ಚಿಕ್ಕಮಗಳೂರು: ಸೆಲ್ಫೀ ಗೀಳಿಗೆ ರಾಜ್ಯದಲ್ಲಿ ಇಬ್ಬರು ವ್ಯಕ್ತಿಗಳು ಬಲಿಯಾಗಿರುವ ಘಟನೆ ಚಾರ್ಮಾಡಿ ಘಾಟ್ ರಸ್ತೆಯಲ್ಲಿರುವ ಆಲೆಖಾನ್ ಜಲಪಾತದಲ್ಲಿ ಸೋಮವಾರ ನಡೆದಿದೆ.

ಹನುಮಂತಪ್ಪ (34), ನಾಗಭೂಷಣ್ (98) ಮೃತಪಟ್ಟವರಾಗಿದ್ದಾರೆ. ಬಸವರಾಜ್, ನಾಗೇಶ್ ಹಾಗೂ ಹೊನ್ನೇಶ್, ಸ್ನೇಹಿತರ ಗುಂಪೊಂದು ಧರ್ಮಸ್ಥಳ, ಕುಕ್ಕೆ ಸುಬ್ರಹ್ಮಣ್ಯ ದೇವಾಲಯದ ದರ್ಶನಕ್ಕೆಂದು ಶನಿವಾರ ತುರನೂರು ಗ್ರಾಮದಿಂದ ಕಾರಿನಲ್ಲಿ ಹೊರಟಿದ್ದರು. ದೇವರ ದರ್ಶನ ಮುಗಿಸಿ ಬೆಳಗ್ಗೆ ಧರ್ಮಸ್ಥಳದಿಂದ ಚಾರ್ಮಾಡಿ ಘಾಟ್ ಮಾರ್ಗವಾಗಿ ಚಿಕ್ಕಮಗಳೂರು ಕಡೆಗೆ ಬರುವಾಗ ಮೂಡಿಗೆರೆಯಿಂದ ಸುಮಾರು 25 ಕಿ.ಮೀ ದೂರದ ಆಲೆಖಾನ್ ಜಲಪಾತ ನೋಡಲು ಇಳಿದಿದ್ದಾರೆ.

ಈ ವೇಳೆ ಹನುಮಂತಪ್ಪ ಹಾಗೂ ನಾಗಭೂಷಣ್ ಸೆಲ್ಫೀ ತೆಗೆಯುವಾಗ ನಿಯಂತ್ರಣ ಕಳೆದುಕೊಂಡು ಪ್ರಪಾತಕ್ಕೆ ಬಿದ್ದಿದ್ದಾರೆ. ಇಬ್ಬರ ಮೃತದೇಹಗಳನ್ನು ತೆಗೆಯಲು ಪೊಲೀಸರು ಹರಸಾಹಸ ಪಡುತ್ತಿದ್ದ ವೇಳೆ ಸ್ಥಳೀಯರು ಪೊಲೀಸರಿಗೆ ನೆರವಾಗಿದ್ದಾರೆ. ಕೊಟ್ಟಿಗೆಹಾರಾ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.