ಏಲಕ್ಕಿ ಅಥವಾ ಎಲೈಚಿಯು ಪ್ರತಿಯೊಂದು ಭಾರತೀಯ ಮನೆಯಲ್ಲೂ ಬಳಸಲಾಗುವ ಮಸಾಲೆಯಾಗಿದೆ. ಬಹುತೇಕ ಆಹಾರ ಪದಾರ್ಥಗಳ ತಯಾರಿಕೆಯಲ್ಲಿ ಏಲಕ್ಕಿ ಇರಲೇಬೇಕು. ಇದರ ಹೊರತಾಗಿ, ಇದು ಕಫವನ್ನು ಕಡಿಮೆ ಮಾಡುವ ಮೂಲಕ ಉಸಿರಾಟದ ಆರೋಗ್ಯವನ್ನು ಹೆಚ್ಚಿಸುತ್ತದೆ. ಕಫದ ಸ್ರವಿಸುವಿಕೆಗೆ ಸಹಾಯ ಮಾಡುವ ನೈಸರ್ಗಿಕ ಕಫಹಾರಿಯಾಗಿ ಕಾರ್ಯನಿರ್ವಹಿಸುತ್ತದೆ. 

ಶ್ವಾಸಕೋಶದಲ್ಲಿ ಮ್ಯೂಕಸ್ ರಚನೆಯು ಮಾಲಿನ್ಯದ ವಿರುದ್ಧ ದೇಹವನ್ನು ರಕ್ಷಿಸುತ್ತದೆ. ಇದು ವಿಷಕಾರಿ ಮಾಲಿನ್ಯಕಾರಕಗಳನ್ನು ಹಿಡಿದಿಟ್ಟುಕೊಳ್ಳುವ ಮೂಲಕ ಇದನ್ನು ಮಾಡುತ್ತದೆ. ಹೆಚ್ಚು ಕಫ ಸೇರುವುದರಿಂದ ಉಸಿರಾಟದ ಸಮಸ್ಯೆಗಳನ್ನು ಉಂಟುಮಾಡಬಹುದು ಮತ್ತು ರೋಗಕಾರಕಗಳ ಸಂತಾನೋತ್ಪತ್ತಿಯ ಸ್ಥಳವಾಗಬಹುದು.

ಆಯುರ್ವೇದದ ಪ್ರಕಾರ, ಏಲಕ್ಕಿಯು ಕಫವನ್ನು ಕಡಿಮೆ ಮಾಡಲು ಸಹಾಯ ಮಾಡುತ್ತದೆ. ಇದು ಮ್ಯೂಕಸ್ ಅನ್ನು ಆರೋಗ್ಯಕರವಾಗಿಟ್ಟುಕೊಳ್ಳುತ್ತದೆ. ಏಲಕ್ಕಿಯು ಸಿನೋಲ್ ಎಂಬ ಸಕ್ರಿಯ ಘಟಕಾಂಶವನ್ನು ಹೊಂದಿದ್ದು, ಇದು ಲೋಳೆಪೊರೆಯನ್ನು ಒಡೆಯುತ್ತದೆ ಮತ್ತು ಅದನ್ನು ವ್ಯವಸ್ಥೆಯಿಂದ ಹೊರಹಾಕುತ್ತದೆ.

