Aloe Vera Juice: ಖಾಲಿ ಹೊಟ್ಟೆಯಲ್ಲಿ ಅಲೋವೆರಾ ಜ್ಯೂಸ್ ಕುಡಿಯಬಹುದೇ? ಇದರಿಂದ ನಿಜವಾಗಿಯೂ ಆರೋಗ್ಯಕ್ಕೆ ಲಾಭ ಇದೆಯಾ? ಎಂಬ ಪ್ರಶ್ನೆ ಅನೇಕರಿಗೆ ಇದೆ. ಬೆಳಗ್ಗೆ ಎದ್ದ ತಕ್ಷಣ ಆರೋಗ್ಯಕರ ಜ್ಯೂಸ್ ಹುಡುಕುವವರಿಗೆ ಅಲೋವೆರಾ ಜ್ಯೂಸ್ ಜನಪ್ರಿಯ ಆಯ್ಕೆಯಾಗಿದೆ.! ಆಯುರ್ವೇದದಿಂದ ಆಧುನಿಕ ಆಹಾರ ಪದ್ಧತಿಯವರೆಗೆ ಇದನ್ನು ಔಷಧೀಯ ಸಸ್ಯವೆಂದು ಪರಿಗಣಿಸಲಾಗುತ್ತದೆ. ಆದರೆ ಇದನ್ನು ಹೇಗೆ, ಎಷ್ಟು ಪ್ರಮಾಣದಲ್ಲಿ ಕುಡಿಯಬೇಕು ಮತ್ತು ಯಾರು ತಪ್ಪಿಸಬೇಕು ಎಂಬುದನ್ನು ತಿಳಿದುಕೊಂಡು ಬಳಸುವುದು ಮುಖ್ಯ. ಆ ಕುರಿತ ವರದಿ ಇಲ್ಲಿದೆ:

ಖಾಲಿ ಹೊಟ್ಟೆಯಲ್ಲಿ ಕುಡಿಯುವುದು ಹೆಚ್ಚು ಪ್ರಯೋಜನಕಾರಿಯೇ?

ಹೌದು, ಬೆಳಗ್ಗೆ ಖಾಲಿ ಹೊಟ್ಟೆಯಲ್ಲಿ ಕುಡಿಯುವುದರಿಂದ ದೇಹವು ಬೇಗ ಹೀರಿಕೊಳ್ಳುತ್ತದೆ ಮತ್ತು ಜೀರ್ಣಕ್ರಿಯೆ ಚುರುಕಾಗುತ್ತದೆ ಎಂದು ಆಹಾರ ತಜ್ಞರು ಹೇಳುತ್ತಾರೆ. ಸಾಮಾನ್ಯವಾಗಿ ಎದ್ದ ತಕ್ಷಣ ಅಥವಾ ಬೆಳಗಿನ ತಿಂಡಿಗಿಂತ ಇಪ್ಪತ್ತು ರಿಂದ ಮೂವತ್ತು ನಿಮಿಷ ಮೊದಲು ಕುಡಿಯುವುದು ಒಳ್ಳೆಯದು! ಇದು ದೇಹಕ್ಕೆ ನೀರಿನಂಶ ನೀಡಿ ಹೊಟ್ಟೆಯನ್ನು ಶಾಂತಗೊಳಿಸುತ್ತದೆ.

ಪ್ರಯೋಜನಗಳೇನು?

