜ್ಞತೆಯಿಂದ ನೋಡುತ್ತಿರುವುದಾಗಿ ತಿಳಿಸಿದ್ದಾರೆ.
'ದಾಖಲೆಗಳ ಹಿಂದೆ ಎಂದೂ ಓಡಿಲ್ಲ
“ಮೈಲಿಗಲ್ಲುಗಳ ಮೇಲೆ ನನ್ನ ಗಮನ ಎಂದೂ ಇರಲಿಲ್ಲ. ಪರಿಸ್ಥಿತಿಯನ್ನು ಅರ್ಥ ಮಾಡಿಕೊಂಡು ತಂಡಕ್ಕಾಗಿ ಮಾಡಬೇಕಾದ ಕೆಲಸವನ್ನು ಮಾಡುವುದು ನನ್ನ ಉದ್ದೇಶ. ಸಾಧನೆಗಳು ಅದರೊಂದಿಗೆ ಬರುತ್ತವೆ. ಇಷ್ಟು ವರ್ಷ ಆಡಲು ಅವಕಾಶ ಸಿಕ್ಕಿರುವುದಕ್ಕೆ ನಾನು ತುಂಬಾ ಕೃತಜ್ಞ ಮತ್ತು ಅದೃಷ್ಟಶಾಲಿ. ದೇವರು ನೀಡಿರುವ ಅವಕಾಶಗಳಿಗೆ ಧನ್ಯವಾದ ಸಲ್ಲಿಸುತ್ತೇನೆ. ತಲೆ ತಗ್ಗಿಸಿ ಪ್ರತಿದಿನ ಕಷ್ಟಪಟ್ಟು ಕೆಲಸ ಮಾಡಬೇಕು ಎಂದು ಕೊಹ್ಲಿ ಹೇಳಿದ್ದಾರೆ.
‘ಫಿಟ್ ದೇಹವಿದ್ದರೆ ಮುಕ್ತ ಮನಸ್ಸಿನಿಂದ ಆಡಬಹುದು’
ತಮ್ಮ ನಿರಂತರ ಬ್ಯಾಟಿಂಗ್ ಪ್ರದರ್ಶನದ ಹಿಂದಿರುವ ಕಾರಣವನ್ನು ವಿವರಿಸಿದ ಕೊಹ್ಲಿ, ಆಟದ ಬಗ್ಗೆಗಿನ ತಿಳುವಳಿಕೆ ಮತ್ತು ದೈಹಿಕ ಫಿಟ್ನೆಸ್ ಪ್ರಮುಖ ಪಾತ್ರ ವಹಿಸುತ್ತವೆ ಎಂದಿದ್ದಾರೆ. “ಆಟ ಬಹುತೇಕ ಮನಸ್ಸಿನಲ್ಲೇ ನಡೆಯುತ್ತದೆ. ಈ ಹಂತದಲ್ಲಿ ದೈಹಿಕವಾಗಿ ತುಂಬಾ ಫಿಟ್ ಆಗಿರುವುದು ನನಗೆ ಮುಖ್ಯ. ಮಾನಸಿಕವಾಗಿ ತಾಜಾ ಆಗಿದ್ದು, ಪ್ರಸ್ತುತ ಕ್ಷಣದಲ್ಲೇ ಇರಲು ಪ್ರಯತ್ನಿಸುತ್ತೇನೆ” ಎಂದು ಅವರು ಹೇಳಿದ್ದಾರೆ.
ತಮ್ಮ ವೃತ್ತಿಜೀವನದ ಈ ಹಂತದಲ್ಲಿ ಇನ್ನೂ ಒಂದು ಅಥವಾ ಎರಡು ಗೇರ್ ಮೇಲಕ್ಕೆ ಹೋಗಿ ಆಡುವ ಸವಾಲನ್ನು ಎದುರಿಸುತ್ತಿರುವುದಾಗಿ ಕೊಹ್ಲಿ ಹೇಳಿದ್ದಾರೆ. “ವೃತ್ತಿಜೀವನದ ಈ ಹಂತದಲ್ಲಿ ನನ್ನ ಹೊಸ ಆವೃತ್ತಿಯನ್ನು ಅನ್ಲಾಕ್ ಮಾಡುವುದು ನನಗೆ ಉತ್ಸಾಹ ನೀಡುತ್ತದೆ. ಮುಕ್ತ ಮನಸ್ಸಿನಿಂದ ಆಡಲು ಫಿಟ್ ದೇಹ ಅಗತ್ಯ. ನಾನು ದೈಹಿಕವಾಗಿ ಫಿಟ್ ಆಗಿದ್ದಾಗ ಆಟವನ್ನು ನನಗೆ ಬೇಕಾದ ರೀತಿಯಲ್ಲಿ ಕಲ್ಪಿಸಿಕೊಳ್ಳಲು ಸಾಧ್ಯವಾಗುತ್ತದೆ,” ಎಂದು ಅವರು ಹೇಳಿದ್ದಾರೆ.