ಇದು ಉಸಿರಾಟ ಮತ್ತು ಜೀರ್ಣಾಂಗ ವ್ಯವಸ್ಥೆಗಳಿಗೆ ಉತ್ತಮವಾಗಿ ಕೆಲಸ ಮಾಡುತ್ತದೆ. ಬ್ರಾಂಕೈಟಿಸ್ ಮತ್ತು ನ್ಯುಮೋನಿಯಾದಿಂದ ಬಳಲುತ್ತಿರುವ ಹಾಗೂ ಉರಿಯೂತದ ಕಾರಣ ಉಬ್ಬಿರುವ ಉಸಿರಾಟದ ಮಾರ್ಗಗಳನ್ನು ಹೊಂದಿರುವ ಅಸ್ತಮಾ ವ್ಯಕ್ತಿಗಳು ಏಲಕ್ಕಿ ಬಳಸುವುದು ವಿಶೇಷವಾಗಿ ಉಪಯುಕ್ತವಾಗಿದೆ. ಏಲಕ್ಕಿಯಲ್ಲಿರುವ ಸಿನೋಲ್ ಆಂಟಿಮೈಕ್ರೊಬಿಯಲ್ ಮತ್ತು ನಂಜುನಿರೋಧಕ ಗುಣಲಕ್ಷಣಗಳನ್ನು ಸಹ ಹೊಂದಿದೆ. ಇದು ಶ್ವಾಸಕೋಶದ ಮೇಲೆ ನೇರವಾಗಿ ಅಥವಾ ಪರೋಕ್ಷವಾಗಿ ಪರಿಣಾಮ ಬೀರುವ ಬ್ಯಾಕ್ಟೀರಿಯಾದ ಸೋಂಕನ್ನು ತಡೆಯಲು ಸಹಾಯ ಮಾಡುತ್ತದೆ.

ಏಲಕ್ಕಿಯು ದೇಹದಲ್ಲಿನ ಉರಿಯೂತವನ್ನು ಸಹ ಕಡಿಮೆ ಮಾಡುತ್ತದೆ. ಪರಿಸರದಲ್ಲಿನ ಮಾಲಿನ್ಯಕಾರಕಗಳಿಗೆ ಒಡ್ಡಿಕೊಳ್ಳುವುದರಿಂದ ಶ್ವಾಸನಾಳದ ಒಳಪದರಗಳಲ್ಲಿ ಉರಿಯೂತ ಉಂಟಾಗಬಹುದು. ಈ ವೇಳೆ ಏಲಕ್ಕಿಯು ಅದನ್ನು ತಂಪಾಗಿಸುವ ಮತ್ತು ಉರಿಯನ್ನು ತಗ್ಗಿಸುವ ಕೆಲಸ ಮಾಡುತ್ತದೆ. ಕ್ಷಾರೀಯವಾಗಿರುವುದರಿಂದ ಏಲಕ್ಕಿಯು ಅಸಿಡಿಟಿಯನ್ನು ಎದುರಿಸಲು ಸಹಾಯ ಮಾಡುತ್ತದೆ. ಹೊಟ್ಟೆ ಉಬ್ಬುವುದು ಮತ್ತು ಆಸಿಡ್ ರಿಫ್ಲಕ್ಸ್ ಅನ್ನು ನಿರ್ವಹಿಸಲು ಊಟದ ನಂತರದ ಪಾನೀಯವಾಗಿ ಇದನ್ನು ಬಳಸಲು ಸೂಚಿಸಲಾಗುತ್ತದೆ. ಮಧ್ಯ ಪ್ರಾಚ್ಯದಾದ್ಯಂತ, ಕಾಫಿ ತಯಾರಿಕೆಯಲ್ಲಿ ಏಲಕ್ಕಿ ಪುಡಿಯನ್ನು ಬಳಸುತ್ತಾರೆ. ಏಕೆಂದರೆ, ಕಾಫಿ ಆಮ್ಲೀಯ (ಅಸಿಡಿಕ್) ಪಾನೀಯವಾಗಿದೆ ಮತ್ತು ಏಲಕ್ಕಿಯು ಅದನ್ನು ಸಮತೋಲನಗೊಳಿಸಲು ಸಹಾಯ ಮಾಡುತ್ತದೆ.

ಇದನ್ನೂ ಓದಿ: ಮೆಂತ್ಯ ಬೀಜದಲ್ಲಿ ಅಡಗಿದೆ ಹಲವು ಆರೋಗ್ಯಕಾರಿ ಪ್ರಯೋಜನ; ಅವುಗಳನ್ನು ತಿಳಿದು ಇಂದೇ ಸೇವಿಸಲು ಪ್ರಾರಂಭಿಸೋಣ!