ಅಲೋವೆರಾ ಜ್ಯೂಸ್ ಜೀರ್ಣಕ್ರಿಯೆಗೆ ಸಹಾಯ ಮಾಡುತ್ತದೆ, ಮಲಬದ್ಧತೆ, ಗ್ಯಾಸ್ ಮತ್ತು ಆಮ್ಲೀಯತೆಯನ್ನು ಕಡಿಮೆ ಮಾಡುತ್ತದೆ. ಇದರಲ್ಲಿರುವ ನೈಸರ್ಗಿಕ ಕಿಣ್ವಗಳು ಪೋಷಕಾಂಶಗಳ ಹೀರಿಕೊಳ್ಳುವಿಕೆಯನ್ನು ಹೆಚ್ಚಿಸುತ್ತವೆ. ಹೆಚ್ಚು ನೀರಿನಂಶ ಮತ್ತು ಉತ್ಕರ್ಷಣ ನಿರೋಧಕಗಳು ಇರುವುದರಿಂದ ದೇಹ ಹೈಡ್ರೇಟೆಡ್ ಆಗಿರುತ್ತದೆ ಮತ್ತು ರೋಗನಿರೋಧಕ ಶಕ್ತಿಗೆ ಬೆಂಬಲ ಸಿಗುತ್ತದೆ. ಮಿತ ಬಳಕೆಯಿಂದ ಚರ್ಮದ ಹೊಳಪು ಮತ್ತು ಕೂದಲಿನ ಆರೋಗ್ಯಕ್ಕೂ ಪರೋಕ್ಷ ಲಾಭವಿದೆ. ಕಡಿಮೆ ಕ್ಯಾಲರಿ ಇರುವುದರಿಂದ ತೂಕ ನಿಯಂತ್ರಣಕ್ಕೆ ಪ್ರಯತ್ನಿಸುವವರು ಸಹ ಇದನ್ನು ಇಷ್ಟಪಡುತ್ತಾರೆ.

ಸರಿಯಾಗಿ ಕುಡಿಯುವ ವಿಧಾನ:

ವಯಸ್ಕರಿಗೆ ದಿನಕ್ಕೆ ಇಪ್ಪತ್ತು ರಿಂದ ಮೂವತ್ತು ಮಿಲಿ ಶುದ್ಧ, ಸಕ್ಕರೆ ಬೆರೆಸದ ಜ್ಯೂಸ್ ಸಾಕು ಎಂಬುದು ಸಾಮಾನ್ಯ ಸಲಹೆ. ಇದನ್ನು ಒಂದು ಲೋಟ ನೀರಿನಲ್ಲಿ ದುರ್ಬಲಗೊಳಿಸಿ ಕುಡಿಯಬೇಕು. ಮೊದಲ ಬಾರಿಗೆ ಸಣ್ಣ ಪ್ರಮಾಣದಿಂದ ಆರಂಭಿಸಿ ದೇಹದ ಪ್ರತಿಕ್ರಿಯೆ ಗಮನಿಸಿ. ಹಳದಿ ಲ್ಯಾಟೆಕ್ಸ್ ಭಾಗ ತೆಗೆದ ಸಂಸ್ಕರಿಸಿದ ಜ್ಯೂಸ್ ಆಯ್ಕೆ ಮಾಡುವುದು ಉತ್ತಮ. ದೀರ್ಘಕಾಲ ಪ್ರತಿದಿನ ಕುಡಿಯುವ ಮೊದಲು ವೈದ್ಯರನ್ನು ಸಂಪರ್ಕಿಸಿ.

ಯಾರು ಕುಡಿಯಬಾರದು?

ಅತಿಯಾಗಿ ಕುಡಿದರೆ ಅತಿಸಾರ, ಹೊಟ್ಟೆ ನೋವು, ಸೆಳೆತ, ನಿರ್ಜಲೀಕರಣ ಮತ್ತು ಪೊಟ್ಯಾಸಿಯಮ್ ಕಡಿಮೆಯಾಗಿ ಎಲೆಕ್ಟ್ರೋಲೈಟ್ ಅಸಮತೋಲನ ಉಂಟಾಗಬಹುದು. ಕೆಲವರಿಗೆ ಅಲರ್ಜಿ ಬರಬಹುದು. ರಕ್ತದ ಸಕ್ಕರೆ ಮತ್ತು ರಕ್ತದೊತ್ತಡ ಕಡಿಮೆ ಮಾಡುವ ಗುಣ ಇರುವುದರಿಂದ ಔಷಧಿ ತೆಗೆದುಕೊಳ್ಳುವವರು ಎಚ್ಚರಿಕೆ ವಹಿಸಬೇಕು. ಗರ್ಭಿಣಿಯರು, ಹಾಲುಣಿಸುವ ತಾಯಂದಿರು, ಸಣ್ಣ ಮಕ್ಕಳು, ಮೂತ್ರಪಿಂಡ, ಯಕೃತ್ತು ಮತ್ತು ಕರುಳಿನ ಸಮಸ್ಯೆ ಇರುವವರು ಇದನ್ನು ತಪ್ಪಿಸುವುದು ಒಳ್ಳೆಯದು.