‘ಭಾರತಕ್ಕಾಗಿ ಆಡುವ ಪ್ರತಿಕ್ಷಣವನ್ನೂ ಆನಂದಿಸುತ್ತೇನೆ’
ತಮ್ಮ ಜೀವನ ಮತ್ತು ವೃತ್ತಿಜೀವನದ ಈ ಹಂತದಲ್ಲಿ ಸಂತೋಷ ಹಾಗೂ ಕೃತಜ್ಞತೆಯೇ ಪ್ರಮುಖ ಭಾವನೆಗಳಾಗಿವೆ ಎಂದು ಕೊಹ್ಲಿ ಹೇಳಿದ್ದಾರೆ. “ನಾವು ಎಲ್ಲಿಂದ ಬಂದಿದ್ದೇವೆ ಎಂಬುದನ್ನು ಕೆಲವೊಮ್ಮೆ ಮರೆಯುತ್ತೇವೆ. ಗಮನ, ಖ್ಯಾತಿ ಮತ್ತು ಅಭಿಮಾನಿಗಳ ಪ್ರೀತಿಯ ನಡುವೆ ನಮ್ಮ ಆರಂಭವನ್ನು ಮರೆಯುವುದು ಸುಲಭ. ಆದರೆ ಬಾಲ್ಯದಿಂದ ಇಲ್ಲಿಯವರೆಗಿನ ಪಯಣವನ್ನು ಒಮ್ಮೆ ಹಿಂದಿರುಗಿ ನೋಡಿದರೆ ಕೃತಜ್ಞತೆ ಮೂಡುತ್ತದೆ” ಎಂದಿದ್ದಾರೆ.
ಭಾರತವನ್ನು ಪ್ರತಿನಿಧಿಸಿ ದೊಡ್ಡ ಕ್ರೀಡಾಂಗಣಗಳಲ್ಲಿ ಆಡುವ ಅವಕಾಶ ಸಿಕ್ಕಿರುವುದು ತಮ್ಮ ಕನಸಾಗಿತ್ತು. “ನಾನು ಭಾರತಕ್ಕಾಗಿ ಆಡುತ್ತಿರುವ ಪ್ರತಿಯೊಂದು ನಿಮಿಷವನ್ನೂ ಆನಂದಿಸುತ್ತೇನೆ. ಕ್ರಿಕೆಟಿಗನಾಗಿ ನಾನು ಕನಸು ಕಂಡಿದ್ದ ಎಲ್ಲವೂ ನನಗೆ ಸಿಕ್ಕಿದೆ. ಹೀಗಾಗಿ ನನ್ನ ಹೃದಯದಲ್ಲಿ ಕೃತಜ್ಞತೆಯಷ್ಟೇ ಇದೆ” ಎಂದು ಕೊಹ್ಲಿ ಹೇಳಿದ್ದಾರೆ.
ಯುವ ಆಟಗಾರರಿಗೆ ಕೊಹ್ಲಿ ಕಿವಿಮಾತು
ಯುವ ಆಟಗಾರರಿಗೆ ಸಲಹೆ ನೀಡಿದ ಕೊಹ್ಲಿ, ಮೈದಾನದ ಹೊರಗಿನ ವಿಚಾರಗಳ ಬಗ್ಗೆ ಹೆಚ್ಚು ಯೋಚಿಸದೆ ಆಟದ ಮೇಲೆ ಸಂಪೂರ್ಣ ಗಮನ ಹರಿಸಬೇಕು ಎಂದಿದ್ದಾರೆ.