ಇದು ಶಕ್ತಿಯುತವಾದ ಉತ್ಕರ್ಷಣ ನಿರೋಧಕವಾಗಿದೆ ಮತ್ತು ಮಾಲಿನ್ಯದಿಂದ ಉಂಟಾಗುವ ಸ್ವತಂತ್ರ ರಾಡಿಕಲ್ ಹಾನಿಯನ್ನು ಎದುರಿಸಲು ಸಹಾಯ ಮಾಡುತ್ತದೆ. ಉತ್ಕರ್ಷಣ ನಿರೋಧಕಗಳು ಉಸಿರಾಟದ ವ್ಯವಸ್ಥೆಯ ವಯಸ್ಸಾಗುವಿಕೆಯನ್ನು ನಿಲ್ಲಿಸುತ್ತವೆ ಎಂದು ತಿಳಿದುಬಂದಿದೆ. ಇಷ್ಟೇ ಅಲ್ಲ, ಏಲಕ್ಕಿಯು ಮ್ಯಾಂಗನೀಸ್‌ನ ಸಮೃದ್ಧ ಮೂಲವಾಗಿದೆ. ಇದು ದೇಹವು ಸಂಯೋಜಕ ಅಂಗಾಂಶವನ್ನು ರೂಪಿಸಲು ಸಹಾಯ ಮಾಡುವ ಶಕ್ತಿಶಾಲಿ ಖನಿಜವಾಗಿದೆ.

ಆಹಾರದಲ್ಲಿ ಏಲಕ್ಕಿಯನ್ನು ಸೇರಿಸುವುದು ಹೇಗೆ?

1. ಏಲಕ್ಕಿ ಕಾಳುಗಳನ್ನು ಶುಂಠಿಯೊಂದಿಗೆ ನೀರಿನಲ್ಲಿ ಕುದಿಸಿ. ಅದನ್ನು ಯಕೃತ್ತು, ಶ್ವಾಸಕೋಶಗಳು ಮತ್ತು ಮೂತ್ರಪಿಂಡಗಳನ್ನು ನಿರ್ವಿಶಗೊಳಿಸುವ ಪಾನೀಯವಾಗಿ ಸೇವಿಸಿ.

2. ಚಹಾ ಮಾಡುವಾಗ ಎರಡು ಅಥವಾ ಮೂರು ಏಲಕಿಗಳನ್ನು ಸೇರಿಸಿ.

3. ಕರಿಬೇವಿನ ಪೌಡರ್‌ ಜೊತೆಗೆ ಬೆರೆಸಿ ದಿನಕ್ಕೆ ಕನಿಷ್ಠ ಒಂದು ಬಾರಿ ಊಟದಲ್ಲಿ ಸೇರಿಸಿ.

4. ಏಲಕ್ಕಿಯು ಸಾರಭೂತ ತೈಲವು ಉಸಿರಾಟದ ವ್ಯವಸ್ಥೆ ಮತ್ತು ಜೀರ್ಣಕಾರಿ ಸಮಸ್ಯೆಗಳನ್ನು ಸರಾಗಗೊಳಿಸುವ ಉತ್ತಮ ಮಾರ್ಗವಾಗಿದೆ.

5. ಜಜ್ಜಿದ ಅಥವಾ ಪುಡಿಮಾಡಿದ ಏಲಕ್ಕಿ ಬೀಜಗಳನ್ನು ಸ್ಮೂಥಿಗಳು, ಲಡ್ಡೂಗಳು, ಎನರ್ಜಿ ಬಾರ್‌ಗಳು ಮತ್ತು ಶೇಕ್‌ಗಳಿಗೆ ಸೇರಿಸಬಹುದು.

6. ಏಲಕ್ಕಿ ಪುಡಿಯೊಂದಿಗೆ ಕಾಫಿ ತಯಾರಿಸಿ. ಏಲಕ್ಕಿಯನ್ನು ನೇರವಾಗಿ ಕಾಫಿ ಕಪ್‌ಗೆ ಹಾಕಿ.
ಎಚ್ಚರಿಕೆಯ ಮಾತು

ಏಲಕ್ಕಿ ನಿರುಪದ್ರವಿಯಾಗಿದ್ದರೂ, ಕೆಲವರಿಗೆ ಮಸಾಲೆಯೆಂದರೆ ಅಲರ್ಜಿ ಉಂಟಾಗುತ್ತದೆ. 

