ಗುಲ್ಬರ್ಗ: ಇಲ್ಲಿನ ಜಿಲ್ಲಾ ಕೋರ್ಟ್ ಆವರಣದಲ್ಲಿ ನಿಲ್ಲಿಸಿದ್ದ 30 ಸಾವಿರ ಮೌಲ್ಯದ ಬಜಾಜ್ ಡಿಸ್ಕವರಿ ಬೈಕ್ ಕಳವಾಗಿದೆ ಎಂದು ನ್ಯಾಯಾಲಯದಲ್ಲಿ ದ್ವಿತೀಯ ದರ್ಜೆ ಸಹಾಯಕರಾಗಿರುವ ಮಡಿವಾಳಪ್ಪ ಅವರು ಸ್ಟೇಷನ್ ಬಜಾರ್ ಠಾಣೆಯಲ್ಲಿ ದೂರು ನೀಡಿದ್ದಾರೆ.
ಜು.8 ರಂದು ವಾಹನ ಕಳವಾಗಿದೆ. ಎಂದಿನಂತೆ ಕೆಲಸಕ್ಕೆಂದು ನ್ಯಾಯಾಲಯಕ್ಕೆ ಬಂದಿರುವ ತಾವು ಬೈಕ್ ಹಚ್ಚಿ ಕೆಲಸಕ್ಕೆ ಹೋಗಿದ್ದೆ. ಕೆಲಸ ಮುಗಿಸಿ ಮನೆಗೆ ಹೊರಡಲು ಬಂದಾಗ ಬೈಕ್ ಇರಲಿಲ್ಲವೆಂದು ದೂರಿನಲ್ಲಿ ತಿಳಿಸಿದ್ದಾರೆ.
ಇಬ್ಬರು ದನಗಳ್ಳರ ಬಂಧನ
ಶಹಾಬಾದ್: ನಾಲವಾರ ಗ್ರಾಮದ ಮನೆಯ ಅಂಗಳದಲ್ಲಿ ಕಟ್ಟಿದ್ದ ದನಗಳನ್ನು ರಾತ್ರಿ ಹೊತ್ತು ಸಮಯ ಸಾಧಿಸಿ ಕಳ್ಳತನ ಮಾಡುತ್ತಿದ್ದ ಇಬ್ಬರು ಕಳ್ಳರನ್ನು ವಾಡಿ ಪೊಲೀಸರು ಬಂಧಿಸಿದ್ದಾರೆ. ನಾಲವಾರ ಗ್ರಾಮದ ಸಾಯಬಣ್ಣ ಕರದಳ್ಳಿ(26) ಹಾಗೂ ಸೂಗೂರ(ಎನ್) ಗ್ರಾಮದ ತೋಟಪ್ಪ ಕಾಕಂಡಿ(21) ಎಂಬುವವರು ಜು.15ರಂದು ಗ್ರಾಮದ ರೈತರ ಮನೆಯ ಹೊರಗಡೆ ಕೊಟ್ಟಿಗೆಯಲ್ಲಿ ಕಟ್ಟಿದ್ದ ಆಕಳನ್ನು ಕದ್ದು ಪರಾರಿಯಾಗಿದ್ದರು. ಕುಂಬಾರಹಳ್ಳಿ ರಸ್ತೆಯಲ್ಲಿ ಟಂಟಂ ವಾಹನದಲ್ಲಿ ಆಕಳು ಸಾಗಿಸುತ್ತಿದ್ದಾಗ ದಾಳಿ ನಡೆಸಿ, ಆಕಳು, ಹೋರಿಯನ್ನು ವಶಕ್ಕೆ ತೆಗೆದುಕೊಂಡು ಪ್ರಕರಣ ದಾಖಲಿಸಿದ್ದಾರೆ.