“ನೀವು ಆಟವನ್ನು ಹೇಗೆ ಆಡಲು ಬಯಸುತ್ತೀರೋ ಅದೇ ರೀತಿಯಲ್ಲಿ ಆಡಬೇಕು. ಮೈದಾನಕ್ಕಿಳಿದ ಬಳಿಕ ಕ್ರಿಕೆಟ್ ಹೊರತುಪಡಿಸಿ ಬೇರೆ ಯಾವುದನ್ನೂ ಹೆಚ್ಚು ಯೋಚಿಸಬೇಡಿ. ಗೆಲ್ಲಲು ಅಗತ್ಯವಾದ ಅಪಾಯಗಳನ್ನು ತೆಗೆದುಕೊಳ್ಳುವ ಮನಸ್ಥಿತಿ ಇರಬೇಕು,” ಎಂದು ಹೇಳಿದ್ದಾರೆ.
“ನೀವು 150ರ ವೇಗದಲ್ಲಿ ಬ್ಯಾಟಿಂಗ್ ಮಾಡುತ್ತಿದ್ದರೂ ಒಂದು ಓವರ್ನಲ್ಲಿ ನಾಲ್ಕು ಬಾರಿ ಎರಡು ರನ್ ಓಡಬೇಕಾದರೆ ಓಡಬೇಕು. ಯಾವುದೇ ನೆಪಗಳಿಗೆ ಅವಕಾಶವಿಲ್ಲ. ನಿಮ್ಮ ದೇಹವನ್ನು ಸಂಪೂರ್ಣವಾಗಿ ಆಟಕ್ಕೆ ಒಡ್ಡಬೇಕು” ಎಂದು ಕೊಹ್ಲಿ ಯುವ ಆಟಗಾರರಿಗೆ ಹೇಳಿದ್ದಾರೆ.
‘ವಿಶ್ವಕಪ್ ನನ್ನ ಗುರಿ ಸ್ಪಷ್ಟವಾಗಿದೆ’
ಕಡಿಮೆ ಮಾದರಿಗಳಲ್ಲಿ ಆಡುವುದರಿಂದ ಹೆಚ್ಚಿನ ಸ್ಪಷ್ಟತೆ ಸಿಕ್ಕಿದೆಯೇ ಎಂಬ ಪ್ರಶ್ನೆಗೆ ಉತ್ತರಿಸಿದ ಕೊಹ್ಲಿ, ಮುಂದಿನ ವಿಶ್ವಕಪ್ ತಮ್ಮ ಗಮನದಲ್ಲಿದೆ ಎಂದು ಹೇಳಿದ್ದಾರೆ.
“ವಿಶ್ವಕಪ್ಗೆ ಇನ್ನೊಂದು ವರ್ಷವಿದೆ. ನನ್ನ ಗುರಿ ಏನೆಂಬುದು ನನಗೆ ಸ್ಪಷ್ಟವಾಗಿದೆ. ಸಿಗುವ ಪ್ರತಿಯೊಂದು ಪಂದ್ಯದಲ್ಲೂ ಆಟದ ವಿಭಿನ್ನ ಅಂಶಗಳ ಮೇಲೆ ಕೆಲಸ ಮಾಡಬೇಕು. ದೈಹಿಕವಾಗಿ ಫಿಟ್ ಆಗಿರಬೇಕು. ಕೊನೆಯ 15 ಓವರ್ಗಳಲ್ಲೂ ಬೌಂಡರಿಯಿಂದ ಬೌಂಡರಿಗೆ ಓಡಲು ಸಾಧ್ಯವಾಗಬೇಕು, ಒಳವಲಯದಲ್ಲಿ ಫೀಲ್ಡಿಂಗ್ ಮಾಡುವಾಗಲೂ ತೀವ್ರತೆ ತೋರಬೇಕು. ಅವಕಾಶ ಸಿಕ್ಕಾಗ ಒತ್ತಡ ಅನುಭವಿಸುವ ಬದಲು ಅದನ್ನು ಆನಂದಿಸಲು ಬಯಸುತ್ತೇನೆ” ಎಂದಿದ್ದಾರೆ.
