ಬೆಂಗಳೂರು: ನವರಾತ್ರಿ ಆಚರಣೆ ವೇಳೆ ಜೋರು ಶಬ್ದ ಉಂಟಾದ ಹಿನ್ನೆಲೆಯಲ್ಲಿ ಅಪಾರ್ಟ್ ಮೆಂಟ್ ನಿವಾಸಿಗಳ ಮೇಲೆ ಹಲ್ಲೆ ನಡೆಸಿದ ಘಟನೆ  ಬೆಂಗಳೂರಿನಲ್ಲಿ ನಡೆದಿದೆ. 

ಚನ್ನಸಂದ್ರದ ಈಶ ಮಿಸ್ಟಿ ಗ್ರೀನ್ ಅಪಾರ್ಟ್ಮೆಂಟ್ ನ ನಿವಾಸಿಗಳ ಮೇಲೆ ಹಲ್ಲೆ ನಡೆಸಲಾಗಿದ್ದು, ವೈಟ್ ಫೀಲ್ಡ್ ವಿಭಾಗದ ಪೊಲೀಸರು ಅ.19 ರಂದು ಇಬ್ಬರು ಮಹಿಳೆಯರೂ ಸೇರಿದಂತೆ  ಕಾಡುಗೋಡಿಯ 7 ಜನರನ್ನು ಬಂಧಿಸಿದ್ದಾರೆ. ಬಂಧಿತರನ್ನು ಮುನಿಸ್ವಾಮಿ, ಶ್ರೀನಿವಾಸ ಗೌಡ, ಓಂ ಪ್ರಕಾಶ್ ಗೌಡ, ಅನಿಲ್, ವಿನೋದ್, ಶಶಿಕಲಾ ಹಾಗೂ ಹೇಮಾವತಿ ಎಂದು ಗುರುತಿಸಲಾಗಿದೆ. 

ಬಂಧಿತರೂ ಸಹ ಅಪಾರ್ಟ್ಮೆಂಟ್ ನಿವಾಸಿಗಳ ವಿರುದ್ಧ ಪ್ರತಿ ದೂರು ದಾಖಲಿಸಿದ್ದಾರೆ. ಗುರುವಾರ ರಾತ್ರಿ 9 ಗಂಟೆ ವೇಳೆಗೆ ಜೋರಾದ ಶಬ್ದದಲ್ಲಿ ಹಾಡು ಹಾಕಿದ್ದರು. ಇದರಿಂದ ಆಕ್ರೋಶಗೊಂಡ ಸ್ಥಳೀಯರು,  ಅಪಾರ್ಟ್ ಮೆಂಟ್ ನ ಮುಖ್ಯ ದ್ವಾರವನ್ನು ಮುರಿದು ಅಪಾರ್ಟ್ಮೆಂಟ್ ಗೆ ಬಂದ  50 ಜನರ ಗುಂಪು ಹಲ್ಲೆ ನಡೆಸಿದ್ದಾರೆ ಎಂಬ ಆರೋಪ ಕೇಳಿಬಂದಿದೆ.