ಬೆಂಗಳೂರು: ಭಾರತೀಯ ಜನತಾ ಪಾರ್ಟಿಯ ಎಸ್.ಸಿ/ಎಸ್.ಟಿ ಯುವ ಮೋರ್ಚಾದ ಆನೇಕಲ್ ಘಟಕದ ಉಪಾಧ್ಯಕ್ಷ ಹರೀಶ್ ಅವರನ್ನು ಬೆಂಗಳೂರಿನ ಹೊರವಲಯದ ಸೂರ್ಯ ಸಿಟಿ ಸಮೀಪ ಶಸ್ತ್ರಾಸ್ತ್ರಗಳಿಂದ ಕಳೆದ ರಾತ್ರಿ ಕೊಚ್ಚಿ ಕೊಲೆ ಮಾಡಲಾಗಿದೆ.

ತನ್ನ ಸ್ನೇಹಿತರನ್ನು ಬಾರ್ ಅಂಡ್ ರೆಸ್ಟೋರೆಂಟ್ ನಲ್ಲಿ ಭೇಟಿ ಮಾಡಿ ರಾತ್ರಿ 9 ಗಂಟೆ ಸುಮಾರಿಗೆ ಮನೆಗೆ ಹಿಂತಿರುಗುತ್ತಿದ್ದ ವೇಳೆ ಈ ಘಟನೆ ನಡೆದಿದೆ. ದುಷ್ಕರ್ಮಿಗಳು ಬೈಕ್ ನಲ್ಲಿ ಬರುತ್ತಿದ್ದ ಹರೀಶ್ ರನ್ನು ದಾರಿಯಲ್ಲಿ ತಡೆದು  ಮೆಣಸಿನ ಪುಡಿ ಎರಚಿ ಶಸ್ತ್ರಾಸ್ತ್ರಗಳಿಂದ ಕೊಚ್ಚಿ ಕೊಲೆ ಮಾಡಿ ಪರಾರಿಯಾಗಿದ್ದಾರೆ. 

ಹರೀಶ್ ಕೊಲೆಯ ಹಿಂದೆ ವೈಯಕ್ತಿಕ ದ್ವೇಷ ಕಾರಣವಾಗಿರಬಹುದು ಎಂದು ಪೊಲೀಸರು ಶಂಕಿಸಿದ್ದಾರೆ. ಪ್ರಾಥಮಿಕ ತನಿಖೆ ನಡೆಸಿದ ಪೊಲೀಸರು, ಇತ್ತೀಚೆಗೆ ಹರೀಶ್ ನ ಸಂಬಂಧಿ ರಾಜು ಮತ್ತು ಆತನ ಸೋದರರ ನಡುವೆ ಆನೇಕಲ್ ನಲ್ಲಿ ತೊಟ್ಟಿ ಮೀನುಗಾರಿಕೆ ಬಗ್ಗೆ ವಾಗ್ವಾದ ನಡೆದಿತ್ತು. 

ಈ ಸಂಬಂಧ ರಾಜು ಮತ್ತು ಹರೀಶ್ ಮಧ್ಯೆ ಜಗಳ ನಡೆದಿತ್ತು. ಬಳಿಕ ಸ್ಥಳೀಯರ ಮಧ್ಯ ಪ್ರವೇಶದಿಂದ ಜಗಳ ತಣ್ಣಗಾಯಿತು. ಆದರೆ ಹರೀ ಶ್ ನಂತರ ರಾಜು ಮನೆಗೆ ಹೋಗಿ ಆತನನ್ನು ಮತ್ತು ಮನೆಯವರನ್ನು ಹೊಡೆದು ಬಂದಿದ್ದಾನೆ. ಬಳಿಕ ತನ್ನ ಸ್ನೇಹಿತರೊಂದಿಗೆ ಪಾರ್ಟಿ ಮಾಡಲು ರೆಸ್ಟೋರೆಂಟ್ ಗೆ ತೆರಳಿದ್ದ ಎಂದು ಪೊಲೀಸರು ತಿಳಿಸಿದ್ದಾರೆ.

ಅವಮಾನ ಸಹಿಸದೆ ರಾಜು ಮತ್ತು ಅವನ ಸ್ನೇಹಿತರು ಹರೀಶ್ ನನ್ನು ಕೊಂದಿರಬಹುದು ಎಂದು ಪೊಲೀಸರು ಶಂಕಿಸಿದ್ದಾರೆ. ಸೂರ್ಯನಗರ ಪೊಲೀಸರು ಕೇಸು ದಾಖಲಿಸಿದ್ದು ರಾಜು ಮತ್ತು ಅವನ ಸ್ನೇಹಿತರಿಗಾಗಿ ಹುಡುಕಾಟ ನಡೆಸುತ್ತಿದ್ದಾರೆ.