ಸಾಮಾನ್ಯ ಅಲರ್ಜಿಯ ಪ್ರತಿಕ್ರಿಯೆಗಳಲ್ಲಿ ಒಂದಾದ ಕಾಂಟ್ಯಾಕ್ಟ್ ಡರ್ಮಟೈಟಿಸ್, ಒಂದು ರೀತಿಯ ಚರ್ಮದ ದದ್ದು ಆಗಿದ್ದು, ಇದು ಚರ್ಮವನ್ನು ತುರಿಕೆ ಮತ್ತು ಕೆಂಪಾಗಿಸುತ್ತದೆ. ದೊಡ್ಡ ಪಿತ್ತಗಲ್ಲುಗಳು ಇರುವವರು ಏಲಕ್ಕಿಯನ್ನು ಎಚ್ಚರಿಕೆಯಿಂದ ಸೇವಿಸಬೇಕು. ಕೆಲವು ಸಂದರ್ಭಗಳಲ್ಲಿ, ಪಿತ್ತಗಲ್ಲು ನೋವು ಹೆಚ್ಚಾಗುತ್ತದೆ ಮತ್ತು ರಕ್ತಸ್ರಾವಕ್ಕೆ ಕಾರಣವಾಗಬಹುದು. ನೀವು ಎಚ್‌ಐವಿ, ಕೆರಳಿಸುವ ಕರುಳಿನ ಸಹಲಕ್ಷಣಗಳು (ಐಬಿಎಸ್) ಚಿಕಿತ್ಸೆಗಾಗಿ ಔಷಧಗಳನ್ನು ಸೇವಿಸುತ್ತಿದ್ದರೆ, ರಕ್ತ ತೆಳುಗೊಳಿಸುವಿಕೆ, ಯಕೃತ್ತಿನ ಔಷಧಗಳು, ಖಿನ್ನತೆ-ಶಮನಕಾರಿಗಳು, ಆಸ್ಪಿರಿನ್ ಮತ್ತು ಆಂಟಿಪ್ಲೇಟ್‌ಲೆಟ್ ಔಷಧಗಳನ್ನು ಸೇವಿಸುತ್ತಿದ್ದರೆ ಏಲಕ್ಕೆ ಸೇವನೆಗು ಮುನ್ನ ವೈದ್ಯಕೀಯ ವೃತ್ತಿಪರರನ್ನು ಸಂಪರ್ಕಿಸುವುದು ಉತ್ತಮ.

ಅದರ ಜೊತೆಗೆ, ಗರ್ಭಾವಸ್ಥೆಯಲ್ಲಿ ಏಲಕ್ಕಿಯನ್ನು ಸೇವಿಸುವುದು ಸಾಮಾನ್ಯವಾಗಿ ಸುರಕ್ಷಿತವಾಗಿದೆ. ಆದರೆ, ಈ ಪ್ರಮಾಣ ಹೆಚ್ಚಾದರೆ ಗರ್ಭಪಾತದಂತಹ ತೊಡಕುಗಳನ್ನು ಉಂಟುಮಾಡಬಹುದು. ಈ ಎಲ್ಲಾ ಕಾರಣಗಳಿಗಾಗಿ, ಸ್ವಲ್ಪ ಪ್ರಮಾಣದ ಏಲಕ್ಕಿಯನ್ನು ಸೇವಿಸುವುದು ಉತ್ತಮ. ಏಲಕ್ಕಿ ಸೇವನೆ ನಿಮಗೆ ಆಗುತ್ತಿಲ್ಲ ಎಂದಾದರೆ ನಿಲ್ಲಿಸುವುದು ಒಳ್ಳೆಯದು.