“ನಾನು ಸಕಾರಾತ್ಮಕವಾಗಿ ಆಡುತ್ತೇನೆ ಎಂದು ನನಗೆ ನಾನೇ ಭರವಸೆ ನೀಡಿದ್ದೇನೆ. ಆದರೆ ಅಜಾಗರೂಕವಾಗಿ ಅಲ್ಲ. ಸಕಾರಾತ್ಮಕ ಆಟ ಮತ್ತು ಅತಿಯಾದ ಅಪಾಯದ ನಡುವೆ ಸಣ್ಣ ವ್ಯತ್ಯಾಸವಿದೆ. ಅನುಭವಿ ಆಟಗಾರನಾಗಿ ಅದನ್ನು ಅರ್ಥ ಮಾಡಿಕೊಂಡು ತಂಡವನ್ನು ಗೆಲುವಿನತ್ತ ಕೊಂಡೊಯ್ಯುವ ಸಾಮರ್ಥ್ಯ ನನ್ನಲ್ಲಿರಬೇಕು” ಎಂದು ಹೇಳಿದ್ದಾರೆ.
ಶುಭ್ಮನ್ ಗಿಲ್ ಬಗ್ಗೆ ಕೊಹ್ಲಿ ಮಾತು
ತಂಡದ ನಾಯಕ ಶುಭ್ಮನ್ ಗಿಲ್ ಅವರೊಂದಿಗೆ ಬ್ಯಾಟಿಂಗ್ ಮಾಡುವಾಗ ಉತ್ತಮ ಜೊತೆಯಾಟ ಮೂಡಲು ಕಾರಣವೇನು ಎಂಬ ಪ್ರಶ್ನೆಗೆ ಕೊಹ್ಲಿ, ಗಿಲ್ ಆಟವನ್ನು ಅರ್ಥ ಮಾಡಿಕೊಳ್ಳುವ ರೀತಿಯನ್ನು ಶ್ಲಾಘಿಸಿದ್ದಾರೆ. “ಅವರು ತಂಡವನ್ನು ಮುನ್ನಡೆಸುತ್ತಿರುವುದಕ್ಕೆ ಕಾರಣವಿದೆ.
ವಿಭಿನ್ನ ಪರಿಸ್ಥಿತಿಗಳಿಂದ ತಂಡವನ್ನು ಗೆಲುವಿನತ್ತ ಕೊಂಡೊಯ್ಯುವ ಸರಿಯಾದ ದೃಷ್ಟಿಕೋನ ಅವರಲ್ಲಿದೆ. ಅವರೊಂದಿಗೆ ಬ್ಯಾಟಿಂಗ್ ಮಾಡುವಾಗ ಜೊತೆಯಾಟ ಬೆಳೆಸುವುದು ಕಷ್ಟವಲ್ಲ. ಅವರಿಗೆ ಏನು ಮಾಡಬೇಕು ಎಂಬುದು ಗೊತ್ತು, ನನಗೂ ಏನು ಮಾಡಬೇಕು ಎಂಬುದು ಗೊತ್ತು,” ಎಂದು ಕೊಹ್ಲಿ ಹೇಳಿದ್ದಾರೆ.
ಗಿಲ್ ವಿಶ್ವದ ಅತ್ಯುತ್ತಮ ODI ಬ್ಯಾಟರ್ಗಳಲ್ಲಿ ಒಬ್ಬರು ಎಂದು ಬಣ್ಣಿಸಿದ ಕೊಹ್ಲಿ, ಬ್ಯಾಟಿಂಗ್ ವೇಳೆ ಅವರಿಗೆ ಹೆಚ್ಚಿನ ಸಲಹೆ ನೀಡುವ ಅಗತ್ಯವಿಲ್ಲ ಎಂದಿದ್ದಾರೆ. “ಅವರು ವಿಶ್ವದ ಅತ್ಯುತ್ತಮ ಆಟಗಾರರಲ್ಲಿ ಒಬ್ಬರು. ಅವರೊಂದಿಗೆ ಬ್ಯಾಟಿಂಗ್ ಮಾಡುವಾಗ ಹೆಚ್ಚು ಮಾತನಾಡುವ ಅಗತ್ಯವಿಲ್ಲ. ಮೈದಾನದಲ್ಲಿ ಅವರಿಗೆ ನನ್ನ ಸಹಾಯ ಬೇಕಾದಾಗ ನಾನು ಯಾವಾಗಲೂ ಲಭ್ಯವಿರುತ್ತೇನೆ” ಎಂದು ಕೊಹ್ಲಿ ಹೇಳಿದ್ದಾರೆ.