ಬೆಂಗಳೂರು: ಅಪರಿಚಿತ ವ್ಯಕ್ತಿಯ ಶವದ ಮೇಲೆ 150 ಹೆಚ್ಚು ವಾಹನಗಳು ಸಂಚರಿಸಿದ ಭೀಕರ ಘಟನೆ ಬೆಂಗಳೂರಿನ ಮಡಿವಾಳದಲ್ಲಿ ನಡೆದಿದೆ.

ಮಡಿವಾಳ ಬಳಿ ಇರುವ ಬಿಎಟಿಪಿಎಲ್ ಎಲಿವೇಟೆಡ್ ಫ್ಲೈಓವರ್ ಮೇಲೆ ಅಪರಿಚಿತ ವ್ಯಕ್ತಿಯೊಬ್ಬರಿಗೆ ಇಂದು ನಸುಕಿನ ಜಾವ 3 ಗಂಟೆಗೆ ವಾಹನವೊಂದು ಡಿಕ್ಕಿ ಹೊಡೆದಿತ್ತು.. ಆ ಸಂದರ್ಭದಲ್ಲಿ ವ್ಯಕ್ತಿಯು ಸ್ಥಳದಲ್ಲೇ ಮೃತಪಟ್ಟಿದ್ದಾನೆ.

ಆದರೆ ಈ ಅಪಘಾತವಾಗಿರುವ ವಿಚಾರ ಯಾರಿಗೂ ತಿಳಿಯದ ಕಾರಣದಿಂದ ಆ ಮಾರ್ಗದಲ್ಲಿ ಬರುವ ವಾಹನಗಳೆಲ್ಲವೂ ಶವದ ಮೇಲೆಯೇ ಹರಿದು ಹೋಗಿದೆ. ಕೆಲ ಗಂಟೆಗಳ ನಂತರ ಸಂಚಾರಿ ಪೋಲೀಸರು ಈ ವಿಷಯವನ್ನು ಗಮನಿಸಿದ್ದಾರೆ. ಆದರೆ ಅಷ್ಟರಲ್ಲೇ ವ್ಯಕ್ತಿಯ ದೇಹದ ಮೇಲೆ 150 ಕ್ಕೂ ಹೆಚ್ಚು ವಾಹನಗಳು ಹರಿದ ಪರಿಣಾಮ ಗುರುತು ಸಹ ಸಿಗದಂತಾಗಿತ್ತು.

ಆಂಬುಲೆನ್ಸ್‍ಗೆ ಕರೆ ಮಾಡಿದ ಪೋಲೀಸರು ಶವವನ್ನು ಹತ್ತಿರದ ಆಸ್ಪತ್ರೆಗೆ ಸಾಗಿಸಿದ್ದಾರೆ. ಮಡಿವಾಳ ಸಂಚಾರಿ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.