ಬೆಂಗಳೂರು: ವೈದ್ಯಕೀಯ ಪ್ರಕ್ರಿಯೆಯೊಂದಕ್ಕಾಗಿ ಮಾನವನ ಜೀವಂತ ಹೃದಯವೊಂದನ್ನು ಸಾಗಿಸಲು 'ನಮ್ಮ ಮೆಟ್ರೋ' ನೆರವು ನೀಡಿದೆ. ಗೋರಗುಂಟೆಪಾಳ್ಯ ಮತ್ತು ಮಂತ್ರಿ ಸ್ಕ್ವೇರ್ ಸಂಪಿಗೆ ರಸ್ತೆ ನಿಲ್ದಾಣಗಳ ನಡುವೆ ಮೆಟ್ರೋ ರೈಲಿನಲ್ಲಿ ಕೇವಲ 18 ನಿಮಿಷಗಳಲ್ಲಿ ಹೃದಯ ತಲುಪಿದೆ.
ಯಶವಂತಪುರದ ಸ್ಪರ್ಶ ಆಸ್ಪತ್ರೆಯಿಂದ ಶೇಷಾದ್ರಿಪುರದ ಅಪೊಲೊ ಆಸ್ಪತ್ರೆಗೆ ಈ ಹೃದಯವನ್ನು ಸಾಗಿಸಲಾಯಿತು. ಮಧ್ಯಾಹ್ನ 2:22ಕ್ಕೆ ಗೋರಗುಂಟೆಪಾಳ್ಯ ನಿಲ್ದಾಣದಲ್ಲಿ ಮೆಟ್ರೋ ರೈಲಿನಲ್ಲಿ ಇರಿಸಲಾದ ಈ ಹೃದಯವು, ಮಧ್ಯಾಹ್ನ 2:40ಕ್ಕೆ ಮಂತ್ರಿ ಸ್ಕ್ವೇರ್ ಸಂಪಿಗೆ ರಸ್ತೆ ನಿಲ್ದಾಣವನ್ನು ತಲುಪಿತು.
ಬೆಂಗಳೂರು ಮೆಟ್ರೋ ರೈಲು ನಿಗಮ ನಿಯಮಿತ (BMRCL), ಆರೋಗ್ಯ ಸಂಸ್ಥೆಗಳೊಂದಿಗೆ ಸಮನ್ವಯ ಸಾಧಿಸಿ, ಸಮಯ ನಿರ್ಣಾಯಕವಾದ ಈ ತುರ್ತು ವೈದ್ಯಕೀಯ ಸಂದರ್ಭದಲ್ಲಿ ಈ ಪ್ರಮುಖ ಅಂಗವನ್ನು ಸುಗಮವಾಗಿ ಸಾಗಿಸಲು ಅಗತ್ಯ ವ್ಯವಸ್ಥೆಗಳನ್ನು ಕಲ್ಪಿಸಿಕೊಟ್ಟಿತು.
ಬುಧವಾರ ನಡೆದ ಈ ಸಾಗಾಟದೊಂದಿಗೆ, 'ನಮ್ಮ ಮೆಟ್ರೋ' ಇದುವರೆಗೆ ಒಟ್ಟು ಆರು ಪ್ರಮುಖ ಅಂಗಗಳನ್ನು ಸಾಗಿಸಲು ಸಹಕರಿಸಿದಂತಾಗಿದೆ. ಇದರಲ್ಲಿ ಒಂದು ಯಕೃತ್ತು (ಲಿವರ್), ಮೂರು ಹೃದಯಗಳು ಮತ್ತು ಒಂದು ಜೋಡಿ ಶ್ವಾಸಕೋಶಗಳು ಸೇರಿವೆ.
