ಬೆಂಗಳೂರು: ಆಂಧ್ರ ಪ್ರದೇಶದ 32 ವರ್ಷದ ಮಹಿಳಾ ಸಾಫ್ಟ್ವೇರ್ ಡೆವಲಪರ್ ಒಬ್ಬರು ಆಟೋ ಚಾಲಕನ ವಿರುದ್ಧ ಲೈಂಗಿಕ ಕಿರುಕುಳ ದೂರು ದಾಖಲಿಸಿದ್ದಾರೆ.
ಗುರುವಾರ ರಾತ್ರಿ 9.15ರಿಂದ 10.15ರ ನಡುವೆ ಸಂಪಿಗೆಹಳ್ಳಿಯ ಅಗ್ರಹಾರ ಮುಖ್ಯರಸ್ತೆಯಲ್ಲಿ ಈ ಘಟನೆ ನಡೆದಿದೆ ಎಂದು ಮಹಿಳೆ ದೂರಿನಲ್ಲಿ ತಿಳಿಸಿದ್ದಾರೆ. ಶನಿವಾರ ರಾತ್ರಿ ಪೊಲೀಸರಿಗೆ ದೂರು ನೀಡಿದ್ದಾರೆ. ಸಂತ್ರಸ್ತೆ ಪ್ರಕೃತಿ ನಗರದ ನಿವಾಸಿಯಾಗಿದ್ದು, ಕೊಡಿಗೇಹಳ್ಳಿಯ ಖಾಸಗಿ ಸಂಸ್ಥೆಯಲ್ಲಿ ಸಾಫ್ಟ್ವೇರ್ ಡೆವಲಪರ್ ಆಗಿ ಕೆಲಸ ಮಾಡುತ್ತಿದ್ದಾರೆ. ಗುರುವಾರ ತನ್ನ ಕೆಲಸ ಮುಗಿಸಿ ಕೊಡಿಗೇಹಳ್ಳಿ ಜಂಕ್ಷನ್ ಬಳಿ ಆಟೋಗಾಗಿ ಕಾಯುತ್ತಿದ್ದಾಗ ದುಷ್ಕರ್ಮಿಯು 140 ರೂ. ದರ ನಿಗದಿ ಮಾಡಿ ತನ್ನ ಮನೆಯಿರುವ ಏರಿಯಾಗೆ ಡ್ರಾಪ್ ಮಾಡಲು ಒಪ್ಪಿಕೊಂಡರು.
ಕೋಗಿಲು ಕ್ರಾಸ್ನ ಮುಖ್ಯರಸ್ತೆಯಲ್ಲಿ ಆಟೋ ಚಾಲಕನು ಹಿಂಬದಿಯ ಕನ್ನಡಿಯಲ್ಲಿ ಸಂತ್ರಸ್ತೆಯನ್ನು ನೋಡುತ್ತಾ ಆಕ್ಷೇಪಾರ್ಹ ಸನ್ನೆಗಳನ್ನು ಮಾಡುತ್ತಿದ್ದ. ಸಂತ್ರಸ್ತೆ ಗಾಬರಿಗೊಂಡರು ಮತ್ತು ಚಲಿಸುತ್ತಿದ್ದ ಆಟೋದಿಂದ ಹೊರಬರಲು ಹೆದರಿಕೆಯಾಯಿತು ಎಂದು ದೂರಿನಲ್ಲಿ ಉಲ್ಲೇಖಿಸಿದ್ದಾರೆ.
ಅಗ್ರಹಾರ ಕಡೆಗೆ ಬಲಕ್ಕೆ ತೆಗೆದುಕೊಂಡ ನಂತರ ಆಟೋ ಚಾಲಕ ವಾಹನ ನಿಲ್ಲಿಸಿ ಆಟೋ ಇಂಜಿನ್ ಸಮಸ್ಯೆ ಉಂಟಾಗಿದೆ ಎಂದು ಹೇಳಿದ್ದಾನೆ, ಈ ವೇಳೆ ಆಕೆ ಆಟೋದಿಂದ ಇಳಿಯಲು ಯತ್ನಿಸಿದಾಗ ಆಕೆಯನ್ನು ತಡೆದಿದ್ದಾನೆ ಎನ್ನಲಾಗಿದೆ.
ಆಟೋ ಚಾಲಕ ಆಕೆಯ ಬಟ್ಟೆ ಹರಿದ್ದಿದ್ದಾನೆ, ಕೂಡಲೇ ಆತನನ್ನು ತಳ್ಳಿ ಧೈರ್ಯ ತುಂಬಿಕೊಂಡು ಅಗ್ರಹಾರ ಮುಖ್ಯರಸ್ತೆಯತ್ತ ಓಡಿದ್ದಾರೆ. ಈ ವೇಳೆ ಸಂತ್ರಸ್ತೆ ಇಬ್ಬರು ಮಹಿಳೆಯರನ್ನು ಕಂಡು ಅವರ ಸಹಾಯ ಪಡೆದು, ಆತನಿಂದ ತಪ್ಪಿಸಿಕೊಂಡು ಮನೆಗೆ ತಲುಪುವಲ್ಲಿ ಯಶಸ್ವಿಯಾಗಿದ್ದಾರೆ.
ಆಟೋ ಚಾಲಕನನ್ನು ಇನ್ನೂ ಬಂಧಿಸಿಲ್ಲ. ಸಂತ್ರಸ್ತೆ ಸಾಗಿದ ಮಾರ್ಗದಲ್ಲಿ ನಾವು ಸಿಸಿಟಿವಿ ದೃಶ್ಯಾವಳಿಗಳನ್ನು ಪರಿಶೀಲಿಸುತ್ತಿದ್ದೇವೆ ಎಂದು ತನಿಖೆಯ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ. ಆಟೋ ಚಾಲಕನ ವಿರುದ್ಧ ಐಪಿಸಿ 354ಬಿ ಅಡಿಯಲ್ಲಿ ಪ್ರಕರಣ ದಾಖಲಾಗಿದೆ.