ದೊಡ್ಡಬಳ್ಳಾಪುರ: ತಾಲೂಕಿನ ತೂಬಗೆರೆ ಹೋಬಳಿ ಗ್ರಾಮಗಳಲ್ಲಿ ಅಕ್ರಮವಾಗಿ ಮದ್ಯ ಮಾರಾಟ ಮಾಡುತ್ತಿದ್ದ ಅಂಗಡಿಗಳು, ಹುಕ್ಕಾಬಾರ್ ಮತ್ತು ಕೆಲ ಮನೆಗಳ ಮೇಲೆ ತಹಸೀಲ್ದಾರ್ ಚಂದ್ರ ನೇತೃತ್ವದಲ್ಲಿ ಭಾನುವಾರ ರಾತ್ರಿ ದಿಢೀರ್ ದಾಳಿ ಸಂಘಟಿಸಲಾಯಿತು.
ದಾಳಿ ವೇಳೆ ನಂದಿ ಬೆಟ್ಟದ ತಪ್ಪಲಿನ ಕಣಿವೆಪುರ ಬಳಿ ಹುಕ್ಕಾ ಬಾರ್ ಒಂದರಲ್ಲಿ ಅಕ್ರಮವಾಗಿ ಮದ್ಯ ಮಾರಾಟ ಮಾಡುತ್ತಿದ್ದ ಆರೋಪಿ ದಿಲೀಪ್ ಪವಾರ್ ಎಂಬಾತನನ್ನು ಬಂಧಿಸಲಾಗಿದೆ.
ಸ್ಥಳದಲ್ಲಿ ಸಾಕಷ್ಟು ಪ್ರಮಾಣದ ಮದ್ಯದ ಬಾಟಲಿಗಳನ್ನು ವಶಪಡಿಸಿಕೊಳ್ಳಲಾಗಿದೆ.  ಅದೇ ರೀತಿ ತಾಲೂಕಿನ ಗೂಳ್ಯ, ಮಾಚಗೊಂಡನಹಳ್ಳಿ, ದಂಡಿದಾಸಕೊಡಿಗೇಹಳ್ಳಿ, ಕೋಡಿಹಳ್ಳಿ ಮತ್ತು ಹಮಾಮ್ ಗ್ರಾಮಗಳ ಕೆಲ ಅಂಗಡಿಗಳು ಮತ್ತು ಮನೆಗಳ ಮೇಲೆ ಸಹ ದಾಳಿ ಮಾಡಲಾಯಿತು. ಕೆಲವೆಡೆ ಅಕ್ರಮ ಮದ್ಯ ಮಾರಾಟದ ದಾಖಲೆಗಳು ದೊರೆತಿದ್ದು, ಕೆಲ ಆರೋಪಿಗಳಿಗೆ ಎಚ್ಚರಿಕೆ ನೀಡಿ ಬಿಡುಗಡೆ ಮಾಡಲಾಗಿದೆ.
ದಾಳಿ ವೇಳೆ ದೊರೆತ ಮದ್ಯದ ಬಾಟಲಿಅಬಕಾರಿ ಪೊಲೀಸರು ವಶಪಡಿಸಿಕೊಂಡಿದ್ದು, ಆರೋಪಿಗಳ ವಿಚಾರಣೆ ನಡೆಸಿದ್ದಾರೆ. ದಾಳಿ ವೇಳೆ ದೊಡ್ಡಬಳ್ಳಾಪುರ ಅಪರಾಧ ವಿಭಾಗದ ಪೊಲೀಸರು ಮತ್ತು ಅಬಕಾರಿ ಪೊಲೀಸರು ತಹಸೀಲ್ದಾರರಿಗೆ ಸಹಕರಿಸಿದರು.